1 O lenei, ‘ou te fai atu, ‘Ua lafoa‘iina ‘ea e le Atua lona lava nu‘u? ‘Aua ne‘i fa‘apea; auā fo‘i i o le Isaraelu a‘u nei, o le fānau a Aperaamo, o le itū‘āiga o Peniamina.
2 E le‘i lafoa‘iina e le Atua lona nu‘u na ia silafia anamua. ‘Ua ‘outou lē iloa ‘ea le mea ‘ua fai mai ai le Tusi i le tala ‘iā Elia? ‘Ina ‘ua momoli atu e ia ‘iā Isaraelu i le Atua, ‘ua fa‘apea atu,
3 “Le Ali‘i e, ‘ua fasiotia e i latou ‘au perofeta, ma ‘ua sōloia ou fatafaitaulaga; na o a‘u lava ‘ua toe, ‘ua latou sā‘ili fo‘i e fasioti ‘iā te a‘u.”
4 A ‘ua fa‘apefea ‘ea le tali mai a le Atua ‘iā te ia? “‘Ua ‘ou fa‘atoe mo‘u e to‘afitugaafe o tagata, o ē ‘ua lē to‘otuli lava ‘iā Paala.”
5 O lenei, e fa‘apea fo‘i i nei ona po, ‘ua i ai ē ‘ua totoe e tusa ma le filifiliga o le alofa tunoa.
6 ‘Āfai fo‘i o le alofa tunoa, ‘ua lē o galuega; ‘ana fa‘apea, po ‘ua lē toe ta‘ualofatunoaina le alofa tunoa.
7 O lenei, pe fa‘apefea ‘ea? E le‘i maua e Isaraelu le mea ‘ua ia sā‘ilia, a ‘ua maua e i latou ‘ua filifilia, a ‘ua fa‘ama‘a‘aina loto o ē ‘ua totoe.
8 Pei ‘ona tusia,“‘Ua tu‘u atu e le Atua ‘iā te i latou le loto moe gase,o mata latou te lē va‘ai ai,ma taliga latou te lē fa‘alogo ai,‘ua o‘o i ona po nei.”
9 ‘Ua fai mai fo‘i Tavita,“‘Ia liua lo latou laulau ma mailei,ma matāsele ma mea e tausuai ai, ia fai fo‘i ma taui ‘iā te i latou.
10 ‘Ia fa‘apouliuligia o latou mata ‘ina ‘ia lē va‘ai,ia fa‘ano‘uno‘u o latou tua e lē aunoa.”
11 O lenei, ‘ou te fai atu, ‘Ua tausuai ‘ea i latou ‘ina ‘ia latou pa‘u‘ū? ‘Aua ne‘i fa‘apea; a o la latou agasala, ‘ua o‘o ai le ola i nu‘u ‘ese, e fa‘atupu ai lo latou losilosi.
12 ‘Ae ‘āfai ‘ua fai la latou agasala ma tamao‘āiga o le lalolagi, ‘āfai fo‘i ‘ua fai le fa‘amativaina o i latou ma tamao‘āiga o nu‘u ‘ese, o le atili ai ‘ea ‘ona fa‘apea o lo latou manuia?
13 Auā ‘ou te fai atu ‘iā te ‘outou o nu‘u ‘ese, auā o a‘u o le ‘aposetolo o nu‘u ‘ese, ‘ou te vivi‘i i lo‘u faiva;
14 pe mafai ‘iā te a‘u ‘ona fa‘atupuina le losilosi i lo‘u ‘āiga, ma ‘ou fa‘aolaina nisi o i latou.
15 Auā ‘āfai ‘ua maua le leleiga e le lalolagi ‘ina ‘ua lafoa‘iina i latou, pe fa‘apefea lo latou ‘amiga? E lē o le ola ‘ea lea nai ē ‘ua oti?
16 ‘Āfai fo‘i e pa‘ia mea fa‘apolopoloina, e fa‘apea fo‘i le paluga uma; a pa‘ia le pogai, e fa‘apea fo‘i ‘ona la.
17 ‘Āfai fo‘i na gaui ‘ese nisi ‘ona la, a o oe o le olive vao, ‘ua fa‘apipi‘iina oe ia fa‘atasi ma i latou ma ‘ua tofu fa‘atasi ma i latou i le pogai ma le sua o le olive,
18 ‘aua ‘e te fa‘asiasia i ‘ona la; ‘āfai fo‘i ‘e te fa‘asiasia, ia ē manatu ‘ua lē ola le pogai ‘iā te oe, a ‘ua e ola i le pogai.
19 ‘Anei ‘e te fa‘apea mai, ‘Ua gaui‘eseina ‘ona la, ‘ina ‘ia fa‘apipi‘iina ai a‘u.
20 Mālie; a ‘ua gaui‘eseina i latou ‘ona o le lē fa‘atuatua, a o lo‘o tumau oe ‘ona o le fa‘atuatua; ‘aua ‘e te fa‘amaualuga, a ‘ia e fefe.
21 Auā ‘āfai ‘ua lē fa‘asaoina e le Atua o la na tupu mai ai, o le a lē fa‘asaoina fo‘i oe.
22 Fa‘auta fo‘i i le agamalū ma le to‘asā o le Atua; o ē na pa‘u‘ū e o‘o ai le to‘asā; ‘ae o‘o ‘iā te oe le agamalū, pe ‘āfai ‘e te tumau pea i lona agamalū; a lē fa‘apea e gaui‘eseina oe.
23 O i latou fo‘i pe ‘āfai e lē tumau pea i le lē fa‘atuatua, e toe fa‘apipi‘iina i latou; auā e mafaia e le Atua ‘ona toe fa‘apipi‘iina i latou.
24 Auā ‘āfai ‘ua sala‘eseina oe nai le olive vao, na e tupu mai ai, ma ‘ua fa‘apipi‘iina oe i le olive lelei, na e lē tupu mai ai, o le a atili ai toe fa‘apipi‘iina gofie o la na tupu mai ai i lo latou lava olive.
25 Auā le ‘au uso e, ‘ou te loto ‘ina ‘ia ‘outou iloa lenei mea lilo, ‘ina ne‘i tou fa‘afiapopoto; ‘ua fa‘ama‘a‘aina loto o isi Isaraelu, se‘ia o‘o ‘ina ulufale mai le ‘ato‘atoa o nu‘u ‘ese;
26 ‘ona fa‘aolaina lea o Isaraelu ‘atoa uma, pei ‘ona tusia,“E maliu mai le Fa‘aola mai Siona,na te fa‘ate‘a‘eseina le amio fa‘alēmata‘u ‘iā Iakopo.”
27 “O la‘u fo‘i lenei feagaiga ma i latou,pe a ‘ave‘eseina e a‘u a latou agasala.”
28 O fili i latou i la le tala lelei, ‘ona o ‘outou; a ‘ua alofaina i latou i la le filifiliga, ‘ona o tupuga.
29 Auā e lē salamō lava le Atua i ana mea e foa‘ifuaina mai ma lana vala‘au.
30 Auā fa‘apei o ‘outou fo‘i, sa ‘outou lē fa‘alogo anamua i le Atua, a o lenei, ‘ua alofaina ‘outou ‘ona ‘ua latou lē fa‘alogo.
31 E fa‘apea fo‘i i latou ‘ua latou lē fa‘alogo i nei ona po, ‘ina ‘ia alofaina i latou fo‘i ‘ona o le alofaina o ‘outou.
32 Auā ‘ua punitia e le Atua tagata uma lava i le lē fa‘alogo, ‘ina ‘ia alofaina e ia tagata uma lava.
33 Auē! le loloto o le tamao‘āiga o le poto ‘atoa ma le silafaga a le Atua. E lē masu‘esu‘eina ana fa‘amasinoga. E lē mafai fo‘i ‘ona iloa ona ala.
34 “Auā o ai ‘ea se ‘ua iloa le finagalo o le Ali‘i?”Po o ai fo‘i se ‘ua pulega fa‘atasi ma ia?
35 “Po o ai sē ‘ua mua‘i avatua ni mea ‘iā te ia,a o tauia mai ai ‘iā te ia?”
36 Auā ‘ua fua mai ‘iā te ia, ma ‘ua faia e ia, e i‘u atu fo‘i ‘iā te ia mea uma; ‘ia ‘iā te ia le vi‘iga e fa‘avavau lava. Amene.