1 Efela ke etse tsena tsohle hloko, mme ka di bea tsohle leseding, tsa hore ba lokileng le ba bohlale ba letsohong la Modimo hammoho le mesebetsi ya bona; batho ba ke ke ba tseba hoba ba ratwa, kapa ba hloilwe; tsohle di ka etsahala.
2 Tse tshwanang di ntse di hlahela bohle: kotsi e le nngwe e hlahela ya lokileng, le molotsana, le ya molemo, le ya hlwekileng, le ya ditshila, le ya hlabang sehlabelo, le ya sa hlabeng sehlabelo. Ya molemo o jwaloka moetsadibe; ya hlapaolang le yena o jwaloka ya tshabang hlapa.
3 Bobe bona bo ka ho tsohle tse etswang tlasa letsatsi, ke hoba kotsi e le nngwe e hlahela bohle; eba pelo tsa bana ba batho di tlala bobe, mme pelo tsa bona di tlala bowatla ho pheleng ha bona; kamora moo, ba ikela ho bafu.
4 Na ke mang ya sa fihlelweng ke tseo? Haele ba utlwang, tshepo e ntse e le teng ho bona; hobane ntja e utlwang e fetisa tau e shweleng.
5 Ba utlwang bona ba tseba hobane ba ya shwa, empa bafu ha ba tsebe letho leha le le leng, mme ba ke ke ba hlola ba nka moputso lefatsheng, hobane lebitso la bona le lebetswe.
6 Lerato la bona, le hloyo ya bona, le mohono wa bona, di se di timetse; ba ke ke ba hlola ba eba le kabelo ho tsohle tse etswang tlasa letsatsi le ka mohla o le mong.
7 Ha ho le jwalo, eya, o je bohobe ba hao ka thabo, o nwe veine ya hao ka pelo e nyakaletseng; etswe Modimo o kgahlisitswe le kgale ke diketso tsa hao.
8 Diaparo tsa hao di nne di be tshweu, ole e se ke ya hlokahala hloohong ya hao.
9 Phela hamonate le mosadi eo o mo ratang, ka ditshiu tsohle tsa bophelo ba hao ba lefeela, boo o o neileng bona tlasa letsatsi, ka matsatsi a hao a se makae, etswe e le kabelo ya hao bophelong le mokgathaleng wohle wa hao oo o ikgathaditseng ka wona tlasa letsatsi.
10 Tsohle tse fihlelwang ke letsoho la hao hore di ka sebetswa, o di etse ka matla a hao; hobane nqalong ya bafu moo o yang, ha ho sa le mosebetsi, leha e le morero, kapa tsebo, kapa bohlale.
11 Ke lemohile, mme ke bone tlasa letsatsi hoba peisong ya lebelo ha a siye ba bang kamehla, ntwa hase ya diqhenqha kamehla, bohobe hase jwa ba bohlale kamehla, le leruo hase la ba kello kamehla, le ho ratwa hase ha batsebi kamehla, empa bohle ba hlahelwa ke nako le sebaka sa ntho tseo.
12 Hobane motho ha a tsebe nako ya hae, jwalokaha a se tsejwe le ke dihlapi tse tshwaswang ke letlowa le di bolayang, le ke dinonyana tse pitlwang difing; bana ba batho ba ye ba tshwaswe jwaloka tsona nakong ya tlokotsi, ha e ba wela ka sehloho.
13 Hape, ke bone bohlale bo bong tlasa letsatsi, ke bohlale bo boholo ha ke bo tadima:
14 Ke bone motsana o se nang batho ba bangata, ha o ne o futuhelwa ke morena e moholo; a o thibella, a o dikadiketsa ka dikantshi tse kgolo;
15 empa teng motho o ne a le teng, wa mofutsana, ya bohlale, ke yena ya pholositseng motse ka bohlale ba hae; leha ho le jwalo, motho eo wa mofutsana ha a ka a hopolwa ke motho.
16 Ka ba ka re: Bohlale bo molemo ho ena le matla, leha bohlale ba mofutsana bo nyediswa, mme mantswe a hae a sa elwe hloko.
17 Mantswe a buwang butle a ba bohlale, ha a mamelwa, a molemo ho ena le mehoweletso ya morena ya busang hara mawatla.
18 Bohlale bo molemo ho ena le dihlomo, empa moetsadibe a le mong o senya monono o mongata.