1 O le mea lea e tatau ‘ona atili ai ‘ona tatou naunau i mea ‘ua tatou fa‘alogologo i ai, ne‘i te‘a ‘ese i tatou ma ia mea.
2 Auā ‘āfai na fa‘amauina le ‘upu na molia mai e agelu, ta‘itasi fo‘i soli tulafono ma fa‘alogogatā ma o‘o i ai le taui e tusa ai.
3 Pe sao fa‘apefea i tatou pe a fa‘atamala i le fa‘aolataga e matuā tele? Sa mua‘i fetalai mai le Ali‘i, ‘ona fa‘amaonia mai lea ‘iā i tatou e i latou sa fa‘alogo ‘iā te ia.
4 ‘Ua molimau mai fo‘i le Atua fa‘atasi ma i latou i fa‘ailoga ma vāvega, i mea mamana ‘ese‘ese fo‘i, ma mea alofa mai le Agaga Pa‘ia, e tusa ma lona lava finagalo.
5 Auā ‘ua lē tu‘uina atu e ia i agelu e pule i le olaga atalī, o lo‘o matou o tautala nei i ai.
6 ‘Ua molitino mai o le tasi i le tasi ‘upu, ‘ua fa‘apea mai,“Se a ‘ea le tagata ‘ua e manatu mai ai ‘iā te ia,po o le atali‘i o le tagata na e asiasi mai ai ‘iā te ia?
7 ‘Ua e fa‘amaulalo ane teisi o ia i agelu;‘ua e fa‘apale ‘iā te ia i le mamalu ma le vi‘iga,
8 ‘ua e tu‘uina fo‘i o mea, uma lava i lalo o ona vae.”O lenei, ‘ina ‘ua tu‘uina o mea uma i lalo ‘iā te ia, ‘ua lē tu‘ua e ia se mea e tasi e le‘i tu‘uina i lalo ‘iā te ia, a ‘ua lē va‘aia nei e i tatou o mea uma lava ‘ona tu‘uina i lalo ‘iā te ia.
9 A ‘ua tatou iloa o Iesu o lē na fa‘amaulaloina teisi i agelu, ‘ua fa‘apaleina i le mamalu ma le vi‘iga, ‘ona o le tigā o le oti, ‘ina ‘ia o‘o ‘iā te ia le oti ‘ona o tagata uma i le alofa tunoa o le Atua.
10 Auā o lē na fai mea uma lava mōna, sa na faia fo‘i mea uma lava e ia, na tatau ‘iā te ia i lona ta‘ita‘iina o atali‘i e to‘atele i le manuia, ‘ona fa‘a‘ato‘atoaina i tigā le ta‘imua o lo latou fa‘aolataga.
11 Auā o lē na te fa‘apa‘iaina mai ‘atoa ma i latou uma ē ‘ua fa‘apa‘iaina, e tasi lo latou tupuga; o le mea lea e lē mā ai o ia ‘ia ta‘ua i latou o ona uso.
12 O lo‘o fa‘apea mai,“‘Ou te ta‘u atu lou suafa i o‘u uso;‘ou te pese atu vi‘iga ‘iā te oe i totonu o le fa‘alapotopotoga.”
13 ‘Ua toe fa‘apea mai, “‘Ou te fa‘atuatua ‘iā te ia.” I le ma lea, “Fa‘auta mai, o a‘u nei ma le fānau ‘ua foa‘iina mai e le Atua ‘iā te a‘u.”
14 O lenei, ‘ina ‘ua i ai i le fānau le tino tagata ola, na fa‘apea fo‘i ‘ona ‘ua i ai ‘iā te ia, ‘ina ‘ia fa‘aumatia e ia i lona maliu o lē ‘ua i ai le mālō e oti ai, o le tiapolo lea,
15 ma tu‘usaunoaina ai i latou uma o ē na fa‘apologaina i o latou olaga uma ‘ona o le mata‘u i le oti.
16 Auā e moni, e lē fesoasoani o ia i agelu, peita‘i ane o le fānau a Aperaamo o lo‘o fesoasoani o ia i ai.
17 O le mea lea ‘ua tatau ai ‘ina ‘ia ‘avea o ia ‘ia fa‘apei o ona uso i mea uma lava ‘ina ‘ia faia o ia ma ositaulaga sili e alofa ma fa‘amaoni i mea a le Atua, ‘ina ‘ia faia e ia se togiola mo agasala a le nu‘u.
18 Auā na tigāina o ia ‘ina o fa‘aosoosoina, o le mea, lea ‘ua mafai ai e ia ‘ona fesoasoani i ē ‘ua fa‘aosoosoina.