1 O le afioga a le ALI‘I na o‘o atu ‘iā Hosea le atali‘i o Peri, i ona po o Usia, Iotama, Aasa, ma Esekia, o tupu o Iuta; o ona po fo‘i o Ierepoamo le atali‘i o Ioasa le tupu o Isaraelu.
2 O le amataga o le afioga a le ALI‘I ‘iā Hosea. ‘Ua fetalai mai le ALI‘I ‘iā Hosea, “Alu ia oe ‘ia e faiavā i le fafine talitane ma ia fai māu le fānau a le faita‘aga auā ‘ua matuā faita‘aga lava le nu‘u ‘ua ō ‘ese i le ALI‘I.”
3 ‘Ona alu ai lea o ia ‘ua fai māna avā o Komeri le afafine o Tipelaima, ‘ua tō fo‘i o ia ‘ua fānau mai ai lona atali‘i.
4 ‘Ua fetalai mai fo‘i le ALI‘I ‘iā te ia, “‘Ia e fa‘aigoa ‘iā te ia o Isereelu; auā e toe itiiti ‘ona taui atu lea o le toto o Isereelu i le ‘āiga o Ieu, ‘ou te fa‘aumatia fo‘i le mālō o Isaraelu.
5 O lea aso ‘ou te gausia ai le ‘aufana a Isaraelu i le vanu o Isereelu.”
6 ‘Ua toe tō fo‘i o ia ‘ua fānau ai le tama teine, ‘ona fetalai mai ai lea o le ALI‘I ‘iā te ia, “‘Ia e fa‘aigoa ‘iā te ia o Loruama, auā ‘ou te lē toe alofa atu i le ‘āiga o Isaraelu, ‘ae ‘ou te matuā ‘ave‘ese i latou.
7 A o le ‘āiga o Iuta ‘ou te alofa i ai, ‘ou te fa‘aola ‘iā te i latou ‘ona o le ALI‘I lo latou Atua; ‘ou te fa‘aola ‘iā te i latou i le ‘aufana, po o le pelu po o le tau‘a po o solofanua po o ‘au ti‘eti‘e i solofanua.”
8 ‘Ua ia fa‘ate‘a Loruama ma le susu; ‘ona tō ai lea o ia ‘ona fānau mai ai lea o le tama tane.
9 ‘Ona fa‘apea mai ai lea o le Atua, “‘Ia e fa‘aigoa ‘iā te ia o Loama; auā e lē so‘u nu‘u ‘outou, e lē so ‘outou Atua fo‘i a‘u.”
10 A o le faitau aofa‘i o fānauga a Isaraelu ‘ua pei o le oneone o le sami ia, e le māfuatia, e lē mafaitaulia; o i le mea fo‘i na fa‘apeaina atu ai ‘iā te i latou, “E lē o so‘u nu‘u ‘outou,” e i‘u ‘ina fa‘apeaina atu ‘iā te i latou, “O atali‘i o le Atua soifua ‘outou.”
11 ‘Ona fa‘apotopotoina fa‘atasi ai lea o le fānauga a Iuta, ‘atoa ma le fānauga o Isaraelu, latou te tofia fo‘i le ta‘ita‘i e to‘atasi mo i latou, latou te ō a‘e fo‘i ma le nu‘u; auā e sili le aso o Isereelu.