1 O lo‘u mana‘o ‘ia ‘outou ‘onosa‘i teisi ‘iā te a‘u i lo‘u valea; ‘ia ‘onosa‘i mai lava ‘iā te a‘u.
2 Auā ‘ua ‘ou mā‘elegā alofa ‘iā te ‘outou i le mā‘elegā e tatau i le Atua; auā ‘ua uma ‘ona ‘ou faufautane ‘iā te ‘outou i le tane e to‘atasi, ‘ina ‘ia ‘ou momoli ‘iā te ‘outou o le taupou fa‘amaoni ‘iā Keriso.
3 ‘Ae ‘ou te fefe, ‘ina ne‘i pei ‘ona fa‘asesēina o Eva e le gata i lana togafiti, e fa‘apea ‘ona fa‘aleagaina o ‘outou manatu ‘ina ‘ia lē tonu ‘iā Keriso.
4 Auā ‘āfai e tala‘iina atu e sē alu atu, se Iesu e ‘ese i lē na matou tala‘iina atu, pe talia e ‘outou se agaga e ‘ese i lē ‘ua ‘outou talia, po o se tala lelei e ‘ese i lē ‘ua ‘outou talia, ‘ua vave loa ‘ona ‘outou gaua‘i i ai.
5 Auā o lo‘u lea manatu, e leai se mea e tasi ‘ou te itiiti ai i ‘aposetolo silisili.
6 ‘Āfai fo‘i ‘ou te valea i le ‘upu, ‘ou te lē valea i le iloa; o lea fo‘i le mea ‘ua uma ‘ona matou fa‘ailoa atu ai ‘iā te ‘outou i ala uma, i mea uma lava.
7 ‘Ua ‘ou faia ‘ea se agasala, ‘ina ‘ua fa‘amaulaloina a‘u e a‘u, ‘ina ‘ia fa‘amaualulugaina ‘outou, auā na ‘ou tala‘iina atu ‘iā te ‘outou le tala lelei a le Atua ma le lē tauia mai?
8 Na ‘ou faoa mea a isi ekalesia i le fa‘a‘oloaga na ‘ou talia, ‘ina ‘ia ‘au‘auna atu ai ‘iā te ‘outou.
9 Na ‘ou i ai ‘iā te ‘outou ma le mativa, sa lē tigāina se tasi ‘iā te a‘u; auā o mea na mativa ai a‘u, na fa‘alavaina mai ia e le ‘au uso na ō mai mai Maketonia; na ‘ou fa‘aeteete ‘ina ne‘i tigāina ‘outou ‘iā te a‘u i se mea e tasi, ‘ou te fa‘aeteete fo‘i i ai.
10 O lo‘o ‘iā te a‘u le ‘upu moni a Keriso, e lē vaoia a‘u i lenei mitamita i nu‘u o Akaia.
11 ‘Ina ‘ua a ‘ea? ‘Ina ‘ua ‘ou lē alofa atu ‘ea ‘iā te ‘outou? ‘Ua silafia le Atua.
12 A o le mea ‘ua ‘ou faia, ‘ou te faia pea lava lea, ‘ina ‘ia lē maua ‘iā te a‘u se mea e fa‘aaogā e i latou o ē ‘ua fia fa‘apea atu ‘ua latou uiga tutusa ma i matou i le galuega ‘ua latou mitamita ai.
13 Auā o i latou, o ‘aposetolo pepelo i latou, o le ‘au faigaluega ‘ole‘ole, ‘ua liua i latou e i latou ma ‘aposetolo a Keriso.
14 E lē se mea fo‘i lea e ofo ai, auā o Satani lava, ‘ua liua o ia e ia ma agelu o le malamalama.
15 O lenei, e lē se mea tele pe a liua ana ‘au‘auna peiseaī o ‘au‘auna a le amiotonu i latou; o lo latou i‘uga e tusa ma a latou galuega.
16 O lenei fo‘i, ‘ou te fai atu, ‘aua ne‘i manatu mai se tasi ‘iā te a‘u, o le valea a‘u; ‘ae ‘āfai o lea, ia talia mai a‘u e ‘outou pei se vale, se‘ia ‘ou mitamita ane teisi.
17 O la‘u e fai atu ai nei, ‘ou te lē fai atu i la le Ali‘i, ‘ae peiseaī o fa‘avalea i lenei fa‘amalosi i le mitamita.
18 ‘Ona ‘ua mitamita nisi e to‘atele i la le tino, ‘ou te mitamita ai fo‘i.
19 Auā ‘ua ‘outou ‘onosa‘i ma le fiafia i ē vālelea, o lo‘o popoto ‘outou.
20 Auā ‘ua ‘outou ‘onosa‘i pe a fa‘apologa mai se tasi ‘iā te ‘outou, pe a ‘aina ‘outou e se tasi, pe a ‘ave e se tasi a ‘outou mea, pe a fa‘amaualuga se tasi, pe a pō atu se tasi i o ‘outou mata.
21 Pei ‘ou te mā e fai atu, ‘ua lē lava lo matou malosi matou te fai ai fa‘apea.‘Ai se mea e fa‘amalosi ai se tasi (‘ou te fai atu ma le valea) ‘ou te fa‘amalosi ai fo‘i.
22 O Eperu ‘ea i latou? O a‘u fo‘i lea. O Isaraelu ‘ea i latou? O a‘u fo‘i lea. O fānau a Aperaamo ‘ea i latou? O a‘u fo‘i lea.
23 O ‘au‘auna ‘ea i latou a Keriso? (‘Ou te tautala pei se vale,) ‘Ua sili a‘u; ‘ua sili i galuega, ‘ua matuā tele i sasaina, ‘ua tele ‘ona tu‘uina i fale puipui, ‘ua atu lasi i oti.
24 ‘Ua atu lima ‘ona sasaina o a‘u e Iutaia, e ta‘itolugafulu ma le iva ‘ou tā.
25 ‘Ua atu tolu ‘ona sasaina o a‘u i la‘au, ‘ua tasi le fetogia o a‘u i ma‘a, ‘ua atu tolu ‘ona malaia o folauga sa ‘ou i ai, ‘ua ‘atoa le pō ma le ao sa ‘ou i le vasa;
26 ‘ua atu lasi a‘u malaga se manū a‘u leaga i vaitafe, se manū a‘u leaga i ē fao mea, sē manū a‘u leaga i tagata o lo‘u lava nu‘u, se manū a‘u leaga i tagata o nu‘u ‘ese, se manū a‘u leaga i le ‘a‘ai, se manū a‘u leaga i le vao, se manū a‘u leaga i le vasa, se manū a‘u leaga i uso pepelo.
27 Na ‘ou i le galuega mamafa ma le tigā, o le mataala so‘o, o le fia ‘ai ma le fia inu; o le anapogi so‘o, o le ma‘alili ma le lē lavalavā.
28 Tu‘u ia o isi mea, a o le mea e mafatia ai a‘u i aso fai so‘o, o le popole lea ‘ona o ekalesia uma.
29 Po o ai lē ‘ua vaivai, ‘ou te lē vaivai ai? Po o ai lē ‘ua tausuai, ‘ou te lē tigā ai?
30 ‘Āfai e tatau ‘ina ‘ia ‘ou mitamita ‘ou te mitamita i mea ‘ou te vaivai ai.
31 O le Atua o le Tamā lava o lo tatou Ali‘i o Iesu Keriso, o lē vi‘ia e fa‘avavau lava ‘ua silafia e ia ‘ou te lē pepelo lava.
32 O i Tamaseko, o le kovana ma ia Areta le tupu, na ia lamalama i le ‘a‘ai o Tamaseko ‘ua fia pu‘e ‘iā te a‘u;
33 sa tu‘utu‘uina ifo a‘u i le ‘ato i le fa‘amalama i le pā, na ‘ou sao ai i ona lima.#