1 O lenei, ‘ua ta‘uamiotonuina i tatou i le fa‘atuatua, o lea ‘ua tatou lelei ai ma le Atua, ‘ona o lo tatou Ali‘i o Iesu Keriso;
2 o ia fo‘i ‘ua tatou maua mai ai le ta‘ita‘iga i lenei alofa tunoa, tatou te i ai i le fa‘atuatua; o lo‘o mitamita fo‘i i tatou ma le fa‘amoemoe i le manuia mai le Atua.
3 E lē gata fo‘i i lea, a ‘ua latou mitamita fo‘i i puapuagā, ‘ina ‘ua tatou iloa o le puapuagā e tupu ai le ‘onosa‘i,
4 o le ‘onosa‘i e tupu ai le mautinoa, o le mautinoa e tupu ai le fa‘amoemoe;
5 o le fa‘amoemoe fo‘i e lē mā ai, auā ‘ua fa‘amaligi mai le alofa o le Atua i o tatou loto e le Agaga Pa‘ia ‘ua foa‘iina mai ‘iā te i tatou.
6 Auā na maliu Keriso i ona po e tatau ai, ‘ina o vaivai pea i tatou o le sui o ia o ē fa‘alēmata‘u.
7 Auā e toe ‘ina lē mafai ‘ona oti o se tasi e sui a‘i lē ‘ua amiotonu; a o lē ‘ua agalelei, atonu pe fa‘amalosi se tasi ‘ona oti e sui a‘i o ia;
8 a ‘ua fa‘aalitinoina mai e le Atua lona lava alofa ‘iā te i tatou, ‘ina ‘ua maliu Keriso ma sui o i tatou, a o tatou agasala pea.
9 O lenei, ‘ua ta‘uamiotonuina nei i tatou i lona toto, e lē fa‘aolaina ‘ea i tatou e ia a‘i le to‘asā i se a?
10 Auā ‘āfai ‘ua lelei i tatou ma le Atua i le maliu o lona Alo, ‘ina o fai i tatou mōna fili, e matuā fa‘aolaina lava i tatou i lona soifua, o i tatou ‘ua lelei ma ia.
11 ‘Ae lē gata i lea, a ‘ua tatou mitamita fo‘i i le Atua, ‘ona o lo tatou Ali‘i o Iesu Keriso, o ia ‘ua tatou maua mai ai nei le leleiga.
12 O lenei, fa‘apei ‘ona o‘o mai o le agasala i le lalolagi i le tagata e to‘atasi, o le oti fo‘i ‘ona o le agasala, ‘ona o‘o mai ai lea o le oti i tagata uma lava, auā ‘ua agasala uma lava;
13 auā sa i le lalolagi le agasala ‘ua o‘o i ona po o le tulafono; ‘ae lē ta‘usalaina pe a leai se tulafono;
14 peita‘i na mālō le oti talu ‘iā Atamu e o‘o ‘iā Mose, ‘ua o‘o lava i ē na lē agasala e pei o le solitulafono o Atamu, o le fa‘atusa o ia o lē a maliu mai.
15 ‘Ae lē pei o le agasala le mea e foa‘ifuaina mai; auā ‘āfai ‘ua oti le to‘atele i le agasala a le to‘atasi, e fa‘asilisili lava i le to‘atele le alofa tunoa o le Atua, ma le mea e foa‘ifuaina mai i le alofa tunoa, ‘ua i le tagata e to‘atasi, o Iesu Keriso lea.
16 ‘Ae lē pei o le to‘atasi na agasala le mea e foa‘ifuaina mai; auā o i le agasala e tasi le fa‘asala, e o‘o ai le sala; a o i agasala e tele le mea e foa‘ifuaina mai, ‘ina ‘ia ta‘uamiotonuina.
17 Auā ‘āfai o le to‘atasi na mālō ai le oti i le agasala a le to‘atasi, e silisili lava ‘ona mālō ma ola ē ‘ua maua le faula‘i mai o le alofa tunoa ‘atoa ma le mea alofa o le amiotonu lea, ‘ona o le to‘atasi, o Iesu Keriso.
18 O lenei fo‘i, fa‘apei ‘ona fa‘asalaina o tagata uma lava i le agasala e tasi, e fa‘apea fo‘i ‘ona ta‘uamiotonuina o tagata uma lava i le amiotonu e tasi, latou te ola ai.
19 Auā fa‘apei ‘ona ‘avea ma agasala o le to‘atele i le lē ‘ana‘ana o le tagata e to‘atasi, e fa‘apea fo‘i ‘ona ‘avea ma amiotonu o le to‘atele i le ‘ana‘ana o le to‘atasi.
20 Na fa‘aopoopoina fo‘i le tulafono ‘ina ‘ia fa‘atele ai le agasala; peita‘i ‘ua silisili lava le alofa tunoa, ‘ina o fa‘ateleina le agasala.
21 O lenei, e pei ‘ona mālō o le agasala e o‘o i le oti, fa‘apea fo‘i ‘ona mālō o le alofa tunoa e le amiotonu e o‘o i le ola e fa‘avavau, i lo tatou Ali‘i o Iesu Keriso.#