1 O Atioko, le atali‘i o Temetiu, ‘ua na ‘auina mai fo‘i le tusi, mai motu o le sami, ‘iā Simona, le ositaulaga ma le ta‘imua o tagata Iutaia ma le nu‘u ‘atoa uma;
2 ma ‘ua i ai o ‘upu nei:“O le tupu o Atioko ‘ua alofa atu ‘iā Simona, le ositaulaga sili ma le nu‘u o tagata Iutaia.
3 ‘Ua maua e ni isi tagata amio leaga le mālō o matou tamā, a ‘ua ‘ou loto e toe maua mai le mālō ma toe fa‘atūina, ‘ia tusa ma aso muamua; o lea ‘ua ‘ou fa‘apotopotoina ai se itūtau‘a tele, ‘ua ‘ou fausia fo‘i se fuāva‘a mo le tau‘a.
4 ‘Ou te fia alu atu i le lau‘ele‘ele, ‘ina ‘ia ‘ou taui ai ma sui ‘iā te i latou ‘ua fa‘aleagaina lo matou nu‘u ma na latou fa‘atafunaina ni ‘a‘ai e tele i lo‘u mālō.
5 “O lenei, ‘ou te fa‘amaonia ‘iā te oe o fa‘amāgaloga uma lava i lafoga na fa‘amāgaloina ai oe e tupu uma na muamua ‘iā te a‘u, e fa‘apea fo‘i ma isi mea alofa uma ‘ua latou fa‘amāgaloina ai oe.
6 ‘Ou te fa‘ataga fo‘i ‘iā te oe le gaosia o āu lava tupe.
7 ‘Ia sa‘oloto fo‘i o Ierusalema ma le malumalu; a o le ‘au‘upega uma lava ‘ua e gaosia ma ‘olo ‘ua e atiina a‘e ma ‘ua e maua, ‘ia ‘iā te oe pea lava.
8 O tupe uma fo‘i ‘ua tatau ‘ona totogi i le tupu i aso ‘ua mavae atu po o aso o lumana‘i, o lo‘o fa‘amāgaloina ai oe e āfua i le aso nei, ‘ae o‘o i le fa‘avavau.
9 A matou maua fo‘i lo matou mālō, ‘ona matou fa‘amamalu ai lea ‘iā te oe ma lou nu‘u ma le malumalu i le mamalu tele, e o‘o lava ‘ina lauiloa lo ‘outou mamalu i le lalolagi uma.”
10 O le tausaga e tasi le selau ma le fitugafulu ma le fā, na aga‘i atu ai Atioko i le lau‘ele‘ele o ona tua‘ā ma ‘ua fa‘apotopoto mai ‘iā te ia o vaega ‘au uma, ‘ua itiiti lava o ē ‘ua totoe ‘iā Terufo.
11 Ma ‘ua tuliloa ‘iā te ia le tupu o Atioko ma ‘ua sola o aga‘i atu i tai, ‘ua o‘o i Tora;
12 auā sa na iloa o lo‘o potopoto o mala i ona luga ma ‘ua tu‘ulafoa‘iina ia e le itūtau‘a.
13 Ma ‘ua tolauapi o Atioko i luma o Tora ma le luafulu o afe o tagata tau ma le valu afe o fitafita e ti‘eti‘e i solofanua;
14 ma ‘ua na vagaia le ‘a‘ai ma ‘ua fa‘alata i ai o va‘a mai i tai; ma ‘ua latou sisi‘o le ‘a‘ai i le itū i uta ma le itū i tai ma ‘ua latou le tu‘ua se tasi na te ulu atu i ai pe ulufafo mai ai.
15 A ‘ua ō mai o Numeni ma i latou sa fa‘atasi ma ia nai le ‘a‘ai o Roma, o ‘iā te i latou o tusi na tusia i tupu ma nu‘u, ‘ua i ai o ‘upu nei:
16 “O Lukio, le fai pule o tagata Roma, ‘ua alofa atu i le tupu o Tulomaio.
17 ‘Ua ō mai o savali a tagata Iutaia, o a matou uō, na ‘auina mai i latou e Simona, le ositaulaga sili, ma le nu‘u o tagata Iutaia, e fa‘afou le ulua‘i fa‘auō ma le feso‘ota‘iga.
18 ‘Ua latou ‘aumai fo‘i le talitā auro e tusa ma mina e afe.
19 O le mea lea ‘ua matou loto ai e tusi atu i tupu ma nu‘u, ‘ia ‘aua lava ne‘i fa‘aleaga ‘iā te i latou, ‘aua fo‘i le si‘i le tau‘a ‘iā te i latou po o latou ‘a‘ai po o latou nu‘u, ‘ia ‘aua fo‘i ne‘i fesoasoani i ē tau ma i latou.
20 Na loto fo‘i i matou e tali le talitā mai ‘iā te i latou.
21 O lea, ‘āfai ‘ua sōsōla ‘iā te ‘outou nisi tagata amio leaga nai o latou nu‘u, ‘ia ‘outou tu‘u atu i latou ‘iā Simona, le ositaulaga sili, ‘ina ‘ia fa‘asala ‘iā te i latou e tusa ma lana tulafono.”
22 O mea lava ia na tusia fo‘i i le tupu o Temetiu, ma Atalo ma Ariarati ma Asake,
23 ‘atoa ma nu‘u uma; ‘iā Samesame ma tagata Sepata, ma Telo ma Muneto ma Sikuona ma Karia ma Samosa ma Pafilia ma Lukia ma Halikanaso ma Ko ma Site ma Arato ma Roto ma Faseli ma Kotuna ma Nitoi, ma Kuperu ma Kurene.
24 A ‘ua latou ‘auina mai le ata o le tusi ‘iā Simona, le ositaulaga sili ma le nu‘u o tagata Iutaia.
25 A o le tupu o Atioko ‘ua na tolauapi i luma o Tora, o le fa‘alua lea ma ‘ua fa‘alatalata atili pea i ai ana ‘au, o fai fo‘i ni ‘olo fa‘ata‘avalevale; ma ‘ua na si‘omia ai o Terufo ‘ina ne‘i sola ‘ese.
26 Ma ‘ua ‘auina atu ‘iā te ia e Simona o fitafita filifilia e lua afe e fesoasoani atu i ai ma le ario ma le auro ma le ‘au‘upega e tele;
27 ma ‘ua musu i tali, a ‘ua na solia mea uma na lua‘i fai ai le feagaiga ma ia ma ‘ua masesei i lā‘ua.
28 Ma ‘ua na ‘auina mai ‘iā te ia o Atenopiu, le tasi o ana uō, e talatala ma ia, o fai mai, “‘Ua ‘outou tāofia o Iopa ma Kasara ma le ‘olo o lo‘o i Ierusalema, o ‘a‘ai ia o lo‘u mālō.
29 ‘Ua ‘outou fa‘atafunaina o latou faoa ‘a‘ai ma ‘ua ‘outou faia le fasiga matuā tele i le lau‘ele‘ele ma ‘ua ‘outou pule i nu‘u e tele i totonu o lo‘u mālō.
30 O lenei la, ‘ia ‘outou tu‘u mai o ‘a‘ai na ‘outou maua ‘atoa ma lafoga o nu‘u na ‘outou pule i ai i tua o le ‘ele‘ele o Iuta.
31 A leai, ‘ia ‘outou tu‘u mai le lima selau taleni auro e sui i ai, e fa‘apea fo‘i ma le limasefulu taleni e sui i mea na ‘outou fa‘atafunaina ai ‘atoa ma lafoga o ‘a‘ai lava ia; a leai, ‘ona matou ō atu lea ma si‘i le tau‘a ‘iā te ‘outou.”
32 Ma ‘ua sau i Ierusalema o Atenopiu, le uō a le tupu ma ‘ua iloa atu le mamalu o Simona, ma le ‘i‘ila o ipu ario ma ipu auro ma le mau mea lelei ‘ua ‘iā te ia, ma ‘ua ofo lava ia; ma ‘ua tala mai ‘iā te ia ‘upu a le tupu.
33 Ma ‘ua tali atu Simona ‘iā te ia ma ‘ua fai atu, “Matou te le‘i faoa le lau‘ele‘ele o se tasi pe tāofi mea a tagata ‘ese; na o le tofi lava o matou tamā na pule fua i ai i ni nai aso o i latou ‘ua ita mai.
34 A ‘ua o‘o i aso ‘ua mafai ai, ‘ona matou toe pu‘ea lea le tofi o matou tamā.
35 A o Iopa ma Kasara ‘ua e tagi mai ai, sa fa‘asaunoa tele o ‘a‘ai ia e lua i lo matou nu‘u ma lo matou lau‘ele‘ele; matou te avatua o taleni e selau e sui i ai.” A ‘ua lē tali mai e Atenopiu i se ‘upu e tasi.
36 A ‘ua toe fo‘i atu ma le ita i le tupu ma ‘ua tala atu ‘iā te ia o ‘upu ia, ma le mamalu o Simona ma mea uma sa ia va‘ava‘ai i ai; ma ‘ua ita le tupu i le ita matuā tele.
37 A o Terufo, ‘ua sola ia i Otosia i le va‘a.
38 Ma ‘ua tofia Kenepaio e le tupu e pule i nu‘u tumatafaga ma ‘ua tu‘u atu ‘iā te ia le itūtau‘a o fitafita sāvavali ma ē ti‘eti‘e i solofanua.
39 Ma ‘ua poloa‘i atu ‘iā te ia e tolauapi i luma o le nu‘u o Iuta, ma ‘ua poloa‘i atu ‘iā te ia e ati a‘e Kitoru ma pupuni o faitoto‘a o le ‘a‘ai ma si‘i le tau‘a i le nu‘u. A o le tupu ‘ua tuliloa o ia ‘iā Terufo.
40 Ma ‘ua o‘o mai Kenepaio i Iamenia ma ‘ua amata ‘ona fa‘atigā i le nu‘u ma oso atu i Iuta ma pu‘e ona tagata ma fasioti ‘iā i latou ma ‘ua ati a‘e Kitoru.
41 Ma ‘ua na tu‘uina ai le ‘au e ti‘eti‘e i solofanua ma le vaega ‘au, ‘ina ‘ia latou ulufafo ai ma feoa‘i i ala o Iuta, e pei ‘ona fa‘atonu i ai e le tupu.