1 Mulimuli ane, ‘ua mavae tausaga e sefulu ma le fa, ‘ona mā toe ō a‘e lea i Ierusalema, o i mā‘ua ma Panapa, ‘ua matou ō fo‘i ma Tito.
2 Na ‘ou alu a‘e e tusa ma le fa‘aaliga, ma a‘u fa‘ailoa atu ‘iā te i latou le tala lelei ‘ou te tala‘iina atu i nu‘u ‘ese, a ‘ua fai lemū atu i ē ‘ua ta‘ua, ‘ina ne‘i lē aogā la‘u momo‘e nei, po o le momo‘e ‘ua mavae.
3 ‘Ae o‘o lava ‘iā Tito na ma fa‘atasi ma a‘u, o le Eleni fo‘i o ia, e le‘i tauānauina o ia ‘ia peritomeina.
4 ‘Ae peita‘i ‘ona o uso pepelo ē na fa‘aofia fa‘aleiloga o tagata ia, na ō ane fa‘aleiloga e tilotilo i lo tatou sa‘olotoga ‘ua ‘iā te i tatou ia Keriso Iesu, ‘ina ‘ia latou fa‘apologaina i tatou.
5 Sa matou lē gaua‘i ma ‘ua lē usiusita‘i ‘iā te i latou i sina itū aso, ‘ina ‘ia tumau ‘iā te ‘outou le tonu o le tala lelei.
6 O i latou fo‘i o ē ‘ua ta‘ua, (pe na fa‘apefea lo latou tulaga, e lē sa‘u mea lea, e lē fa‘ailogaina fo‘i se tagata e le Atua;) e leai lava se mea na fa‘aopoopo mai ‘iā te a‘u e i latou ‘ua ta‘ua;
7 ‘ae lē na o lea, a ‘ua latou iloa ‘ua tu‘uina mai ‘iā te a‘u le tala lelei mo ē le peritomeina, pei ‘ona tu‘uina ‘iā Peteru mo ē peritomeina,
8 (auā o lē na galue i totonu ‘iā Peteru i le faiva o le ‘aposetolo mo ē peritomeina, o ia lava na galue i totonu ‘iā te a‘u i le faiva o le ‘aposetolo mo nu‘u ‘ese,)
9 na latou iloa fo‘i le alofa tunoa ‘ua foa‘iina mai ‘iā te a‘u, ‘ona latou fetāgofi lea i le lima taumatau o le mafutaga ‘iā te i mā‘ua ma Panapa e Iakopo ma Kefa, ‘atoa ma Ioane, o ē na ta‘upoutuina, ‘ina ‘ia ma ō i nu‘u ‘ese, a o i latou ia o ē ‘ua peritomeina;
10 tau lava ‘ina ‘ia ma manatua o ē matitiva, o le mea fo‘i lea na ‘ou naunau i ai e fai.
11 A ‘ua alu atu Kefa i Anetioka ‘ona ‘ou matuā finau atu lea ‘iā te ia i ona lava luma, auā ‘ua ‘iloga lona sesē.
12 Auā a o le‘i ō mai nisi mai ‘iā Iakopo, ‘ua ‘a‘ai fa‘atasi o ia ma tagata ‘ese; a ‘ua latou o‘o mai, ‘ona ‘alo lea o ia, ma vavae ‘ese o ia, ‘ina ‘ua fefe i le ‘au peritomeina.
13 ‘Ona lē fa‘amaoni lea fa‘atasi ma ia o isi Iutaia uma, ‘ua o‘o ‘ina tōsina o Panapa lava i lo latou lē fa‘amaoni.
14 A ‘ua ‘ou iloa latou te le‘i sāvavali tonu e tusa ma le ‘upu moni a le tala lelei, ‘ona ‘ou fai atu lea ‘iā Kefa i luma o i latou uma, “O oe le Iutaia, ‘āfai ‘e te amio fa‘anu‘u‘ese, ‘ae lē fa‘a-Iutaia, se a le mea ‘ua e tauānau atu ai i nu‘u ‘ese ‘ia latou fa‘a-Iutaia?”
15 O i tatou o Iutaia moni, ‘ae lē ni tagata agasala mai nu‘u ‘ese,
16 ‘ae ui lava i lea, ‘ua tatou iloa e lē ta‘uamiotonuina se tagata i galuega o le tulafono, a o le fa‘atuatua ‘iā Iesu Keriso; o i tatou fo‘i ‘ua tatou fa‘atuatua ‘iā Keriso Iesu, ‘ina ‘ia ta‘uamiotonuina i tatou i le fa‘atuatua ‘iā Keriso, ‘ae lē o galuega o le tulafono; auā e lē ta‘uamiotonuina se tagata e tasi i galuega o le tulafono.
17 ‘Ae ‘āfai o i tatou o manana‘o i le fia ta‘uamiotonuina ‘iā Keriso, ‘ua iloa o tagata agasala i tatou lava, po ‘ua fai ai ‘ea Keriso ma ‘au‘auna a le agasala? ‘Aua ne‘i fa‘apea.
18 Auā pe ‘āfai ‘ou te toe ati a‘e i mea na ‘ou lepetia, ‘ou te fa‘aalitinoina a‘u e a‘u o lē solitulafono a‘u.
19 Auā o a‘u, na ‘ou oti i la le tulafono e ala i le tulafono ‘ina ‘ia ‘ou ola i la le Atua.
20 ‘Ua fa‘asatauroina fa‘atasi i mā‘ua ma Keriso; ‘ou te lē toe ola a‘u, a o Keriso o lo‘o ola i totonu ‘iā te a‘u; o le ola fo‘i ‘ou te ola ai nei i le tino, ‘ou te ola ai lava i le fa‘atuatua i le Alo o le Atua, o lē na alofa mai ‘iā te a‘u, ma foa‘iina mai e ia o ia mo a‘u.
21 ‘Ou te lē fa‘alēaogāina le alofa tunoa o le Atua; auā ‘ana o‘o mai le amiotonu e ala i le tulafono, po ‘ua maliu fua Keriso.