1 Auā o lenei “Mekisateko, o le tupu o Salema, o le ositaulaga a le Atua silisili ‘ese, o lē na fetaia‘i ma Aperaamo ‘ina o fo‘i mai o ia mai le fasiga o tupu, ma na fa‘amanuia atu ‘iā te ia;”
2 sa foa‘i atu fo‘i e Aperaamo ‘iā te ia mea e “sefulua‘i” o mea uma. O le uiga muamua o lona igoa, “o le tupu o le amiotonu,” i le ma le “tupu o Salema o le tupu o le filemū lea.”
3 E leai sona tamā, e leai sona tinā, e leai ni ona tupuga, e leai se amataga i ona aso, po o se gata‘aga i lona soifua, a ‘ua fa‘apei o le Alo o le Atua, ‘ua tumau o ia o le ositaulaga e fa‘avavau.
4 O lenei, ‘inā mānatunatu ia i le sili o lenā ali‘i, sa foa‘iina atu ‘iā te ia e lea tupuga o Aperaamo o mea e sefulua‘i mea na faoa.
5 O i latou fo‘i o le fānauga a Levi, o ē ‘ua fai le faiva o ositaulaga, ‘ua poloa‘iina i latou i le tulafono ‘ia fai mā latou mea e sefulua‘i mea a le nu‘u, o latou uso lava ia, a o i latou fo‘i na tutupu mai le tino o Aperaamo.
6 A o ia e lē mai ‘iā i latou lona tupuga, na ia maua mea e sefulua‘i mea mai ‘iā Aperaamo, ma na fa‘amanuia atu i lē na i ai ‘upu na folafolaina.
7 ‘Ua lauiloa fo‘i, e fa‘amanuia lē itiiti e lē sili.
8 O i lenei mea fo‘i o lo‘o talia mea e sefulua‘i mea o tagata e oti; peita‘i o i lelā mea e talia e lē ‘ua ta‘ua mai lava o lo‘o ola ia.
9 ‘Āfai fo‘i e tusa ‘ona ‘ou fa‘apea atu, o Levi o lē talia o mea e sefulua‘i mea, na ia avatua mea e sefulua‘i mea e ala ‘iā Aperaamo.
10 Auā sa i le tino o lona tamā o ia ‘ina o fa‘afetaia‘i Mekisateko ‘iā te ia.
11 O lenei, ‘āfai na fa‘a‘ato‘atoaina o mea i le faiva o ositaulaga fa‘a-Levi, auā na maua e le nu‘u le tulafono fa‘atasi ma lea, pe se a le toe aogā ‘ona fa‘atūina o le tasi ositaulaga, e uiga fa‘atasi ma Mekisateko ‘ae lē ta‘ua i le uiga fa‘atasi ma Arona.?
12 Auā ‘āfai ‘ua liua le faiva o ositaulaga, e ao lava ‘ina liua le tulafono.
13 Auā o ia ‘ua ta‘ua mai i ai o nei mea, o so le tasi itū‘āiga ia, e leai so latou na ‘au‘auna i le fatafaitaulaga;
14 auā ‘ua iloa tino lava na tupu mai ‘iā Iuta lo tatou Ali‘i, o le itū‘āiga lea na lē ta‘uina mai ai e Mose se ‘upu i le faiva o ositaulaga.
15 ‘Ua atili ai fo‘i ‘ona iloa tino, pe ‘āfai ‘ua fa‘atūina le tasi ositaulaga pei o Mekisateko.
16 E lē o se tulafono o se poloa‘iga fa‘aletino ‘ua fai ai o ia, a o le mana o le ola e le uma.
17 Auā o lo‘o molimau mai o ia, “O le ositaulaga oe e fa‘avavau, e uiga fa‘atasi ma Mekisateko.”
18 Auā fo‘i na tatalaina le poloa‘iga na muamua, ‘ona o lona vaivai ma lona lē aogā.
19 Auā na lē fa‘a‘ato‘atoaina se mea e tasi i le tulafono, a ‘ua sui mai le fa‘amoemoega e sili ‘ona lelei, ‘ua tatou fa‘alatalata atu ai i le Atua.
20 Pei ‘ona sili fo‘i o lē ‘ua i ai le tautoga;
21 auā ‘ua faia i latou ma ositaulaga ‘ae leai se tautō; peita‘i ane o ia na faia ma le tautō e lē na fetalai atu ‘iā te ia. “‘Ua tautō le Ali‘i;e lē salamō ai lava ia.‘O le ositaulaga oe e fa‘avavau.’”
22 O fa‘apea fo‘i ‘ona faia o Iesu na fa‘amaoniga o le feagaiga e sili ‘ona lelei.
23 E to‘atele fo‘i i latou sa fai ma ositaulaga, auā na lē mafai ‘ona tumau o i latou ‘ona o le oti.
24 Peita‘i o ia ‘ua tumau e fa‘avavau, o le mea lea ‘ua i ai ‘iā te ia le faiva o ositaulaga e tumau pea.
25 O le mea fo‘i lea e mafai ai ‘iā te ia ‘ona fa‘aola pea lava, i ē fa‘alatalata atu i le Atua ‘ona o ia, auā o lo‘o soifua pea ia e fautua mo i latou.
26 Auā e tatau ‘ona ‘ia ‘iā i tatou o se ositaulaga sili fa‘apenā, e pa‘ia, e leai sona leaga, e lē ponā, e taumamao ma ē agasala, e silisili fo‘i ia i luga o lagi.
27 E lē aogā ‘iā te ia i aso fai so‘o, pei o ia ositaulaga, e muamua ‘ona fai o taulaga mo ana lava agasala, ‘ona fai ai lea mo agasala a le nu‘u; auā ‘ua atu tasi lava ‘ona faia e ia o lea mea ‘ina ‘ua avatua o ia e ia ma taulaga.
28 Auā o le tulafono e fa‘atūina ai tagata o i ai le vaivai, e fai ma ositaulaga sili; a o le ‘upu o le tautō na mulimuli i le tulafono, ‘ua fa‘atūina ai le Alo ‘ua fa‘a‘ato‘atoaina e fa‘avavau.