1 Auā ‘ua matou iloa ‘āfai e lepetia lo matou fale apitaga fa‘alelalolagi, ‘ua ‘iā te i matou le fale mai le Atua, o le fale e le‘i faia e lima, e fa‘avavau i le lagi.
2 Auā fo‘i ‘ua matou feoi i lenei fale, o lo‘o naunau tele i le fia fa‘a‘ofuina i lo matou fale mai le lagi;
3 ‘āfai fo‘i o fa‘a‘ofuina i matou, e lē maua i matou e lē lavalavā.
4 Auā o i matou o i lenei fale apitaga, ‘ua feoi i matou o lo‘o mafatia; e lē ‘ona ‘ua matou loto ‘ina ‘ia tō‘eseina ‘ofu, a ‘ia fa‘a‘ofuina, ‘ina ‘ia tofatumoanaina le i‘u vale i le ola.
5 O ia fo‘i ‘ua saunia i matou mo lenei lava mea, o le Atua ia, o ia fo‘i ‘ua foa‘i mai le fa‘amaoni o le Agaga ‘iā te i matou.
6 O lenei, ‘ua matou loto tetele e lē aunoa, ‘ona ‘ua iloa, a o matou o nonofo i le tino, ‘ua nofo ‘ese‘ese i matou ma le Ali‘i;
7 auā o le fa‘atuatua ‘ua matou sāvavali ai, ‘ae lē o le tino mai o mea;
8 ‘ua matou loto tetele ma ‘ua sili lo matou mana‘o ia ō ‘ese i matou i le tino, a ‘ia nonofo i matou ma le Ali‘i.
9 O lenei, pe matou te nonofo ai, pe matou te lē nonofo ai, ‘ua matou loto malosi ‘ina ‘ia fiafia mai o ia ‘iā te i matou.
10 Auā tatou te tutū atu uma lava i luma o le nofoa fa‘amasino o Keriso, ‘ina ‘ia ta‘itasi ma talia le mea e tatau ai e tusa ma lana amio na faia i le tino, pe lelei pe leaga.
11 O lenei, ‘ona ‘ua matou iloa le mata‘u i le Ali‘i, ‘ua matou pulunaunau atu ai i tagata; ‘ua silafia o matou olaga e le Atua, o la‘u tāofi fo‘i ‘ua iloa i matou i o ‘outou loto fuatia ifo.
12 Auā e lē toe ta‘uleleia matou e i matou ‘iā te ‘outou, a ‘ua matou avatu ‘iā te ‘outou se mea tou te mitamita ai ‘ona o i matou, ‘ina ‘ia, ‘iā te ‘outou se mea e fai atu ai i ē o mitamita i mea e va‘aia, ‘ae lē o le loto.
13 Auā pe ‘āfai ‘ua matou vālea, ‘ona o le Atua lea; pe ‘āfai ‘ua matou atamamai, ‘ona o ‘outou lea.
14 Auā ‘ua pulunaunauina i matou i le alofa o Keriso; o lo‘o manatu fa‘apea i matou, na maliu le to‘atasi mo tagata uma, o lea ‘ua oti ai tagata uma;
15 na maliu fo‘i o ia ‘ona o tagata uma, ‘ina ‘ia lē usiusita‘i pea o ē ola ‘iā te i latou lava, a o ia o lē na maliu ma toetū mai mo i latou.
16 O lenei, e amata i nei ona pō ‘ona matou lē toe iloa se tasi i la le tino; e ui lava ‘ina iloa e i matou o Keriso i la le tino, a o lenei, matou te lē toe iloa.
17 O lenei, ‘āfai o ‘iā Keriso se tasi, o le tagata fou ia; ‘ua mavae le ola tuai, fa‘auta, ‘ua o‘o mai le ola fou.
18 O mea uma fo‘i mai le Atua ia, ‘ua uma ‘ona fa‘aleleia e ia o i tatou ‘iā te ia e ala ‘iā Iesu Keriso, ‘ua tu‘uina mai fo‘i ‘iā te i matou le galuega o le leleiga.
19 O lenei, sa ‘iā Keriso le Atua, ‘ua fa‘aleleia e ia le lalolagi ‘iā te ia, ‘ua lē ta‘ua a latou agasala ‘iā te i latou; ‘ua ia tu‘uina mai fo‘i ‘iā te i matou le ‘upu o le leleiga.
20 O lenei, o sāvali i matou a Keriso, peiseaī ‘ua ‘ai‘oi mai le Atua ‘iā te ‘outou e ala ‘iā i matou; matou te ole atu, o sui i matou o Keriso, ‘ia ‘outou lelei ma le Atua.
21 Auā o lē na lē iloa le agasala, na faia o ia e le Atua ma agasala, mo i tatou; ‘ina ‘ia ‘avea i tatou ma amiotonu a le Atua ‘iā te ia.#