1 Ka boela ka emisa mahlo a ka, ka tadima, mme ka bona ho hlaha makoloi a mane a tswang mahareng a thaba tse pedi, thaba tseo e le thaba tsa koporo;
2 koloing ya pele, e le pere tse kgunong; koloing ya bobedi, e le pere tse ntsho;
3 koloing ya boraro, e le pere tse tsweu; koloing ya bone, e le pere tse phatswa, tse matla.
4 Ka bolella lengeloi le neng le bua le nna, ka re: Tseo keng monga ka?
5 Yaba lengeloi le nkarabela, la re: Tseo ke meya e mene ya lehodimo e tswang moo e emang pela Morena wa lefatshe lohle.
6 Dipere tsa koloi e nngwe, e leng tse ntsho, di tswela lefatsheng la Leboya, tse tsweu di latela mehlaleng ya tsona, tse phatswa di tswela lefatsheng la Borwa;
7 haele tse matla, di a tswa, di pheheletse ho tloha, ho ya le lefatshe lohle. Mme Jehova a re: Tlohang, le ye le lefatshe. Yaba di ya le lefatshe.
8 Lengeloi la mpitsa, la re ho nna: Bona, tse tswelang lefatsheng la Leboya di isitse bohale ba ka ka lefatsheng la Leboya.
9 Lentswe la Jehova la ntlela, la re:
10 Nka dimpho ho ba tswang kgolehong, ho Heldai, le Tobija, le Jedaia ... ke ho re, o ye ka tsatsi lena, tlung ya Josiase, mora Sofonia, moo ba fihletseng teng, ha ba etswa Babilona;
11 o nke silefera le kgauta ho bona, o etse meqhaka ka tsona: o e bee hodima hlooho ya Joshua, moprista e moholo, mora Jotsadake;
12 mme o re ho yena: Ho itswe ke Jehova wa makgotla: Bona, ho tla hlaha monna; lebitso la hae ke Lehlomela; o tla mela bodulong ba hae, a hahe ntlo ya Jehova.
13 Ke yena ya tla haha ntlo ya Jehova; o tla apara kganya, a dule e le morena teroneng ya hae; hape, e tla ba le moprista teroneng ya hae, mme morero wa kgotso o tla ba teng mahareng a bobedi boo.
14 Haele meqhaka, e tla bewa tlung ya Jehova, e tle e be kgopotso ya Heleme, le ya Tobija, le ya Jedaia, le ya Hene mora Sofonia.
15 Ba leng hole ba tla tla, ba hahe ntlo ya Jehova, mme le tla tseba hobane Jehova wa makgotla o nthomile ho lona; ho tla ba jwalo, ha le utlwa lentswe la Jehova, Modimo wa lona.