1 Usa ka higayon niana, miingon ang Ginoo kang Jonas nga anak ni Amitai,
2 “Adto karon dayon sa Nineve, ang dakong siyudad, ug ipadayag ang silot alang sa mga katawhan didto tungod kay midangat na kanako ang ilang kadaotan.”
3 Apan miadto hinuon si Jonas sa Tarshish aron sa pagpalayo sa Ginoo. Milugsong siya sa Jopa ug nakakita siya didto ug barko nga mobiyahe paingon sa Tarshish. Busa mibayad siya sa pletihan ug misakay aron magpalayo sa Ginoo.
4 Sa dihang naglawig na sila, nagpadala ang Ginoo ug kusog nga hangin sa dagat. Miunos ug kusog hangtod nga morag maguba na ang barko.
5 Busa nangahadlok ang mga tripulante, ug ang matag usa kanila nagpakitabang sa ilang mga dios. Gipanglabay nila ang mga karga sa dagat aron mogaan ang barko.Nakanaog na kaniadto si Jonas sa ubos nga bahin sa barko ug naghigda didto hangtod nga nahinanok siya pag-ayo.
6 Unya miadto kaniya ang kapitan sa barko ug miingon, “Nakahimo ka pa sa pagkatulog? Bangon, ug pangayo ug tabang sa imong dios! Basin pa ug malooy siya kanato, ug tabangan niya kita nga dili kita mangamatay.”
7 Unya nag-ingnanay ang mga tripulante, “Dali magripa kita aron mahibaloan nato kon kinsa ang hinungdan niining katalagman nga midangat kanato.” Busa nagripa sila, ug si Jonas ang naripahan.
8 Unya miingon sila kaniya, “Palihog, sultihi kami kon nganong midangat kining katalagman kanato, ug unsa ang imong trabaho ug taga-asa ka. Sultihi kami kon unsa ang imong nasod ug kaliwat.”
9 Mitubag si Jonas, “Usa ako ka Hebreo ug nagasimba ako sa Ginoo, ang Dios sa langit nga naghimo sa dagat ug sa yuta.”
10 Gisultihan sila ni Jonas nga nagpahilayo siya sa Ginoo. Busa nangahadlok pag-ayo ang mga tripulante. Miingon sila kaniya, “Unsa kining imong gibuhat?”
11 Sa dihang misamot na kadagko ang mga balod, miingon ang mga tripulante kang Jonas, “Unsay among buhaton kanimo aron mokalma ang dagat ug dili na makaperwisyo kanamo?”
12 Mitubag siya kanila, “Alsaha ninyo ako ug itambog sa dagat aron molinaw kini. Kay nasayod ako nga ako ang hinungdan kon nganong midangat kaninyo kining kusog nga bagyo.”
13 Apan wala nila gisunod si Jonas; naningkamot hinuon sila pagbugsay aron makaabot sa baybayon. Apan wala nila kini mahimo kay misamot pa gayod paghapak kanila ang kusog nga mga balod.
14 Busa nanawag sila sa Ginoo. Miingon sila, “O Ginoo, nagapakilooy kami kanimo, ayaw kami siloti tungod sa among pagahimuon kang Jonas. Ayaw kami paningli sa sala sa pagpatay sa usa ka inosenteng tawo tungod kay nasayod kami nga kining nahitabo imong pagbuot.”
15 Busa gialsa nila si Jonas ug gitambog sa dagat, ug diha-diha milinaw ang dagat.
16 Tungod niini, nahadlok gayod pag-ayo sa Ginoo ang mga tawo. Busa naghalad sila kaniya ug nanaad nga magpadayon sila sa pagsimba ug paghalad kaniya.
17 Nagpadala ang Ginoo ug dako nga isda sa paglamoy kang Jonas, ug didto siya sa tiyan sa isda sulod sa tulo ka adlaw ug tulo ka gabii.