1 Kalatia vālea e, o ai ‘ea na ia pelogia ‘outou, o ē ‘ua tusia i luma o ‘outou lava mata o Iesu Keriso ‘ua fa‘asatauroina?
2 ‘Ua na o le mea nei ‘ou te fia iloa ‘iā te ‘outou, pe na maua e ‘outou le Agaga i galuega o le tulafono, po o le taulogologo atu i le fa‘atuatua?
3 Tou te fa‘apea ‘ea ‘ona vālelea? Na amataina ‘outou i le Agaga, pe fa‘ai‘uina nei ‘ea ‘outou i le tino?
4 Pe na o‘o mai fua ‘iā te ‘outou ia mea e tele lava? pe ‘āfai e moni na o‘o mai fua.?
5 O lē ‘ua avatu ‘iā te ‘outou le Agaga, ma na faia vāvega ‘iā te ‘outou, o galuega ‘ea o le tulafono ‘ua ia fai ai, po o le taulogologo atu i le fa‘atuatua?
6 Fa‘apei o Aperaamo “na fa‘atuatua i le Atua, ‘ona ta‘ua ai lea ‘iā te ia e fai ma amiotonu.”
7 O lenei, ‘ia iloa e ‘outou, o ē fa‘atuatua o atali‘i i latou o Aperaamo.
8 Na iloa fo‘i anamua i le Tusi, o le fa‘atuatua e ta‘uamiotonuina ai nu‘u ‘ese e le Atua, na ia folafolaina ai anamua le tala lelei ‘iā Aperaamo, ‘ua fa‘apea, “E manuia nu‘u uma lava ‘iā te oe.”
9 O lenei, ‘ua manuia ē ‘ua fa‘atuatua fa‘atasi ma Aperaamo lē na fa‘atuatua.
10 Auā o i latou uma o ē fa‘alagolago i galuega o le tulafono, ‘ua fa‘afanoina i latou; auā ‘ua tusia, “‘Ia fa‘afanoina i latou uma o ē lē tumau i mea uma lava ‘ua tusia i le tusi o le tulafono ia faia.”
11 A ‘ua iloa lelei, e lē ta‘uamiotonuina se tasi i luma o le Atua i le tulafono; auā, “E ola le tagata amiotonu i le fa‘atuatua.”
12 ‘Ae lē ‘aiā le fa‘atuatua i le tulafono; auā, “o le tagata na te faia ia mea e ola ai lava ia.”
13 Na fa‘atauina mai i tatou e Keriso a‘i le fa‘afanoga o le tulafono, ‘ina ‘ua fa‘afanoina o ia mo i tatou, auā ‘ua tusia, “E fa‘afanoina i latou uma o ē na fa‘atautauina i le la‘au.”
14 ‘Ina ‘ia o‘o ai i nu‘u ‘ese le manuia o Aperaamo ‘iā Keriso Iesu, ‘ina ‘ia tatou maua i le fa‘atuatua lē na folafolaina o le Agaga lea.
15 Le ‘au uso e, (o ‘upu a tagata ‘ou te fai atu ai nei,) e ui lava na o le feagaiga a le tagata, ‘āfai ‘ua fa‘amauina e leai sē na te tatalaina, pe na te fa‘aopoopoina ai se mea.
16 O folafolaga na fa‘ailoa atu ‘iā Aperaamo, ma so lana fānau; e le‘i fa‘apea mai, “O le fānau, peiseaī e to‘atele,” ‘ae to‘atasi, “O so lau fānau,” o Keriso lava lea.
17 ‘Ia, o la‘u ‘upu lenei; o le feagaiga na fa‘amauina anamua e le Atua, e lē mafai ‘ona tatalaina lea e le tulafono na mulimuli ai i ona tausaga e fa selau ma le tolugafulu, ‘ina ‘ia fa‘alēaogāina ai le mea na folafolaina.
18 Auā ‘āfai ‘ua ala mai le tofi i le tulafono, ‘ua lē ala mai i le ‘upu na folafolaina; ‘ae peita‘i na foa‘ifuaina atu e le Atua ‘iā Aperaamo i le mea na folafolaina.
19 O lenei se a le aogā o le tulafono? Na fa‘aopoopo mai lea ‘ona o solitulafono, ‘ina se‘ia maliu mai le fānau na folafola i ai, sa saunia e agelu na ‘aumaia e le tautu‘u ‘upu.
20 ‘Ae leai se tautu‘u ‘upu pe a na o le to‘atasi, ‘ae to‘atasi le Atua.
21 Lenei fo‘i, e ‘au ‘ese ‘ea le tulafono i mea na folafolaina e le Atua? ‘Aua ne‘i fa‘apea. Auā, ‘āfai ‘ana tu‘uina mai se tulafono e mafai ‘ona fa‘aolaina ai, po ‘ua o‘o mai lava le amiotonu i le tulafono.
22 ‘Ae peita‘i ‘ua punitia e le Tusi mea uma lava i le agasala, ‘ina ‘ia foa‘iina mai i ē fa‘atuatua le mea na folafolaina e maua i le fa‘atuatua ‘iā Iesu Keriso.
23 A o le‘i o‘o mai le fa‘atuatua na tāofia i tatou i le pule a le tulafono, sa punitia ‘ina se‘ia fa‘aalia le fa‘atuatua a o‘o mai.
24 O lenei, ‘ua fai mo tatou ta‘ita‘itama le tulafono, na te ta‘ita‘iina i tatou ‘iā Keriso, ‘ina ‘ia ta‘uamiotonuina i tatou i le fa‘atuatua.
25 A ‘ua o‘o mai le fa‘atuatua, o lenei ‘ua lē toe pule ‘iā te i tatou le ta‘ita‘itama.
26 Auā o atali‘i o le Atua ‘outou uma lava i le fa‘atuatua ‘iā Keriso Iesu.
27 Auā o ‘outou uma lava na papatisoina ‘iā Keriso ‘ua ‘outou ‘o‘ofu ‘iā Keriso;
28 e lē o i ai se Iutaia po o se Eleni, e lē o i ai se pologa po o se sa‘oloto, e lē o i ai se tane po o se fafine; auā ‘ua tasi lava ‘outou uma ‘iā Keriso Iesu.
29 ‘Āfai fo‘i e o Keriso ‘outou, e moni, o le fānau ‘outou a Aperaamo, o suli fo‘i e tusa ma le mea na folafolaina.#