1 Lengeloi le neng le bua le nna la boela la kgutla, la ntsosa, jwalokaha ho tsoswa motho borokong.
2 La re ho nna: O bonang? Ka re: Ke bona kandelare e leng ya kgauta feela, e nang le nkgo ya yona ya ole ntlheng ya yona, le dilampi tsa yona tse supileng kahodimo ho yona, le dipomponyana tse supileng ho e nngwe le e nngwe ya dilampi tseo tse kahodimo ho yona;
3 le mehlwaare e mmedi pela yona, o mong ka ho le letona la nkgo, o mong ka ho le letshehadi.
4 Yaba ke bolella lengeloi le buang le nna, ka re: Ntho tseo keng, monga ka?
5 Lengeloi le buang le nna la nkaraba, la re: Na ha o tsebe hore ntho tseo keng? Ka re: Tjhe, monga ka.
6 Yaba o mpolella, a re: Ke lentswe la Jehova ho Sorababele, le reng: Hase ka matla le ka borena, empa e le ka moya wa ka, ho bolela Jehova wa makgotla!
7 Wena thaba e kgolo, o eng pela Sorobabele? O lehwatata feela! Mme o tla hlahisa lejwe la hloro ya ntlo hara ditlatse tse reng: Le hauhelwe! le hauhelwe!
8 Lentswe la Jehova la ntlela, la re:
9 Matsoho a Sorababele a theile ntlo ena, mme matsoho a hae a tla e phetha; mme o tla tseba hobane Jehova wa makgotla o nthomile ho lona.
10 Hobane ke mang ya ka nyedisang letsatsi la taba tse nyenyane? A ile a thaba ha a bona loto ya ho lekanya e letsohong la Sorobabele, mahlo ao a supileng, e leng mahlo a Jehova, a ntseng a qamaka lefatshe lohle.
11 Yaba ke bua le lengeloi, ka re ho lona: Mehlwaare ena e mmedi e ka ho le letona la kandelare le ka ho le letshehadi la yona keng?
12 Ka boela ka bua la bobedi, ka re ho lona: Keng masihla ao a mabedi a ditholwana tsa mohlwaare tse pela pitsana tse pedi tse masoba tsa kgauta, tseo ho rothang ole ya kgauta ho tsona?
13 La mpolella, la re: Na ha o tsebe hore ntho tseo keng? Ka re: Tjhe, monga ka.
14 Yaba le re: Ke batlotsuwa ba babedi ba emeng pela Morena wa lefatshe lohle.