1 Sa ikawalong bulan sa ikaduhang tuig sa paghari ni Darius sa Persia, may gisulti ang Ginoo kang Propeta Zacarias. Kini si Zacarias anak ni Berekia ug apo ni Iddo.
2-3 Gisugo sa Ginoo nga Makagagahom si Zacarias nga isulti kini ngadto sa katawhan sa Israel:“Nasuko ako pag-ayo sa inyong mga katigulangan. Karon, balik kamo kanako ug tabangan ko kamo.
4 Ayaw ninyog sunda ang gibuhat sa inyong mga katigulangan. Gisugo ko kaniadto ang mga propeta nga sultihan sila nga talikdan na nila ang ilang daotang mga binuhatan, apan wala sila maminaw kanako. Wala gayod sila mituman kanako.
5 Ang inyong mga katigulangan ug kadto nga mga propeta nangamatay na.
6 Apan nahitabo sa inyong mga katigulangan ang akong gipamulong ug ang mga pahimangno nga gipasugilon ko pinaagi sa akong mga alagad nga propeta. Unya naghinulsol ang inyong mga katigulangan ug miingon, ‘Gisilotan kita sa Ginoo nga Makagagahom nga angay sa atong binuhatan, sumala sa iyang plano.’ ”
7-8 May gisulti ang Ginoo kang Zacarias pinaagi sa usa ka panan-awon niadtong gabii sa ika-24 nga adlaw sa bulan sa Shebat (ika-11 nga bulan), sa ikaduhang tuig sa paghari ni Darius. Ug mao kini ang pahayag ni Zacarias:Nakita ko ang usa ka tawong nagasakay sa pulang kabayo nga nagapundo taliwala sa mga kahoy nga mirto didto sa patag. Sa iyang luyo may mga tawo nga nagasakay ug pula, kaki, ug puti nga mga kabayo.
9 Nangutana ako sa anghel nga nakigsulti kanako, “Unsay buot ipasabot niini, sir?” Mitubag siya, “Ipahayag ko kanimo kon unsay buot ipasabot niini.”
10 Unya ang tawo nga nagatindog taliwala sa mga kahoy nga mirto maoy mitubag kanako. Miingon siya, “Kanang mga nagkabayo gipadala sa Ginoo sa paglibot sa tibuok kalibotan.”
11 Unya miingon ang mga nagkabayo ngadto sa anghel sa Ginoo nga nagapundo taliwala sa mga kahoy nga mirto, “Nalibot na namo ang tibuok kalibotan ug nakita namo nga malinawon kini.”
12 Unya ang anghel sa Ginoo miingon, “Ginoo nga Makagagahom, 70 ka tuig ka na nga nasuko sa Jerusalem ug sa uban pang mga lungsod sa Juda. Kanus-a pa man nimo sila kaloy-an?”
13 Mitubag ang Ginoo sa maayo ug makapalipay nga mga pulong ngadto sa anghel nga nakigsulti kanako.
14 Miingon ang anghel kanako nga isugilon ko kining giingon sa Ginoo nga Makagagahom: “Nahingawa gayod ako sa Jerusalem, ang Zion,
15 apan nasuko ako pag-ayo sa mga nasod nga nagapahayahay lang. Kaniadto dili ra kaayo dako ang akong kasuko, apan gisugnoran nila kini.
16 Busa mobalik ako sa Jerusalem nga may kalooy, ug tukoron ko pag-usab kining siyudara apil na ang akong templo. Ako, ang Ginoo nga Makagagahom, ang nag-ingon niini.”
17 Miingon ang anghel nga isugilon ko usab kining giingon sa Ginoo nga Makagagahom: “Mouswag pag-usab ang akong mga siyudad sa Juda. Ug lipayon ko pag-usab ang Zion; ilhon ko pag-usab ang Jerusalem nga akong piniling siyudad.”
18 Unya nakita ko ang upat ka sungay.
19 Nangutana ako sa anghel nga nakigsulti kanako, “Unsay buot ipasabot niining mga sungay?” Mitubag siya kanako, “Kining mga sungay mao ang mga nasod nga nagpatibulaag sa mga katawhan sa Israel ug sa Juda, apil na niini ang katawhan sa Jerusalem.”
20 Unya gipakita sa Ginoo kanako ang upat ka panday.
21 Nangutana ako, “Unsay ilang himuon?” Mitubag siya, “Hadlokon nila ug bungkagon ang mga sungay nga nagrepresentar sa mga nasod, kay kining mga nasora mao ang hingpit nga naglaglag sa Juda ug nagpatibulaag sa mga lumulupyo niini.”