1 Moradi wa morena, maoto a hao a matle hakakang dirwalong tsa wona! Dithopola tsa dinoka tsa hao di jwaloka mekgabo e sebeditsweng ke moetsi wa sebele;
2 theka la hao ke mohope o holokaneng, o tletseng veine e tswakilweng; sefuba sa hao se jwaloka setha sa mabele se dikilweng ke mehaladitwe.
3 Matswele a hao a mabedi eka mafahlana a mabedi a tshephe;
4 molala wa hao eka tora e sebeditsweng ka dinaka tsa tlou; mahlo a hao a jwaloka matsha a Heshbone, monyakong wa Bathe-Rabbime; nko ya hao e jwaloka tora ya Lebanone e lebileng nqa Damaseka;
5 hlooho ya hao e phahamile, e tshwana le Karmele, mme thitsane ya hao eka purepera ya borena mahareng a letlowanyana le e tlamileng.
6 Thatohatsi ya ka, o motle hakakang, o rateha hakakang ka dikgahliso tsa hao!
7 Boemo ba hao eka ba sefate sa palema, matswele a hao eka masihla a sona.
8 Ka re: Ke tla hlwella hlorong ya sefate sa palema, ke itshwarelle ka makala a sona a lepeletseng. Matswele a hao a ke a be jwaloka masihla a morara, monko wa phefumoloho ya hao o be jwaloka wa apole;
9 molomo wa hao o be jwaloka veine e monate e phallelang ho moratuwa wa ka, e buisang melomo ya ba robetseng.
10 Nna ke wa moratuwa wa me, lerato la hae le lebile ho nna.
11 Tloo, moratuwa wa me, a re ye masimong, re dule metsaneng.
12 Meso ha e etla, re tla ya dirapeng tsa merara, re be re bone ha merara e mela, ha e se e fina masihla a yona, ha difate tsa kharanata di thuntse; teng ke tla o bontsha lerato la me.
13 Diduda di se di utlwahatsa monko wa tsona; pela monyako wa heso ditholwana tsohle tse ratwang di teng, tsa jwale le tsa pele. Moratuwa wa me, ke o boloketse tsona.