1 Ma ‘ua fa‘alogo e Simona ‘ua fa‘apotopotoina e Terufo le itūtau‘a tele latou te ō mai i le fanua o Iuta i le fia tu‘ipalaina.
2 ‘Ua iloa ‘ua tetemū le nu‘u ma ‘ua latou matata‘u, ‘ona alu a‘e lea o ia i Ierusalema ma ‘ua na fa‘apotopoto le nu‘u;
3 ma ‘ua apoapoa‘i ‘iā te i latou, o fai atu, “‘Ua ‘outou iloa le tele o tau‘a na faia mo le tulafono ma le malumalu e a‘u nei mo o‘u uso ma le ‘āiga o lo‘u tamā ma le tele fo‘i o puapuagā ‘ua matou talia ai.
4 ‘Ona o mea ia ‘ua fasia ai o o‘u uso uma lava mo Isaraelu; ‘ua tu‘ua na o a‘u to‘atasi.
5 O lenei, ‘ia ‘aua lava ne‘i ‘ou fia fa‘apelepele i lo‘u ola i aso uma o le puapuagā! auā e lē sili lava a‘u i o‘u uso.
6 O le mea lea ‘ou te taui atu ai mo lo‘u nu‘u ma le malumalu mo la tatou fo‘i fānau ma a tatou avā, auā ‘ua fa‘apotopotoina nu‘u ‘ese uma lava e tu‘imomomo ‘iā te i tatou ‘ona ‘ua latou ita mai.”
7 A ‘ua fa‘alogo le nu‘u i ‘upu lava ia, ‘ona osofia ai lea o latou loto.
8 Ma ‘ua latou tali mai ma le leo tele, o fai mai, “O oe o lo matou ta‘ita‘i e sui ‘iā Iuta ma Ionatana, lou uso;
9 ‘ia e tau lo tatou tau‘a; matou te faia lava mea uma ‘e te fai mai ai ‘iā i matou.”
10 Ma ‘ua fa‘apotopoto e ia o tagata tau uma lava ma ‘ua fa‘ata‘alise ‘ona fa‘amae‘a o pavali uma o Ierusalema ma ‘ua ati a‘e ni ‘olo i ona itū uma.
11 Ma ‘ua na ‘auina atu Ionatana, le atali‘i o Apisaloma, i Iopa ma le itūtau‘a fou fa‘atasi ma ia; ma ‘ua na tulia i latou sa i le ‘a‘ai ma ‘ua nofo i ai lava ia.
12 Ma ‘ua sau Terufo mai Tulomai ma le itūtau‘a tele lava, e aga‘i mai i le fanua o Iuta; sa fa‘atasi fo‘i ma ia o Ionatana i le falepuipui.
13 A ‘ua tolauapi o Simona i Atita, o fa‘afesaga‘i ma le fanua laugatasi.
14 A ‘ua iloa e Terufo ‘ua tula‘i Simona e sui i lona uso o Ionatana ma ‘ua fia tau le tau‘a ma ia, ‘ona ‘auina mai lea ni savali ‘iā te ia,
15 o fai mai, “O tupe sa ‘aitalafu ai lou uso o Ionatana i le tu‘ugā‘oloa a le tupu, ‘ona o le tofiga sa ‘iā te ia, na matou tāofia ai o ia.
16 O lenei, ‘ia e ‘auina mai le selau taleni ario ma atali‘i e to‘alua o Ionatana e ‘avea ma fa‘afo‘i ita, ‘ina ne‘i sola ‘ese o ia ‘iā i matou pe a tatalaina ia, ‘ona matou tu‘uina atu ai lea o ia.”
17 Ma ‘ua iloa e Simona ‘ua tautala mai ‘iā te ia ma le fa‘a‘ole‘ole; a ‘ua poloa‘i lava ‘ia avatua le tupe ‘atoa ma tama, ‘ina ne‘i tupu a‘i le ‘ino‘ino tele o le nu‘u o Isaraelu ‘iā te ia, o fai mai,
18 “‘Ona ‘ua lē ‘auina atu ‘iā te ia le tupe ‘atoa ma tama, o le mea lava lea na fasia ai.”
19 Ma ‘ua ‘auina atu o tama ma le selau o taleni; a ‘ua pepelo Terufo, ‘ua na lē tatalaina mai Ionatana.
20 ‘Ona sau ai lea Terufo i le nu‘u ‘ina ‘ia tu‘ipalaina ma ‘ua latou ta‘amilo i le ala e tau atu i Atora; a ‘ua sāvavali Simona ma lana itūtau‘a e mulimuli atu ‘iā te ia i mea uma sa alu i ai.
21 A o i latou sa i le ‘olo ‘ua ‘auina atu ni savali ‘iā Terufo, ‘ina ‘ia fa‘ata‘alise mai o ia i le ala o le fanua tu‘ufua ma ‘aumai ‘iā te i latou ni mea e ‘ai.
22 Ma ‘ua saunia uma e Terufo o lana ‘au e ti‘eti‘e i solofanua, ‘ina ‘ia sau ai i le po lenā; ‘ae sa tele lava le kiona, ‘ua lē o‘o mai o ia i Kiliata.
23 Ma ‘ua fa‘alatalata mai o ia i Pasekama, ‘ona fasiotia lea e ia o Ionatana mōna atali‘i i lea mea.
24 Ma ‘ua liliu o Terufo, ‘ua alu i lona lava lau‘ele‘ele.
25 Ma ‘ua ‘auina atu ni tagata e Simona ma ‘ua na ‘aumaia o ivi o Ionatana lona uso ma ‘ua na tanumia i Motei, le ‘a‘ai o ona tamā.
26 Ma ‘ua fa‘anoanoa Isaraelu uma i le fa‘anoanoa tele ma ‘ua latou fētāgisi ‘ona o ia i aso e tele.
27 Ma ‘ua ati a‘e e Simona, i luga o le tu‘ugamau o lona tamā mōna uso, le ma‘a fa‘amanatu maualuga e iloa mai i le mea mamao, o i ai i luma ma tua ni ma‘a ‘ua fa‘apupulaina.
28 Ma ‘ua na fa‘ae‘e ai o ma‘a matafao e fitu o fesagai le tasi i le tasi mo lona tamā ma lona tinā mōna uso e to‘afa;
29 ma ‘ua na fa‘ata‘ali‘oli‘oina i ni pou ma‘a tetele; o fa‘atusa fo‘i o le ‘au‘upega ‘ua i pou ma‘a, e fai ma fa‘amanatu e fa‘avavau; ‘ua togitogi fo‘i i tafatafa o le ‘au‘upega o fa‘atusa o va‘a e mafai ‘ona iloa e i latou uma o folau i le sami.
30 O le tu‘ugamau lea ‘ua na faia i Motei, ‘ua o‘o lava i nei ona po.
31 A o Terufo ‘ua la faimalaga fa‘atasi ma Atioko, o le tupu taule‘ale‘a ma ‘ua na ‘ole‘olegia o ia ma fasioti ‘iā te ia.
32 Ma ‘ua ‘avea ma tupu o sui ai ‘iā te ia ma ‘ua na fa‘ae‘e i lona ulu le paleali‘i o Asia; ma ‘ua na matuā faia mea leaga e tele i le lau‘ele‘ele.
33 Ma ‘ua ati a‘e e Simona o ‘a‘ai nofo ‘olo i Iuta, o puipui i ai i ni ‘olo maualuluga ma pavali tetele ma faitoto‘a ‘ua fai fa‘amau ma ‘ua na teuina ni mea e ‘ai i totonu o ‘olo.
34 Ma ‘ua filifilia e Simona ni tagata ma ‘ua na ‘auina atu i le tupu o Temetiu, ‘ina ‘ia fa‘asaoina le nu‘u, auā o mea uma sa fai e Terufo, o le fa‘asaunoa lava.
35 Ma ‘ua tali mai i ‘upu ia e le tupu o Temetiu ma ‘ua na tusi i ai le tusi e fa‘apea mai:
36 “O le tupu o Temetiu ‘ua alofa atu ‘iā Simona, le ositaulaga sili ma le uō a tupu ma le ‘au toeaina ma le nu‘u o tagata Iuta.
37 ‘Ua matou talia le paleali‘i auro ma le pama ‘ua e ‘auina mai; ma ‘ua matou loto ‘ia osia fa‘atasi ma ‘outou le feagaiga o le fa‘alelei ‘ato‘atoa; matou te tusi atu fo‘i i tagata tofia o le tupu ‘ia fa‘amāgalo atu ‘iā te ‘outou o mea matou te fa‘amāgaloina atu.
38 Auā ‘ua tumau lava o mea uma na matou fa‘atonuina ‘iā te ‘outou; o ‘olo ‘ua ‘outou atiina a‘e, ‘ia ‘iā te ‘outou lava.
39 Matou te fa‘amāgalo atu fo‘i o mea uma ‘ua ‘outou sesē ai pe solitulafono ai e o‘o mai i le aso nei, ‘atoa ma le paleali‘i sa tatau ‘ona ‘outou ‘aumaia. ‘Āfai fo‘i na i ai se tasi lafoga sa fai e Ierusalema, ‘ia ‘aua le toe aoina o lenā lafoga.
40 ‘Āfai fo‘i e i ai ni isi o ‘outou ‘ua loto e tusia i lo matou ‘au fa‘afeao, ‘ia tusia ai i latou, a ‘ia nofo lelei i tatou.”
41 O le tausaga e tasi le selau ma le fitugafulu na ‘ave‘esea ai ‘iā Isaraelu le amo a nu‘u ‘ese.
42 Ma ‘ua āfua ai ‘ona tusia e le nu‘u o Isaraelu i tusiga ma feagaiga fa‘alemālō, “O le ulua‘i tausaga o le pule a Simona, le ositaulaga sili, le ta‘ita‘i sili ma le ta‘imua o tagata Iutaia.”
43 O ona po ia na fa‘asaga atu ai o Simona i le ‘a‘ai o Kasa ma ‘ua vagaia e lana itūtau‘a; ‘ua na faia ni ‘olo fa‘ata‘avalevale e oso atu a‘i i le ‘a‘ai ma ‘ua na tu‘ia le tasi ‘olo o le ‘a‘ai ma ‘ua na maua.
44 Ma ‘ua feosofi ai i totonu o le ‘a‘ai i latou sa i le ‘olo fa‘ata‘avalevale ma ‘ua matuā tetemū ai tagata o le ‘a‘ai.
45 Ma ‘ua fe‘ā‘ei i luga o le pavali i latou ‘ua i le ‘a‘ai ma a latou avā ma a latou fānau, ‘ua saeia o latou ‘ofu ma ‘ua latou ‘alalaga ma le leo tele, o tagi mai ‘iā Simona ia lūlū lima ma i latou.
46 Ma ‘ua latou fai mai, “‘Aua ‘e te taui mai ‘iā i matou e tusa ma a matou amio leaga, a ‘ia e faia ‘iā i matou e tusa ma lou agaalofa.”
47 Ma ‘ua alofa o Simona, ‘ua na lē fasia i latou; ‘ae ui i lea, ‘ua na tuli‘esea i latou sa i le ‘a‘ai ma ‘ua na fa‘amamāina o fale sa i ai tupua, ‘ona ulu atu lea i le ‘a‘ai, o pepese i latou ma fa‘ane‘ene‘e atu i le Ali‘i.
48 ‘Ua ‘ave‘ese i le ‘a‘ai o mea ‘ele‘elea uma lava, ‘ona tu‘uina lea i ai tagata ‘ua latou tausia le tulafono, ma ‘ua na ati a‘e ai ni ‘olo ma ‘ua na fa‘atū i ai lona lava fale.
49 A o i latou sa i le ‘olo o Ierusalema, ‘ua lē mafai ‘ona ulufafo ai ma ō atu i le lau‘ele‘ele, ‘ua lē mafafai ‘ona fa‘atau mai po o le fa‘atau atu se mea; sa latou puapuagātia tele i le oge, ‘ua oti fo‘i nisi e to‘atele o i latou i le fia ‘ai;
50 ma ‘ua latou ‘alalaga mai ‘iā Simona ‘ina ‘ia latou lūlū lima ma ia; ma ‘ua talia lava e ia ma ‘ua na tuli‘esea i latou i lea mea ma ‘ua na fa‘amamāina le ‘olo i mea uma sa ‘ele‘elea ai.
51 Ma ‘ua latou ulu atu i ai, i lona luasefulu ma le tolu o aso o lona lua o masina, i le tausaga e selau ma le fitugafulu ma le tasi, o vivi‘i atu i le Atua ma ni laupama ma kitara ma sumepalo ma napeli, i ni pese ma ni siva, auā ‘ua tu‘imomoia le tagata sa matuā ita ‘iā Isaraelu.
52 Ma ‘ua na fa‘atonuina ‘ia fa‘amanatua o aso ia i tausaga ta‘itasi uma ma le fiafia.
53 Ma ‘ua na ati a‘e pavali o le mauga pa‘ia ‘ua i tala ane o le ‘olo ma ‘ua nofo ai o ia ‘atoa ma i latou sa fa‘atasi ma ia.
54 Ma ‘ua iloa e Simona o lona atali‘i o Ioane o le tagata malosi i le tau‘a, ‘ona ia tofia lea o ia ma ta‘ita‘i o itūtau‘a uma lava; ma ‘ua nofo o ia i Kasara.