1 O a‘u lava o Paulo o lē fa‘amaulalo pe a a‘u i ai ‘iā te ‘outou, ‘ae fa‘amalosi pe a ‘ou lē i ai ‘iā te ‘outou, ‘ou te ‘ai‘oi atu ‘iā te ‘outou ‘ona o le agamalū ma le alofa o Keriso;
2 ‘ou te ole atu lava ‘ina ne‘i ‘ou fai fa‘amalosi pe a ‘ou i ai ‘iā te ‘outou, ma le fa‘amalosi ‘ou te manatu e matuā fa‘amalosi atu ai i nisi, o ē mānatunatu ‘iā te i matou peiseaī ‘ua matou sāvavali fa‘aletino.
3 Auā e ui lava ‘ina matou sāvavali i le tino, matou te lē tau fa‘aletino;
4 auā o ‘au‘upega a lo matou nei tau‘a e lē fa‘aletino ia, ‘ae fa‘amalolosia e le Atua e lepetia ai ‘olo;
5 o lo‘o lepeti i lalo māsalosaloga, ma mea maualuluga uma ‘ua fa‘asiasia i le iloa o le Atua, o lo‘o fa‘ato‘ilaloina manatu uma ‘ia ‘ana‘ana ‘iā Keriso.
6 O lo‘o nofo sauni fo‘i i matou e taui atu i lē lē ‘ana‘ana uma, pe a fa‘a‘ato‘atoaina lo ‘outou ‘ana‘ana.
7 Tou te va‘ava‘ai ‘ea i la le tino? ‘Āfai e tāofi se tasi o ia o le sa Kerisō, se‘i toe manatu ifo ia, e pei o ia o le sa Kerisō, e fa‘apea fo‘i i matou o sa Kerisō.
8 Auā e ui lava ‘ina fa‘atele ane teisi lo‘u mitamita i le pule o ‘iā te i matou, ‘ua foa‘iina mai ‘iā te i matou o le Ali‘i e ati a‘e, ‘ae lē ‘ina ‘ia lepetia ‘outou, ‘ou te lē mā ai;
9 ‘ina ne‘i peiseaī ‘ou te fa‘amata‘u ‘iā te ‘outou i tusi.
10 Auā ‘ua fa‘apea a nisi, “O ana tusi e mamafa ma malolosi ia; a o lona tino pe a nofo mai e vaivai lea, ma lana ‘upu e fa‘atauva‘a lea.”
11 ‘Ia manatua lenei mea e lea tagata, o le mea ‘ua matou tusi atu ai ‘ina o matou le i ai, o lea lava le mea matou te faia a o matou i ai.
12 Auā matou te lē fa‘amalosi ‘ina fa‘atasia, pe fa‘atusatusaina ai matou ma nisi, o ē vivi‘i i latou ‘iā te i latou; a o i latou, o lo‘o fefuafuaa‘i i latou ‘iā te i latou, ma fēfa‘atusatusa‘i i latou ‘iā te i latou, e lē popoto i latou.
13 ‘Ae matou te lē mitamita i mea ‘ua lē fuatia mai, ‘ae peita‘i e tusa i le fua o le matagaluega ‘ua tofia mai e le Atua ‘iā te i matou o le fua e o‘o atu lava ‘iā te ‘outou.
14 Auā matou te lē fua fa‘asili, peiseaī ‘ua matou lē o‘o atu ‘iā te ‘outou, a ‘ua muamua matou i le o‘o atu lava ‘iā te ‘outou i le tala lelei a Keriso.
15 O lo‘o matou lē mitamita i mea ‘ua lē fuatia mai, o galuega ia a isi tagata; a o lo‘o fa‘amoemoe i matou e fa‘ateleina ‘iā te ‘outou la matou matagaluega, e atili ai pe a tupu lo ‘outou fa‘atuatua,
16 matou te folafola atu ai le tala lelei i nu‘u i tala atu o ‘outou, o lo‘o lē mitamita i le matagaluega a le tasi tagata ‘ua uma ‘ona saunia.
17 “A o lē mitamita, ‘ia mitamita o ia i le Ali‘i.”
18 Auā e lē talia o lē ‘ua vivi‘i o ia ‘iā te ia lava, a o lē ‘ua vi‘ia e le Ali‘i.#