1 “Ō mai ia, ‘inā tatou toe fo‘i atu i le ALI‘I; auā o ia ‘ua na saeia, na te fa‘amālōlōina fo‘i i tatou; ‘ua ia fasia, na te fōfōina fo‘i i tatou.
2 Na te fa‘aolaina mai i tatou pe a mavae aso e lua; a o‘o i lona tolu o aso na te fa‘atutūina i tatou, tatou te ola mai ai i ona luma.
3 Tatou te iloa fo‘i o lo‘o o tatou tausisi atu ia iloa le ALI‘I; ‘ua saunia lona afio atu e pei o le taeao, e afio mai fo‘i o ia ‘iā te i tatou e pei o le ‘ua, e pei o le timu, mulimuli ma le timu muamua i le ‘ele‘ele.”
4 Efaraima e, se a ‘ea se mea ‘ou te faia ‘iā te oe? Iuta e, se a ‘ea se mea ‘ou te faia ‘iā te oe? auā na pei o le puao i le taeao la ‘outou amio lelei, e pei o le sau fo‘i i le vave ao ‘ona mavae atu.
5 O le mea lea ‘ua ‘ou fasia ai i latou e le ‘au perofeta, ‘ua ‘ou fasiotia i latou i ‘upu a lo‘u gutu; o au fa‘amasinoga fo‘i o le malamalama e alu atu lea.
6 Auā o le alofa ‘ou te loto i ai, ‘ae lē o le taulaga; ‘ia iloa fo‘i le Atua e sili lea i lo‘u manatu i taulaga mū.
7 A ‘ua latou soli le feagaiga, e pei o Atamu; ‘ua latou pepelo ‘iā te a‘u i lea mea.
8 O Kiliata o le ‘a‘ai lea o ē fai amio leaga, o lo‘o leaga i le toto.
9 Fa‘apei ‘ona lamalama i se tagata o ē fao mea, e fa‘apea fo‘i le ‘au ositaulaga ‘ona fasioti tagata i le ala i Sekema; auā ‘ua ulavale i latou.
10 ‘Ua a‘u iloa i le ‘āiga o Isaraelu le mea e matuā leaga; ‘ua i ai le faita‘aga o Efaraima, ‘ua leaga Isaraelu.
11 Iuta e, ‘ua tu‘u mo oe lava le seleselegāsaito ‘ina ‘ua ‘ou fa‘afoisia le tāfeaga a lo‘u nu‘u.#