1 A o aso e gata ai,e o‘o ‘ina fa‘atumauina ai le maugao i ai le fale o le ALI‘I i tumutumu o mauga,e fa‘amaualugaina fo‘i ‘ia sili i mauga iti.‘Ona gasolo ane lea o nu‘u i ai.
2 E ō mai lava nu‘u ‘ese e tele ma latou fa‘apea ane,“Ō mai ia, tatou ō a‘e ia i le mauga o le ALI‘I,o le fale fo‘i o le Atua o Iakopo.E a‘oa‘o mai ai o ia ‘iā te i tatou i ona ala,‘ona tatou sāvavali ai lea i ona ala.Auā e alu atu le tulafono mai Siona,o le afioga fo‘i a le ALI‘I mai Ierusalema.”
3 E fa‘amasino fo‘i o ia i nu‘u e tele,e a‘oa‘i atu fo‘i i nu‘u malolosi e mamao.‘Ona latou tu‘i ai lea ‘iā latou pelu e fai ma u‘amea o suōtosina,o latou tao fo‘i e fai ma polo teu vine.E lē si‘i atu fo‘i le pelu o le tasi nu‘u i le tasi nu‘u,latou te lē toe a‘oa‘o fo‘i i tau‘a.
4 ‘Ae ta‘itasi ma nofo i lalo o lona vine ma lalo o lona mati;e leai fo‘i sē na te fa‘amata‘u mai;auā ‘ua fa‘apea ‘ona tulei mai ai le si‘ufofoga o le ALI‘I o ‘au.
5 Auā o nu‘u uma e ta‘itasi ma savali i le igoa o latou atua, o i tatou fo‘i, tatou te sāvavali i le suafa o le ALI‘I lo tatou Atua e fa‘avavau fa‘avavau lava.
6 O lo‘o fa‘apea mai le ALI‘I: O lea aso ‘ou te fa‘apotopoto ai le nu‘u ‘ua setusetu, ‘ou te aofa‘iina fa‘atasi fo‘i le nu‘u ‘ua tulia ma le nu‘u ‘ua ‘ou fa‘atigāina.
7 ‘Ou te fa‘atotoe nisi o le nu‘u ‘ua setusetu, ‘ou te faia fo‘i ma nu‘u malosi e ‘ua tāfea mamao, e pule fo‘i le ALI‘I ‘iā te i latou i le mauga o Siona e amata i ona po nei, e o‘o i le fa‘avavau.
8 O oe fo‘i le ‘olo o le lafu mamoe, o le mauga o le tama fafine a Siona, e o‘o mai lava ‘iā te oe, e o‘o mai lava le mua‘i pule; e o‘o mai le mālō o le tama fafine a Ierusalema.
9 O lenei, se a le mea ‘e te ‘alaga tele ai? E leai ‘ea se tupu ‘iā te oe? ‘Ua fano ‘ea lou faipule? ‘ina ‘ua maua oe i tigā pei o se fafine a fānau mai.
10 Le tama fafine a Siona e, ‘inā fa‘atigā ia ma ‘ia fānau mai, pei o le fafine a fānau mai; auā ‘e te alu ‘ese nei i le ‘a‘ai ‘ae mau i le vao, ‘e te o‘o lava i Papelonia; e lavea‘iina oe i lea mea, e lavea‘i e le ALI‘I ‘iā te oe i lea mea a‘i lima o i latou o ē ita mai ‘iā te oe.
11 ‘Ua fa‘apotopotoina nei fo‘i o nu‘u e tele o le a tau ma oe, o ē fa‘apea ane, “‘Ia leaga o ia; se‘i va‘ai fo‘i o tatou mata i Siona.”
12 A o i latou, latou te lē iloa manatu o le ALI‘I, latou te lē iloa fo‘i lana pule; auā e fa‘apotopotoina i latou e ia pei o fusi saito i le mea e soli a‘i saito.
13 Le tama fafine a Siona e, tu ia i luga ma soli; auā ‘ou te faia lou nifo ma u‘amea, ‘ou te faia fo‘i ou atigivae ma ‘apamemea; ‘e te tu‘imomomoina nu‘u e tele; ‘ou te fa‘atoina fo‘i mo le ALI‘I a latou vete, ‘atoa ma a latou ‘oloa mo le Ali‘i o le lalolagi uma.#