1 O Paulo o le ‘aposetolo, e lē mai tagata, e le‘i tofia fo‘i e se tagata, a o Iesu Keriso, ma le Atua le Tamā, o lē na toe fa‘atūina mai o ia i ē ‘ua oti,
2 ‘atoa ma le ‘au uso uma lava o ē ‘ua ‘iā te a‘u, i ekalesia i Kalatia.
3 ‘Ia ‘iā te ‘outou le alofa tunoa ma le manuia mai le Atua le Tamā, ma lo tatou Ali‘i o Iesu Keriso.
4 O lē na foa‘iina mai o ia e ia ‘ona o a tatou agasala, ‘ina ‘ia lavea‘i mai o ia ‘iā i tatou a‘i le olaga leaga ‘ua i ai nei, e tusa ma le finagalo o le Atua, o lo tatou lava Tamā.
5 ‘Ia ‘iā te ia le vi‘iga e fa‘avavau fa‘avavau lava, Amene.
6 ‘Ua ‘ou ofo ‘ina ‘ua fa‘apea ‘ona vave liliu‘eseina o ‘outou i lē na vala‘auina ‘outou i le alofa tunoa o Keriso, ‘ae fa‘asaga i le tala lelei e ‘ese.
7 E lē se tasi tala lelei fo‘i lea, a ‘ua i ai nisi tagata ‘ua fa‘aatuatuvale ‘iā te ‘outou ma fia fa‘aliliu‘eseina le tala lelei a Keriso.
8 ‘Ae peita‘i e ui lava ‘ina tala‘iina e i matou, po o se agelu mai le lagi, ‘iā te ‘outou se tala lelei e ‘ese i lea na tala‘iina atu ai e i matou ‘iā te ‘outou, ‘ia anatema ia.
9 Pei ‘ona matou mua‘i fai atu, ‘ou te toe fai atu ai nei fo‘i, ‘āfai e tala‘iina atu e se isi ‘iā te ‘outou se tala lelei e ‘ese i lea na ‘outou talia, ‘ia anatema ia.
10 ‘Ou te fa‘amalie ‘ea i ona pō nei i tagata, po o le Atua? ‘Ou te sā‘ili ‘ea ‘ina ‘ia ‘ou fa‘afiafia i tagata? Auā ‘āfai ‘ana ‘ou fa‘afiafia pea i tagata, po ‘ua lē fai a‘u ma ‘au‘auna a Keriso.
11 Le ‘au uso e, ‘ou te fa‘ailoa atu ‘iā te ‘outou, e lē se tala lelei fa‘aletagata sa tala‘iina atu e a‘u.
12 Auā e le‘i maua lea e a‘u mai le tagata, e le‘i a‘oa‘oina ai fo‘i a‘u, ‘ua na o le fa‘aaliga a Iesu Keriso na ‘ou maua ai.
13 Auā ‘ua ‘outou fa‘alogo i la‘u amioga anamua ‘ina ‘ou i le lotu a Iutaia, sa ‘ou matuā sauā lava i le ekalesia a le Atua, ma fa‘ataugā i ai.
14 E sili fo‘i lo‘u alualu i le matā‘upu fa‘a-Iutaia i nisi e to‘atele o lo‘u nu‘u na matou tupulaga fa‘atasi, i lo‘u matuā naunau i ‘uputu‘u a o‘u tamā.
15 A o le Atua o lē na filifilia a‘u talu ‘ina fānau mai o a‘u ma vala‘auina a‘u i lona alofa tunoa,
16 na finagalo fo‘i o ia, e fa‘aali mai lona Alo i totonu ‘iā te a‘u, ‘ina ‘ia ‘ou folafolaina atu i nu‘u ‘ese le tala lelei ‘iā te ia, ‘ona ‘ou lē filifili lea ma tagata.
17 ‘Ou te le‘i alu a‘e fo‘i i Ierusalema i ē na mua‘i ‘aposetolo ‘iā te a‘u, ‘ae peita‘i na ‘ou alu i Arapi, ‘ona ‘ou toe fo‘i lea i Tamaseko.
18 Na mavae tausaga e tolu, ‘ona ‘ou alu a‘e lea i Ierusalema ‘ina ‘ia ma feiloa‘i ma Kefa, ‘ua pō sefulu ma le lima o ma nonofo ai;
19 ‘ae ma te le‘i feiloa‘i ma se tasi o le ‘au ‘aposetolo, ‘ua nā o Iakopo le uso o le Ali‘i.
20 O mea fo‘i ‘ou te tusi atu ai nei ‘iā te ‘outou, fa‘auta mai ia, ‘ou te fai atu i luma o le Atua, ‘ou te lē pepelo lava.
21 Mulimuli ane ‘ona ‘ou alu atu lea i nu‘u o Suria ma Kilikia;
22 sa lē iloa o‘u mata e ekalesia a Keriso i Iutaia;
23 ‘ua nā ‘ona latou fa‘alogo, “O lē na fa‘asauā anamua ‘iā te i tatou, o lo‘o folafola atu e ia i nei ona pō le tala lelei o le fa‘atuatua sa na fa‘ataugāina anamua”
24 ‘Ona latou vivi‘i ai lea i le Atua ‘ona o a‘u.