1 O Isaraelu, o le vine ia e māfalā; ‘ua ia fua mai ni fua e fai mōna; fa‘apei ‘ona tele o lona fua, ‘ua fa‘apea ‘ona fa‘ateleina e ia o fatafaitaulaga; fa‘apei ‘ona lelei o lona lau‘ele‘ele, ‘ua fa‘apea ‘ona latou gaosi lelei o tupua.
2 ‘Ua fa‘alotoloto lua i latou; ‘ua nofo sala nei i latou; na te lepetia a latou fatafaitaulaga, na te fa‘aumatia a latou tupua.
3 Auā e fa‘apea mai nei i latou, “‘Ua leai se tupu ‘iā te i matou, auā ‘ua matou le matata‘u i le ALI‘I, se a fo‘i se mea e faia e le tupu ‘iā i matou?”
4 ‘Ua latou fai mai ‘upu, ‘ua tautō pepelo, ‘ua osi le feagaiga; e tupu a‘e fo‘i le fa‘amasinoga, e pei o la‘au ‘o‘ona i utu o fanua.
5 E fefefe e ‘ua nonofo i Samaria ‘ona o tama‘i povi o Petavene; auā e fētāgisi ai ona tagata, o ona ositaulaga fo‘i e na fiafia i ai; auā o lona mamalu ‘ua te‘a ma ia.
6 E ‘avea fo‘i lenei mea i Asuria e fai ma mea alofa i le tupu o Iarepa; e mā Efaraima, e māsiasi fo‘i Isaraelu ‘ona o lana lava pule.
7 O Samaria ‘ua fano lona tupu, e pei o si fasi la‘au i le fogāvai.
8 E fa‘aumatia fo‘i mea maualuga i Avene, o le agasala a Isaraelu; e tutupu a‘e le la‘au tuitui ma le la‘au talatala i o latou fatafaitaulaga; latou te fai atu fo‘i i mauga, ‘Inā tanu mai ia ‘iā te i matou. E fa‘apea fo‘i i mea maupu‘epu‘e, ‘Inā mafuli mai ia i luga ‘iā te i matou.
9 Isaraelu e, talu mai ona po o Kipea ‘ua e agasala ai; ‘ua latou tūtūmau ai; na lē o‘o atu ‘iā te i latou i Kipea le tau‘a i tagata agaleaga.
10 O lo‘u loto, ‘ou te a‘oa‘i ‘iā te i latou; e fa‘apotopotoina fo‘i tagata e tau ma i latou, pe a ‘ou fusifusi ‘iā te i latou ‘ona o a latou agasala e lua.
11 Efaraima fo‘i o le povi fafine ia ‘ua a‘oa‘oina, ‘ua fia soli saito lava; a ‘ua ‘ou alu atu lava a‘u i lona ua lālelei; ‘ou te fa‘ati‘eti‘e se tasi ia Efaraima, e suatia le ‘ele‘ele e Iuta e fa‘amalūlūina e Iakopo lona lau‘ele‘ele.
12 ‘Ia ‘outou lūlū saito mo ‘outou ma le amiotonu, ‘ia ‘outou selesele mai ma le amio lelei; ‘ia ‘outou suatia lo ‘outou fanua vaoa; auā ‘ua o‘o i ona po e sā‘ili atu ai i le ALI‘I se‘ia afio mai o ia, ma fa‘atotō ifo le amiotonu i luga ‘iā te ‘outou.
13 ‘Ua ‘outou suatia le agasala, ‘ua ‘outou selesele mai le leaga; ‘ua ‘outou ‘a‘ai le fua o le pepelo; auā na e fa‘atuatua i lou ala ma le to‘atele o ou tagata totoa.
14 O lea e tupu ai le vāvāō i ou tagata, e fa‘aumatia ou ‘olo uma lava, e pei ‘ona fa‘aumatia e Salemana o Petarepelu i le aso na tau ai le tau‘a; na palasi le tinā fa‘atasi ma ana tama.
15 E fa‘apea lava ‘ona faia ‘iā te ‘outou i Peteli ‘ona o la ‘outou amio e matuā leaga; e matuā fano lava le tupu o Isaraelu i le taeao.