1 O le mea lea ‘ua e lē mautali ai oe le tagata o lē fa‘amasino atu, auā o lou fa‘amasino atu i se tasi, ‘ua e fa‘amasino ai oe e oe; auā e o‘o le fa‘amasino atu, ‘ua e faia ia lava mea.
2 ‘Ua tatou iloa fo‘i, e tatau lava ma le ‘upu moni le fa‘amasinoga a le Atua i ē fai mea fa‘apenā.
3 Le tagata e, o lē fa‘asalaina atu i ē fai mea fa‘apenā, a ‘ua e faia ia lava mea, o lou lea manatu ‘ea ‘e te sao lava oe i le fa‘asala a le Atua?
4 po ‘ua fa‘atauva‘a ‘ea ‘iā te oe le faula‘i o lona agamalū, ma lona fa‘apalepale, ma lona ‘onosa‘i, o lo‘o e lē iloa e ta‘ita‘iina oe e le agamalū o le Atua i le salamō?
5 ‘Ae peita‘i o lou loto ma‘a‘a ma le lē salamō ‘e te fa‘aputu ai ‘ea mo oe le to‘asā i le aso o le to‘asā ma le fa‘aaliga o le fa‘amasinoga tonu a le Atua,
6 O lē na te tu‘uina atu le taui ta‘itasi i tagata e tusa ma a latou galuega?
7 E tu‘uina atu fo‘i le ola e fa‘avavau i ē tumau pea i galuega lelei, ‘ua latou sā‘ili ai le vi‘iga ma le mamalu, ma le lē i‘u vale;
8 a o lē to‘atama‘i ma le to‘asā i ē fīnau vale, ma ē lē gaua‘i i le ‘upu moni, ‘ae gaua‘i i leaga;
9 o le puapuagā ma le atuatuvale i tagata uma lava o ē fai amio leaga, e muamua le Iutaia, ‘atoa ma le Eleni;
10 a o le vi‘iga ma le mamalu ma le manuia ‘iā te i latou uma o ē fai amio lelei; o muamua le Iutaia, ‘atoa ma le Eleni.
11 Auā e lē fa‘ailogaina e le Atua ni tagata.
12 Auā ‘atoa uma ē ‘ua agasala e lē o i ai le tulafono, e fano i latou ‘ua lē o i ai le tulafono; ‘atoa uma fo‘i ē ‘ua agasala ‘ua i ai le tulafono, e fa‘amasinoina i latou i le tulafono;
13 auā e lē ta‘uamiotonuina i luma o le Atua ē ‘ua fa‘alogologo atu i le tulafono, ‘ae peita‘i o ē ‘ana‘ana i le tulafono, e ta‘uamiotonuina i latou.
14 Auā pe a fai fua e nu‘u ‘ese e lē o i ai le tulafono o mea e tusa ma le tulafono, e ui ‘ina lē o i ai le tulafono ‘ua ‘avea i latou ma tulafono ‘iā te i latou;
15 o i latou ia ‘ua iloa mai ai le galuega o le tulafono ‘ua tusia i o latou loto, e ō fa‘atasi ai fo‘i o latou loto fuatia ifo, o lo‘o fefa‘aleagaa‘i fo‘i, pe fefa‘atonua‘i o latou manatu.
16 ‘Ae fa‘asalaina i latou i le aso e fa‘amasinoina ai e le Atua e Iesu Keriso mea lilo a tagata, e tusa ma la‘u tala lelei.
17 Fa‘auta, ‘ua igoa oe o le Iutaia, o lo‘o e fa‘alagolago fo‘i i le tulafono, ma e mitamita i le Atua.
18 ‘Ua e iloa fo‘i lona finagalo, ‘ua masino fo‘i ‘iā te oe mea uiga ‘ese‘ese, ‘ina ‘ua a‘oa‘oina oe i le tulafono.
19 O lo‘o e tāofi fo‘i, o oe o le ta‘ita‘i o tauaso, o le malamalama i ē o i le pouliuli,
20 o le a‘oa‘o i ē vālelea, o le a‘oa‘o i tamaiti, ‘ina ‘ua e maua o le tino o le poto ma le ‘upu moni i le tulafono.
21 Lenei fo‘i, o oe le a‘oa‘o atu i le tasi tagata, ‘e te lē a‘oa‘o ‘ea oe ‘iā te oe? o oe lē lauga atu, ‘Aua le gaoi, ‘e te gaoi ‘ea oe?
22 o oe lē fai ane, ‘Aua le mulilua, ‘e te mulilua ‘ea oe? o oe lē matua ‘ino‘ino i tupua, ‘e te faoa ‘ea mea sa?
23 o oe lē mitamita i le tulafono, ‘e te fa‘alemigao ‘ea i le Atua i lou soli i le tulafono?
24 Auā ‘ua fa‘apei ‘ona tusia, “‘Ua ‘upuleagaina le suafa o le Atua talu ‘outou i nu‘u ‘ese.”
25 Auā e aogā le peritome, pe ‘āfai ‘e te ‘ana‘ana i le tulafono; ‘ae ‘āfai ‘e te soli i le tulafono, ‘ua ‘avea ai lou peritome ma fa‘alēperitomeina.
26 O lenei, ‘āfai e tausia e le lē peritome ‘upu tonu o le tulafono, o le ta‘u peritomeina ‘ea lona lē peritome?
27 O lē ‘ua tupu mai fo‘i ma le lē peritomeina, a ‘ua ‘ana‘ana lava i le tulafono, e fa‘amasino e ia ‘iā te oe lē soli i le tulafono, ‘ua ‘iā te oe le Tusi ma le peritome.
28 Auā e lē o le Iutaia le ‘ua va‘aia, e lē o le peritome fo‘i lē ‘ua va‘aia i le tino;
29 ‘ae peita‘i o lē ‘ua lē va‘aia, o le Iutaia lava lea; o le peritome fo‘i ‘ua i le loto lea, o lo‘o i lā le agaga lea, e lē o i lā le tusi; o lona vi‘iga e lē mai tagata, ‘ae mai le Atua.#