1 Ma ‘ua ‘aumaia e Korekia o tagata tau e limagaafe ma tagata filifilia o ē ti‘eti‘e i solofanua e tasi le afe ma ‘ua latou ō mai i le po,
2 ‘ina ‘ia fa‘alata ai i le togālauapi o tagata Iutaia ma feosofi fa‘afuase‘i ‘iā te i latou; sa ta‘ita‘iina i latou e ni isi tagata mai le ‘olo o Siona.
3 Ma ‘ua fa‘alogo i ai e Iuta ma ‘ua tula‘i o ia mōna tagata toa, latou te taia le malosi o le ‘au a le tupu o i Emau;
4 auā sa ta‘ape‘ape pea le vaega ‘au nai lo latou togālauapi.
5 Ma ‘ua sau Korekia i le po i le togālauapi o Iuta, ma ‘ua lē maua ai se to‘atasi; ma ‘ua sā‘ili ‘iā te i latou i le atumauga, auā sa fai ane o ia, “‘Ua latou sōsōla ‘ese i o tatou luma.”
6 Ma ‘ua malama a‘e le taeao, ‘ona aliali mai lea o Iuta i le fanua laulelei, ‘ua na o le tolugaafe ona tagata, ‘ua leai ni o latou ‘ofu tau po o ni a latou pelu.
7 ‘Ua latou iloa atu le togālauapi matuā malosi o nu‘u ‘ese ma tagata ‘ua ‘o‘ofu i ‘ofu tau, o vagavagai ‘iā te i latou o le ‘au ti‘eti‘e i solofanua, o tagata popoto lava i le tau‘a.
8 Ma ‘ua fai atu Iuta i tagata sa fa‘atasi ma ia, “‘Aua tou te matata‘u i lo latou to‘atele, ‘aua fo‘i tou te fefefe i lo latou oso mai.
9 ‘Ia ‘outou manatua pe na fa‘apefea ‘ona fa‘asaoina o tatou matua i le sami Ulaula, ‘ina ‘ua tuliloaina i latou e Farao ma le ‘au e to‘atele.
10 O lenei, ‘ia tatou ‘alalaga atu i le lagi, ‘ona alofa mai lea le Ali‘i ‘iā te i tatou; e manatua fo‘i e ia le feagaiga a o tatou tamā, e nutipalaina fo‘i e ia lenei itūtau‘a i o tatou luma i le aso nei;
11 ‘ina ‘ia iloa e nu‘u uma o lo‘o i ai lē fa‘aola ma lavea‘i ‘iā Isaraelu.”
12 ‘Ona tepa a‘e lea o tagata nu‘u ‘ese, ‘ua iloa atu i latou e ō mai e tau ma i latou.
13 Ma ‘ua latou ulufafo nai le togālauapi e tau le tau‘a, a ‘ua ili a latou pū e i latou sa fa‘atasi ma Iuta.
14 Ma ‘ua latou feosofi ma ‘ua nutipalaina nu‘u ‘ese ma ‘ua latou sōsōla i le fanua laulelei.
15 A o i latou uma na mulimuli ‘ua fasia i latou i le pelu ma ‘ua tuliloaina i latou e o‘o i Kasera, e o‘o atu fo‘i i fanua o Itumaia ma Asetota ma Iameneia; ma ‘ua fasia i latou pe tolugaafe o tagata.
16 ‘Ona toe fo‘i lea o Iuta ma lana itūtau‘a ‘ua mulimuli mai ‘iā te ia.
17 Ma ‘ua fai atu i le nu‘u, “‘Aua tou te tu‘inanau i le vete, auā ‘ua lumana‘i le tau‘a ‘iā i tatou.
18 ‘Ua tutū mai ‘iā te i tatou o Korekia ma lana itūtau‘a i le mauga; a ‘ia ‘outou tutū nei e tete‘e atu i o tatou fili ma ‘ia fa‘ato‘ilaloina i latou, ‘ona ‘outou tago lea ma le filemū i le vete.”
19 ‘Ua lē uma ‘upu ia a Iuta, a ‘ua aliali mai le vaega ‘au o alu ifo i le mauga.
20 Ma ‘ua iloa e Korekia ‘ua tulia ona tagata ma ‘ua susunuina le togālauapi; auā o le asu sa va‘ava‘ai i ai na iloa a‘i le mea na tupu.
21 ‘Ua latou iloa mea ia, ‘ona latou matuā matata‘u ai lea, ‘ae maise ‘ua iloa atu fo‘i o Iuta ma lana itūtau‘a i le fanua laulelei, o nofo sauni i le tau‘a;
22 ‘ona latou sōsōla uma ai lea i le lau‘ele‘ele o tagata nu‘u ‘ese.
23 ‘Ona fo‘i ai lea o Iuta e vete le togālauapi; ma ‘ua latou maua ai le auro e tele ma le ario ma le ‘ie uli ma le mūmū ma ‘oloa e tele.
24 ‘Ona toe fo‘i mai ai lea i latou o pepese ma vivi‘i atu i le Atua o le lagi, “Auā e lelei lava o ia, auā e fa‘avavau lona alofa.”
25 Ma ‘ua faia le fa‘aolataga tele mo Isaraelu i lea aso.
26 A o tagata nu‘u ‘ese na latou sōsōla, ‘ua latou ō atu ma ta‘u atu ‘iā Lusia o mea uma ‘ua faia.
27 ‘Ua fa‘alogo o ia i mea ia, ‘ona fa‘anoanoa ai lea ma ‘ua vaivai lona loto, auā e lē o mea sa ia loto i ai na faia ‘iā Isaraelu, po o mea na poloa‘iina e le tupu.
28 ‘Ua mavae atu le tausaga e tasi, ona fa‘ala‘ei‘au lea o Lusia, o fitafita filifilia e onogafulu afe ma le limagaafe o ē ti‘eti‘e i solofanua, ‘ina ‘ia si‘i ai le tau‘a ‘iā te i latou.
29 Ma ‘ua latou ō mai i Iuta, ‘ua latou tolauapi o Peteorana; ma ‘ua fa‘afetaia‘i ‘iā te i latou o Iuta ma tagata e sefulu afe.
30 Ma ‘ua latou ilo atu le itūtau‘a malosi a Asuria ma ‘ua tatalo o Iuta ma ‘ua fai ane, “‘Ia fa‘afetaia oe le fa‘aola o Isaraelu, ‘ua e fa‘aumatia le malosi o le toa i lima o lau ‘au‘auna o Tavita ma ‘ua e tu‘uina mai le togālauapi o nu‘u ‘ese i le lima o Ionatana, le atali‘i o Saulo, ma lona soātau.
31 ‘Ia e tu‘u mai lenei itūtau‘a i lima o lou nu‘u o Isaraelu, ma ‘ia māsiasi i latou i la latou itūtau‘a ma la latou ‘au e ti‘eti‘e i solofanua.
32 ‘Ia e tu‘uina atu le mata‘u ‘iā te i latou, ‘ia fa‘aumatia le malosi o la latou ‘au ma ‘ia fa‘agae‘etia i latou i lo latou faia‘ina.
33 ‘Ia e tuia i latou i pelu a ē alolofa ‘iā te oe, ‘ona vivi‘i atu lea ‘iā te oe i ni pese o i latou uma o ē iloa lou suafa.”
34 ‘Ona tau ai lea o le tau‘a ma ‘ua fasia le limagaafe o tagata o le itūtau‘a a Lusia.
35 ‘Ua iloa atu e Lusia le sola‘aga o ana fitafita ma le loto toa o tagata Iutaia ‘ua latou nofo sauni i le ola po o le oti ma le loto malosi, ‘ona fo‘i atu lea i Anetioka ma ‘ua filifili ai ni isi fitafita, ‘ina ‘ia fa‘ato‘ateleina i latou ma toe fo‘i mai ai i Iuta.
36 A ‘ua fai ane a Iuta mōna uso, “O lenei ‘ua nutipalaina o tatou fili; ‘inā tatou ō a‘e ia nei, e fa‘amamā ma fa‘afou le malumalu.”
37 Ma ‘ua fa‘apotopotoina le itūtau‘a ‘ato‘atoa ma ‘ua latou ō a‘e i le mauga o Siona.
38 Ma ‘ua latou iloa atu ‘ua tu‘ufua le malumalu, ‘ua fa‘aleagaina le fatafaitaulaga, ‘ua susunuina faitoto‘a, i lo ‘ua tutupu la‘au afu i lotoā o le malumalu, e pei ‘ona tutupu i le vao po o le mauga, ma ‘ua lepetia o afeafe.
39 Ma ‘ua saei o latou ‘ofu ma ‘ua latou matuā faitagitu‘i ma ‘ua lulu‘u le lefulefu i luga i o latou ulu;
40 ma ‘ua latou pa‘u‘ū faō i le ‘ele‘ele ma ‘ua latou ilia o pū tauvala‘au ma ‘ua latou ‘alalaga atu i le lagi.
41 ‘Ona tofia lea e Iuta o fitafita latou te tau ma i latou ‘ua i le ‘olo, se‘ia fa‘amamāina le malumalu.
42 Ma ‘ua na filifili ni ositaulaga e lē ponā, o ē loto i le tulafono a le Atua;
43 ma ‘ua latou fa‘amamā le mea pa‘ia ma ‘ua latou ‘avea ma‘a ‘ele‘elea i le fa‘atafuna.
44 Ma ‘ua mafaufau i le fatafaitaulaga o taulaga mū ‘ua fa‘aleagaina, pe se a se mea a fai ai.
45 Ma ‘ua latou maua le manatu lelei ‘ia lepetia lava le fatafaitaulaga, ne‘i ‘avea ma mea e māsiasi ai i latou, auā na fa‘aleagaina e nu‘u ‘ese ma ‘ua latou lepetia.
46 Ma ‘ua latou tu‘u ona ma‘a i le mauga o le malumalu, i se tulaga tatau, se‘ia o‘o mai se perofeta na te fa‘aalia le tonu e uiga i ai.
47 Ma ‘ua latou tago i ma‘a ‘ato‘atoa, e tusa ma le tulafono ma ‘ua ati a‘e ai le fatafaitaulaga fou e tusa ma le fatafaitaulaga sa i ai muamua.
48 Ma ‘ua latou ati a‘e le mea pa‘ia ma le pavali i totonu o le malumalu, ‘ona latou fa‘apa‘ia ai lea o le malumalu mōna lotoā.
49 Ma ‘ua latou faia ni ipu pa‘ia fou ma ‘ua latou fa‘atū le tu‘ugāmolī ma le fatafaitaulaga o mea manogi ma le la‘o‘ai i totonu o le malumalu.
50 Ma ‘ua latou tu‘u le mea manogi i luga o le fatafaitaulaga ma ‘ua latou tutu o molī ‘ua i le tu‘ugāmolī ma ‘ua suluia a‘i le malumalu.
51 Ma ‘ua latou laulauina o areto i luga o le la‘o‘ai, ma ‘ua fa‘atautau ‘ie puipui ma ‘ua latou fa‘amae‘a a latou galuega uma na latou faia.
52 Ma ‘ua latou tūtūla‘i i le vave ao o le aso luafulu ma le lima o lona iva o masina, o le masina lea o Kaseleu, i le tausaga e tasi le selau ma le fagafulu ma le valu.
53 Ma ‘ua latou momoli le taulaga, e tusa ma le tulafono, i luga o le fatafaitaulaga na latou atiina a‘e;
54 o le masina ma le aso lava e tasi na fa‘aleagaina ai le fatafaitaulaga e nu‘u ‘ese, o le masina lea ma le aso fo‘i lea na fa‘afouina ai i le pese o salamō ma le tagi o kitara ma napeli ma sumepalo.
55 Ma ‘ua pa‘u‘ū faō le nu‘u uma ma ‘ua latou ifo atu ma fa‘afetai atu i lē afio i le lagi ‘ua na fa‘amanuia mai ‘iā te i latou.
56 Ma ‘ua latou faia le fa‘apaologa o le fatafaitaulaga i aso e valu ma ‘ua latou momoli ma le ‘oli‘oli o taulaga mū ma le taulaga o le fa‘afetai ma le vi‘iga.
57 Ma ‘ua latou teuteuina le matafale o le malumalu i ni pale auro ma ni talitā; ma ‘ua latou fa‘apa‘ia o faitoto‘a ma afeafe, ‘ua latou tu‘u i ai ni puipui.
58 Ma ‘ua tupu i le nu‘u le fiafia matuā tele ma ‘ua sōloi‘esea le fa‘amasiasi mai o nu‘u ‘ese.
59 Ma ‘ua fa‘atonu e Iuta mōna uso ma le fa‘apotopotoga ‘ato‘atoa o Isaraelu, ‘ia faia le aso o le fa‘apa‘iaga o le fatafaitaulaga ma le fiafia ma le ‘oli‘oli i ona po e tatau ai, i lea tausaga ma lea tausaga, i aso e valu e āfua mai i le luafulu ma le lima aso o le masina o Kaseleu.
60 Ma ‘ua latou ati a‘e i ona po ia i le mauga o Siona o pavali maualuluga e si‘omia ai, ‘atoa ma ‘olo malolosi, ‘ina ne‘i ō mai o nu‘u ‘ese ma sosoli le mea pa‘ia e pei ‘ona latou mua‘i faia.
61 Ma ‘ua tu‘u i ai le vaega ‘au latou te leoleoina le mauga ma ‘ua atiina a‘e le ‘olo e leoleo ai i Petesura, ‘ina ‘ia maua e le nu‘u se ‘olo e tete‘e atu ai ‘iā Itumaia.