1 Sha’ul het ook saamgestem en deelgeneem aan sy moord en daar was in dié tyd ’n groot vervolging teen die gemeente in Yerushalayim en almal, behalwe die afgevaardigdes, is verstrooi oor die dorpies van Y’hudah en Shomron.
2 Manne wat vertrou, het Stefanos gevat en begrawe en baie oor hom gerou,
3 maar Sha’ul het die gemeente vervolg en in huise ingegaan en manne en vroue uitgesleep en aan die tronk oorgegee.
4 Díe wat verstrooi is, het reisende die boodskap van God verkondig,
5 maar Filippos het afgegaan na ’n stad van Shomron en aangaande Die Gesalfde Een aan hulle verkondig.
6 Die mense het, soos hulle sy boodskap hoor, geluister en was oortuig van wat hy sê omdat hulle die wondertekens gesien het wat hy doen,
7 want uit baie van die wat onrein geeste gehad het, het die geeste uitgegaan terwyl hulle met ’n harde stem geskree het en baie wat lam en kreupel was, het gesond geword
8 en daar was groot blydskap in daardie stad.
9 ’n Sekere man, met die naam van Shim’on, het vóór dit, in die stad die mense van Shomron mislei met towery en beweer dat hy ‘Die groot god’ is.
10 Almal, van klein tot groot, het tot hom gebid en gesê: “Hy is die groot krag van God.”
11 Almal was deur hom oortuig omdat hy hulle vir ’n lang tyd deur sy towerye verstom het,
12 maar toe hulle vertrou wat Filippos verkondig het aangaande die Koninkryk van God in die Outoriteit en Karakter van ons Meester, Yeshua, Die Gesalfde Een, is hulle gedoop, manne sowel as vroue.
13 Shim’on self het ook vertrou en nadat hy gedoop is, het hy gedurig by Filippos gebly en hy was verstom en verslae toe hy die tekens en wonderwerke sien wat deur sy hand gebeur.
14 Toe die afgevaardigdes in Yerushalayim hoor dat Shomron die boodskap van God aanvaar het, het hulle Shim’on Kefa en Yoganan na hulle toe gestuur.
15 Húlle het afgegaan en vir hulle gebid sodat hulle die Gees van Afsondering kan ontvang,
16 want Hy het toe nog op niemand van hulle geval nie, maar hulle was net gedoop in die Outoriteit en Karakter van ons Meester, Yeshua.
17 Hulle het toe die hande op hulle gelê en hulle het die Gees van Afsondering ontvang.
18 Toe Shim’on sien dat, deur die handoplegging van die afgevaardigdes, die Gees van Afsondering gegee word, het hy vir hulle geld gebring
19 en gesê: “Gee vir my ook hierdie outoriteit sodat as ek iemand die hande oplê, hulle die Gees van Afsondering kan ontvang.”
20 Shim’on Kefa sê vir hom: “Jou geld sal saam met jou na die vernietiging gaan omdat jy gedink het dat jy die geskenk van God met wêreldse besittings kan verkry.
21 Jy het geen deel of breukdeel aan hierdie vertroue nie, want jou verstand, wil en emosie is nie opreg voor God nie.
22 Draai weg van hierdie boosheid van jou en vra van God en miskien sal Hy jou die valsheid van jou verstand, wil en emosie vergewe,
23 want ek sien dat jy in ’n woede van bitterheid en bande van boosheid is.”
24 Shim’on het geantwoord en gesê: “Bid julle tot God vir my sodat niks van wat julle gesê het, oor my mag kom nie.”
25 Nadat Shim’on Kefa en Yoganan getuig en die boodskap van God verkondig het, het hulle na Yerushalayim teruggegaan en die goeie boodskap in baie dorpe van Shomron verkondig.
26 ’n Boodskapperengel van יהוה het met Filippos gepraat en gesê: “Staan op en gaan na die suide, op die stil pad wat afloop van Yerushalayim na `Azah.”
27 Hy het opgestaan, gegaan en ’n gelowige van Kush, ’n staatsamptenaar met baie outoriteit, wat oor al Khandakh, die koningin van die Kushiete, se skatte was en wat na Yerushalayim gekom het om te aanbid, ontmoet.
28 Hy was op pad terug en het op sy wa gesit en die profeet Yesha’yahu gelees.
29 Toe sê die Gees vir Filippos: “Gaan na die wa toe en bly by hom.”
30 Toe hy naderkom hoor hy wat hy in die profeet Yesha’yahu lees en hy sê vir hom: “Verstaan u dit wat u lees?”
31 Hy antwoord: “Hoe kan ek verstaan as iemand my nie leer nie?” Toe nooi hy Filippos om op te klim en by hom te kom sit.
32 Die gedeelte van die Skrif wat hy besig was om te lees, was dít: ‘Hy is soos ’n skaap wat gelei word om geslag te word en soos ’n lam wat stom is voor die een wat hom skeer, so maak Hy Sy mond nie oop nie.Yes 53:7-8
33 In Sy vernedering in gevangenis is Hy regverdige oordeel ontneem en wie sal vertel van Sy tyd, want Sy lewe word van die aarde af weggevat?’
34 Die gelowige antwoord en sê vir Filippos: “Ek smeek u, van wie sê die profeet dit, van homself of van iemand anders?”
35 Filippos het sy mond oopgemaak en van hierdie Skrif af begin en aangaande ons Meester, Yeshua, aan hom verkondig.
36 Terwyl hulle op pad is, kom hulle by water en die staatsamptenaar sê vir hom: “Let op, daar is water, wat verhinder my om gedoop te word?”
37 Filippos sê: “As u vertrou met u hele verstand, wil en emosie, is dit geoorloof.” Hy antwoord en sê: “Ek vertrou dat Yeshua, Die Gesalfde Een, die Seun van God is.”
38 Hy het beveel dat die wa moes stilhou en hulle altwee, Filippos en die staatsamptenaar, het in die water afgeklim en hy is gedoop.
39 Toe hulle uit die water uit opklim, het die Gees van יהוה vir Filippos weggevat en die staatsamptenaar het hom nie meer gesien nie, maar hy het met blydskap verder gereis.
40 Filippos is egter in Ashdod gekry en hy het van daar af gereis en in al die stede verkondig totdat hy in Kaisareia gekom het.