1 O lenei, ‘ia tatou fefefe, ‘ina ‘ua tu‘uina mai pea o le ‘upu ‘ua folafola mai ‘ia sao atu ai i lona mālōlōga, ne‘i i ai so ‘outou e fa‘alēo‘o atu i ai.
2 Auā fo‘i ‘ua tala‘iina mai i tatou i le tala lelei e pei o i latou; a ‘ua lē aogā le ‘upu na latou fa‘alogologo i ai, ‘ina ‘ua lē fa‘atatauina ma le fa‘atuatua i ē na fa‘alogologo i ai.
3 Auā tatou te sao atu i le mālōlōga, o i tatou o ē ‘ua fa‘atuatua, pei ‘ona fetalai mai o ia,“Pei ‘ona ‘ou tautō i lo‘u ita,‘Latou te lē sao atu lava i lo‘u mālōlōga.’”O le mālōlōga lava lea i le galuega na faia ‘ina ‘ua uma ‘ona fa‘avaeina o le lalolagi.
4 Auā ‘ua fai mai o ia i le tasi ‘upu e uiga i le aso fitu ‘ua fa‘apea mai, “Na mālōlō fo‘i le Atua i le aso fitu i ana galuega uma.”
5 ‘Ua toe fa‘apea fo‘i i lenei ‘upu, “Latou te lē sao atu lava i lo‘u mālōlōga.”
6 O lenei, ‘ua tu‘uina mai pea ‘ona ‘ia sao atu i ai o isi, mōna ‘ua lē sao atu i ai o ē na mua‘i tala‘iina i ai le tala lelei ‘ona o le fa‘alogogatā.
7 ‘Ona toe tu‘upo ai lea o ia i le tasi aso i lana na fetalai mai e Tavita, “O le aso nei,” ‘ina ‘ua mavae o ia tausaga e tele, pei ‘ona fetalai mai, “O le aso nei ‘āfai tou te fa‘alogo ai i lona si‘ufofoga,‘aua tou te fa‘ama‘a‘a i o ‘outou loto.”
8 Auā ‘ana fa‘ao‘o e Iosua ‘iā i latou i le mālōlōga, po ‘ua lē toe ta‘uina e le Atua o se tasi aso.
9 O lenei, ‘ua tu‘uina mai pea o le mālōlōga fa‘asapati mo tagata o le Atua.
10 Auā o lē ‘ua sao atu i lona mālōlōga, ‘ua mālōlō fo‘i o ia i ana lava galuega, fa‘apei o le Atua i ana lava.
11 O lenei, ‘inā tatou finafinau ia ‘ina ‘ia sao atu i lenā mālōlōga, ne‘i ai se tasi e pa‘ū i lona fa‘aa‘oa‘o i lo latou fa‘alogogatā.
12 Auā o lo‘o ola le afioga a le Atua, o lo‘o matuā galue fo‘i, o lo‘o sili fo‘i lona ma‘ai i pelu uma e fa‘atau ma‘ai itū, o lo‘o vaevae fo‘i e o‘o lava i le vavae‘eseina o le loto ma le agaga, o gaugātino fo‘i ma ‘a‘ano o ivi, o lo‘o fa‘amasino fo‘i i manatu ma filifiliga o le loto.
13 E lē lilo fo‘i se tasi mea na faia i ona luma, a ‘ua ta‘atia fua ‘ina ‘ua aliali mai o mea uma lava i lana silafaga, tatou te ta‘u atu ‘iā te ia a tatou amio.
14 O lenei, ‘ua ia i tatou le ositaulaga silisili, ‘ua afio atu i le lagi, o Iesu le Alo o le Atua, ‘ia tatou tāofi mau ai i la tatou e ta‘utino atu.
15 Auā e lē ‘iā te i tatou se ositaulaga sili e lē mafaia ‘ona tigā alofa fa‘atasi ma i tatou i o tatou vaivai, a ‘ua fa‘aosoosoina o ia i mea uma pei o i tatou, a ‘ua leai se agasala ‘iā te ia.
16 O le mea lea ‘ia tatou fa‘alatalata atu ai ma le loto tele i le nofoāli‘i o le alofa tunoa ‘ina ‘ia alofaina ai o i tatou e ia, maua ai fo‘i le alofa tunoa e fesoasoani mai i ona aso e tatau ai.#