1 O lenei, ‘inā fa‘ala‘ei‘au ia o oe le tama fafine e ana ‘au; ‘ua ia si‘osi‘oina i tatou i le tau‘a; latou te ta i le to‘oto‘o le fa‘amasino o Isaraelu i lona alafau.
2 A o oe, Peteleema-Efarata, e itiiti oe i afe o Iuta, ‘ae tupu mai ‘iā te oe mo a‘u o lē na te fai ma faipule ‘iā Isaraelu o lona tupu mai talu mai anamuā lea, talu mai ona po o le vavau lava.
3 ‘Ae peita‘i e tu‘ua i latou e ia se‘ia o‘o i ona po e fānau mai ai o ia o le a fānau; ‘ona toe fo‘i mai ai lea i le fānauga a Isaraelu o ē totoe i ona uso.
4 E tu fo‘i o ia ma leoleo ‘iā te i latou i le mana o le ALI‘I ma le mamalu o le suafa o le ALI‘I, lona Atua, ‘ona latou nofo mau ai lea; auā o ona po ia e mamalu ai o ia e o‘o i tulu‘iga o le lalolagi.
5 E fai fo‘i o ia ma manuia.Pe a sau Asuria i lo tatou lau‘ele‘ele, pe a soli fo‘i e ia o tatou maota, ‘ona tatou totofi ai lea o leoleo e to‘afitu e tete‘e ‘iā te ia ma ali‘i sili e to‘avalu.
6 Latou te fa‘asaunoa fo‘i le nu‘u o Asuria i le pelu, ma le nu‘u o Nimarota i ona lava faitoto‘a; na te lavea‘i fo‘i ‘iā te i tatou a‘i Asuria, pe a o‘o mai o ia i lo tatou lau‘ele‘ele, pe a soli fo‘i o ia i lo tatou nu‘u.
7 E i ai fo‘i e ‘ua totoe o Iakopo i nu‘u e tele e pei o le sau mai le ALI‘I, pei o le ‘ua fo‘i i luga o vao iti, o le mea e le fa‘atalitali i tagata, o le fa‘atalitali fo‘i i le fānau a tagata.
8 E i ai fo‘i e ‘ua totoe o Iakopo i nu‘u ‘ese, o nu‘u e tele e pei o le leona i manu o le vao, pei o le leona ta‘anoa i lafu mamoe; pe a ui ane o ia na te soli ma saei, e leai fo‘i sē na te lavea‘iina.
9 E taualuga lou lima i ē fa‘asauā mai ‘iā te oe, e fa‘aumatia fo‘i e ‘ua ita mai uma lava ‘iā te oe.
10 O lo‘o fa‘apea mai le ALI‘I: O lea aso ‘ou te fa‘aumatia ai au solofanua o ‘iā te oe, ‘ou te fa‘aumatia fo‘i ou kariota.
11 ‘Ou te fa‘aumatia fo‘i ‘a‘ai o lou nu‘u, ‘ou te matua sōloia fo‘i ou ‘olo uma.
12 ‘Ou te fa‘aumatia togafiti fa‘ataulāitu a‘i lou lima, e lē i ai fo‘i ‘iā te oe ni ē ‘i‘ite i ao o le lagi.
13 ‘Ou te fa‘aumatia fo‘i au tupua ‘ua ta, ‘atoa ma au tupua ma‘a; ‘ona e lē toe ifo ai lea i galuega a ou lima.
14 ‘Ou te lepeti fo‘i i au tupua o Asaira i totonu ‘iā te oe ma ‘ou fa‘atafunaina ou ‘a‘ai.
15 ‘Ou te taui atu ma le ita e matuā tele i nu‘u ‘ese o ē ‘ua lē fa‘alogo mai.#