1 Ntho e nngwe le e nngwe e na le sebaka sa yona, mme nako e teng ya tsohle tse etswang tlasa letsatsi:
2 nako e teng ya ho tswalwa, e teng nako le ya ho shwa; nako e teng ya ho hloma, e teng nako le ya ho fothola se hlomilweng;
3 nako e teng ya ho bolaya, e teng nako le ya ho fodisa; nako e teng ya ho qhaqholla, e teng nako le ya ho haha;
4 nako e teng ya ho lla, e teng nako le ya ho tsheha: nako e teng ya ho bokolla, e teng nako le ya ho hobela;
5 nako e teng ya ho betsa majwe, e teng nako le ya ho thonaka majwe; nako e teng ya ho aka, e teng nako le ya ho lesa ho aka;
6 nako e teng ya ho batla, e teng nako le ya ho lahlehelwa; nako e teng ya ho boloka, e teng nako le ya ho lahla;
7 nako e teng ya ho hahola, e teng nako le ya ho roka; nako e teng ya ho kgutsa, e teng nako le ya ho bua;
8 nako e teng ya ho rata, e teng nako le ya ho hloya; nako e teng ya ntwa, e teng nako le ya kgotso.
9 Ya sebetsang o ruang ka mosebetsi oo a ikgathatsang ka wona?
10 Ke lemohile mesebetsi eo Modimo o e neileng bana ba batho hore ba ikgathatse ka yona.
11 O entse tsohle di le ntle nakong ya tsona; o bile o beile lefatshe lohle pela bona hore ba lemohe ditaba tsa lona; leha ho le jwalo, ha ho motho ya utlwisisang mesebetsi e entsweng ke Modimo, ho qala qalong ya yona ho isa qetellong ya yona.
12 Kahoo, ke lemohile hobane ha ho letho le ka bang molemo ho bona, haese ho itumela le ho iketsetsa boiketlo ka tshiu tsa bophelo ba bona;
13 ke lemohile hape, hoba, ereha motho a eja dijo, kapa a enwa le ho latswa boiketlo ka mokgathala wohle wa hae, le teng e sa le neo ya Modimo.
14 Ke lemohile hobane tsohle tse entsweng ke Modimo di hloleha ka ho sa feleng; ha ho se ka eketswang ho tsona, ha ho le se ka kgaolwang; mme Modimo o sebetsa jwalo hore tshabo e be teng ho batho pela wona.
15 Se hlahang jwale se se se kile sa eba teng, mme se tlang ho hlaha se ne se ntse se le teng le kgale, mme Modimo o boela o hlahisa se neng se se se fetile.
16 Ka boela ka tadima tlasa letsatsi, ka bona bokgopo bo le teng nqalong ya kahlolo, le tulong tsa ho loka ka bona bokgopo.
17 Ka ba ka re pelong ya ka: Modimo o tla ahlolela ya lokileng le e mobe, etswe merero yohle le mesebetsi yohle e beetswe nako ya yona.
18 Ka boela ka re pelong ya ka: Taba di jwalo ka baka la bana ba batho; Modimo o a ba leka, hore ba bone hoba ba ntse ba tshwana le diphoofolo.
19 Hobane kotsi e hlahelang bana ba batho, e jwalo e hlahela le diphoofolo: bobedi ba bona bo hlahelwa ke kotsi e le nngwe. Mokgwa oo motho a shwang ka wona, le yona phoofolo e shwa jwalo; moya wa bohle o mong; ha ho kamoo motho a fetanang le phoofolo kateng, etswe tsohle e le lefeela.
20 Tsohle di ikela nqalong e le nngwe; tsohle di tswa leroleng, mme tsohle di kgutlela leroleng.
21 Ke mang ya tsebang haeba moya wa bana ba batho o nyolohela hodimo, kapa ha moya wa phoofolo o theohela tlase lefatsheng?
22 Ha ho le jwalo, ka bona hobane ha ho molemo o fetang wa hore motho a thabele mesebetsi ya hae, hobane ke yona kabelo eo a e abetsweng. Hobane a ka latwa ke mang, hore a tle ho bona se tla hlaha a se a le siyo?