1 သင်၏ဘုရားသခင် ထာဝရဘုရားသည် သင်သွား၍ဝင်စားလတံ့သောပြည်သို့ သင့်ကိုဆောင်သွင်းလျက်၊ ဟိတ္တိလူ၊ ဂိရဂါရှိလူ၊ အာမောရိလူ၊ ခါနာနိလူ၊ ဖေရဇိလူ၊ ဟိဝိလူ၊ ယေဗုသိလူတည်းဟူသော၊ သင့်ထက်ကြီးမြင့်များပြားသော လူမျိုးခုနစ်မျိုးတို့ကို သင့်ထံကနှင်ထုတ်၍၊
2 တဖန်သင့်လက်၌ အပ်တော်မူသောအခါ၊ သူတို့ကိုလုပ်ကြံ၍ အကုန်အစင် သုတ်သင်ပယ်ရှင်းရမည်။ သူတို့နှင့် မိဿဟာယမဖွဲ့ရ၊ ကရုဏာကိုမပြရ။
3 သူတို့နှင့် စုံဘက်ခြင်းကိုမပြုရ။ သင်၏သမီးကိုသူ၏သားနှင့်၎င်း၊ သင်၏သားကို သူ၏သမီးနှင့်၎င်း ထိမ်းမြားပေးစားခြင်းကိုမပြုရ။
4 အကြောင်းမူကား၊ သူတို့သည် သင်၏သားကိုငါ၌မဆည်းမကပ်စေဘဲ၊ အခြားတပါးသောဘုရားအားဝတ်ပြုစေခြင်းငှာ သွေးဆောင်ကြလိမ့်မည်။ ထိုအခါ အမျက်ထွက်၍ သင်တို့ကို ချက်ခြင်းဖျက်ဆီးတော်မူလိမ့်မည်။
5 သို့ဖြစ်၍၊ သူတို့၌အဘယ်သို့ပြုရမည်နည်းဟူမူကား၊ သူတို့ယဇ်ပလ္လင်များကို ဖျက်ရမည်။ ရုပ်တုများကိုဖြိုချရမည်။ အာရှရပင်များကိုခုတ်လှဲရမည်။ ထုသောရုပ်တု ဆင်းတုများကိုမီးရှို့ရမည်။
6 အကြောင်းမူကား၊ သင်သည် သင်၏ဘုရားသခင် ထာဝရဘုရားအဘို့ သန့်ရှင်းသောအမျိုးဖြစ်၏။ မြေကြီးပေါ်မှာရှိသမျှသောလူမျိုးထက် သင်၏ဘုရား သခင် ထာဝရဘုရားပိုင်ထိုက်သောအမျိုးဖြစ်စေခြင်းငှာ သင့်ကိုရွေးချယ်တော်မူပြီ။