1 Sefela sa difela, sa Salomone.
2 Ake a nkake ka kako tsa molomo wa hae! hobane lerato la hao le monate ho ena le veine.
3 Menkwane ya hao e nkga hamonate; lebitso la hao eka setlolo se qhatseditsweng; barwetsana ba o rata ke hona.
4 O nkgule, mme re tla phalla kamora hao. Morena o ntlisitse dikamoreng tsa hae. Re tla thaba, re nyakallele wena, re rorise lerato la hao le fetisang veine. Ba o rata ka lerato la nnete.
5 Baradi ba Jerusalema, ke motshwana, empa ke motle jwaloka ditente tsa Kedare, jwaloka dilepello tsa tente ya Salomone.
6 Le se ke la ntadima ha ke le motshwana, hobane ke tjhele ke letsatsi; bara ba mmè, ha ba nkgalefetse, ba mpeile ho disa merara, mme merara e leng ya me ka sebele ha ke a e disa.
7 Wena ya ratwang ke moya wa me, mpolelle moo o disang, moo o bothisang mohlape wa hao motshehare; hobane nka tshwana keng le mosadi ya lelerang hara mehlape ya dithaka tsa hao?
8 Ha o sa tsebe, wena e motle hara basadi, o latele mehlala ya dinku, o fudise dipotsanyane tsa hao pela maphephe a badisa. —
9 Thatohatsi ya ka, ke o tshwantsha le semathi sa dipere tsa makoloi a Faro.
10 Marama a hao a matle dipakeng tsa meqhaka, le molala wa hao dipakeng tsa masihla.
11 Ke tla o etsetsa meqhaka ya kgauta e homilweng ka mahlo a silefera.
12 Morena ha a ntse a dutse tafoleng, nareda ya me e ntse e ntsha monko wa yona.
13 Moratuwa wa me o ho nna jwaloka letlenyana la mirra le hoketsweng sefubeng sa me.
14 Moratuwa wa me o ho nna jwaloka lesihla la kiprese merareng ya Ene-Gedi.
15 Bona, o motle, thatohatsi ya ka, o motle; mahlo a hao eka a leebakgorwana.
16 Moratuwa wa me, bona, o motle, o a rateha; tao tsa rona ke botala.
17 Difero tsa ntlo ya rona ke dikedare, mme maballo a rona ke dikiprese.