1 Sa i ai le tasi tagata ‘ua nofo i Papelonia, i le o lona igoa o Ioakima.
2 Ma ‘ua fai lana avā, o Susana le igoa, o le afafine o Hilikia, o le teine ‘aulelei lava ma le mata‘u i le Atua;
3 auā sa amiotonu ona mātua, ma ‘ua la a‘oa‘oina ai la la tama teine e tusa ma le tulafono a Mose.
4 A o Ioakima sa matuā mau‘oloa lava ia, sa ‘iā te ia le togāla‘au e lata ane i lona fale; sa potopoto ‘iā te ia o tagata Iutaia, auā sa sili lava ia ‘ona mamalu ‘iā i latou uma.
5 Na tofia ma fa‘amasino mo le tausaga lea o toeaina e to‘alua o le nu‘u, o ē uiga i ai le fetalaiga a le Ali‘i: ‘Ua ulufafo le amio leaga mai Papelonia i fa‘amasino toeaina sa fa‘atagā ta‘ita‘i i le nu‘u.
6 Sa masani i lā‘ua ia ‘ona ō mai i le fale o Ioakima, ‘ona ō mai lea ‘iā i lā‘ua o i latou uma ‘ua i ai ni finauga.
7 A o‘o ‘ina tu‘umuli le nu‘u, i le aoauli, ‘ona ulu atu lea o Susana ma savali i le togāla‘au a lana tane.
8 Sa iloa fo‘i o ia i aso uma e toeaina, o ulu atu ai ma savali, ma ‘ua mū o lā‘ua loto i le tu‘inanau ‘iā te ia;
9 ma ‘ua la tatao i lalo o lā‘ua mafaufau, ma ‘ua la liliu‘eseina o lā‘ua mata, ‘ina ‘ia ‘aua lē iloa le lagi e i lā‘ua, ‘aua fo‘i le manatua o fa‘amasinoga tonu.
10 O lenei sa o‘otia i lā‘ua i le tu‘inanau ‘iā te ia, a ‘ua la le fefa‘aalia‘i lo la naunau tigā;
11 auā sa mamā ona fefa‘aalia‘i lo la tu‘inanau i le fia momoe ma ia.
12 Ma ‘ua la tilotilo ‘iā te ia i aso uma, o tupu atili pea le fia iloa atu o ia.
13 Ma ‘ua fai atu le tasi i le tasi, “Tā ō i o tā ‘āiga, auā ‘ua o‘o i le itūlā o le ‘āiga o le aoauli;” ‘ona ulufafo lea i lā‘ua, ta‘itasi ma alu i lona ia itū.
14 A ‘ua toe fo‘i mai lava i lā‘ua, ‘ua la fetaia‘i, ‘ona fesili lea le tasi i le tasi pe se ā le mea na toe fo‘i mai ai, ‘ona fefa‘aalia‘i ai lea lo lā‘ua tu‘inanau; ‘ona taupulepule lea i lā‘ua i se itūaso a maua ai o ia o nofo to‘atasi.
15 ‘Ona o‘o ai lea ‘ina lamalama i lā‘ua i se aso tatau; ‘ua o‘o i le itūaso e ulu atu ai o ia e pei o aso ‘ua mavae atu, ‘ua na o ia ma teine to‘alua; ma ‘ua fia tā‘ele o ia i le togāla‘au, auā o le vaitausaga vevela.
16 Sa leai fo‘i se to‘atasi ‘i‘inā, na o toeaina e to‘alua sa lalafi ai ma tilotilo ‘iā te ia.
17 ‘Ona fai atu lea o ia i teine, “‘Ia ‘oulua ‘aumai le u‘u ma mea manogi, ma ‘ia ‘oulua pupuni faitoto‘a o le togāla‘au, so‘u tā‘ele.”
18 Ma ‘ua faia e i lā‘ua e pei ‘ona poloa‘i mai ai; ma ‘ua la pupuni faitoto‘a o le togāla‘au, ma ‘ua ulufafo uma i lā‘ua i le pupuni i tua, ‘ina ‘ia ‘aumai o mea na ia poloa‘i mai; sa lā lē iloa fo‘i o toeaina ‘ua lalafi i totonu.
19 ‘Ae ‘ua ulufafo o teine, ‘ona tūtūla‘i lea o toeaina e to‘alua, ma ‘ua lā tamomo‘e atu ‘iā te ia, ma ‘ua fai atu ‘iā te ia,
20 “Fa‘auta, ‘ua punitia o faitoto‘a o le togāla‘au, e leai se isi e iloa i tatou, a o maua ‘ua ma tu‘inanau ‘iā te oe; o le mea lea, ia e loto malie ia tatou momoe ma oe.
21 ‘Āfai ‘e te musu ai, ma te fai molimau ‘iā te oe, e fa‘apea: sa ‘iā te oe se taule‘ale‘a, o le mea lea na e ‘auina ‘ese ai o teine nai ‘iā te oe.”
22 ‘Ua ōi o Susana ma ‘ua fai ane, “‘Ua o‘otia lava a‘u i le ātu i ‘ou itū uma, auā a ‘ou faia lea mea, ‘ou te oti ai lava; ‘ae a ‘ou le faia, ‘ona ‘ou le ‘alo ‘ese lea i o ‘oulua lima.
23 Peita‘i, e lelei ‘iā te a‘u ‘ona ‘ou pa‘ū i o ‘oulua lima e aunoa ma sa‘u mea ‘ua faia, ‘ae leaga ‘ona ‘ou agasala i luma o le Ali‘i.”
24 ‘Ona ‘alaga lea o Susana ma le leo tele; a ‘ua ‘alalaga fo‘i o toeaina o fa‘asaga atu ‘iā te ia.
25 Ma ‘ua tamo‘e atu se tasi o i latou i le puipui o le togāla‘au ma ‘ua na tatalaina.
26 ‘Ua fa‘alogo e ‘au‘auna a le ‘āiga le ‘alaga i le togāla‘au, ‘ona latou feosofi atu lea i le ala o le faitoto‘a i le fia iloa po o le a lea mea.
27 A ‘ua tautala mai o toeaina, ‘ona matuā mamā lava lea o ‘au‘auna auā o le fa‘ato‘ā faia lava o se tala fa‘apea e uiga ia Susana.
28 ‘Ua ō mai ai le nu‘u ia Ioakima, lana tane, ‘ona ō mai fo‘i lea ma toeaina e to‘alua, o tūtūmu i lā‘ua i manatu leaga ia Susana, ‘ina ‘ia la fa‘ao‘o le oti ‘iā te ia.
29 Ma ‘ua la fa‘apea atu i luma o le nu‘u, “‘Ia ‘a‘ami ia Susana, le afafine o Hilikia, o le avā a Ioakima.” Ma ‘ua latou ‘a‘ami loa mai.
30 Ma ‘ua sau o ia mōna matua māna tama, ma lona ‘āiga ‘atoa.
31 A o Susana, sa matuā tino lelei ma le ‘aulelei lava.
32 A o ia tagata amio leaga ‘ua la poloa‘i ia se‘i‘esea ona ufimata, auā sa ufitia o ia, ‘ina ‘ia malilie ai fa‘apea fo‘i i lā‘ua i lona lālelei;
33 ‘ae sa fētāgisi ona ‘āiga ma i latou uma sa masani ma ia.
34 A ‘ua tutū mai o toeaina e to‘alua i totonu o le nu‘u, na la fa‘ae‘e o lā‘ua lima i lona ulu.
35 A o ia sa tagi ma tepa a‘e i le lagi, auā sa fa‘alagolago lona loto i le Ali‘i.
36 ‘Ua fai mai o toeaina, “Sa ma feoa‘i na o maua lava i le togāla‘au, ‘ona ulu mai ai lea lenei ma teine e to‘alua; ‘ona ia pupuni ai lea o faitoto‘a o le togāla‘au, ma ‘ua tu‘u o teine e ō ‘ese.
37 ‘Ona sau lea ‘iā te ia le taule‘ale‘a sa lafi, ma ‘ua la momoe.
38 A o i maua sa i le tulimanu o le togāla‘au, na ma iloa atu le amio leaga, na ma taufetuli ‘iā te i lā‘ua, na ma iloa atu i lā‘ua o momoe fa‘atasi.
39 A o le taule‘ale‘a na ma le lavā pu‘e, auā ‘ua sili lona malosi i lo maua, ‘ua tatala le faitoto‘a ma ‘ua sola ‘ese.
40 A o lenei mafine na ma pupu‘e, ‘ona mā fesili atu lea ‘iā te ia po o ai lenā taule‘ale‘a, ma ‘ua musu e fa‘aali mai. O lea lava le mea ‘ua molimau ai i maua.”
41 ‘Ua talitonu le motu o tagata ‘iā te i lā‘ua, auā o toeaina i lā‘ua ma fa‘amasino o le nu‘u; ma ‘ua fa‘asala ‘iā te ia i le oti.
42 A ‘ua ‘alaga ma le leo tele o Susana ma ‘ua fai atu, “Le Atua fa‘avavau e, o oe lē silasila i mea lilo, lē silafia mea uma a o le‘i taunu‘u,
43 ‘ua e silafia o le molimau pepelo lava ‘ua la molimau ai ‘iā te au; a o lenei o le a ‘ou oti, a ‘ua ou le faia lava se mea e tasi o mea ia na ta‘uleagaina fua ai a‘u e i lā‘ua ia ‘ona o le loto leaga.”
44 A ‘ua fa‘afofoga lava le Ali‘i i lona leo.
45 O lo‘o ta‘ita‘iina o ia e fasiotia, ‘ona fa‘aoso lea e le Ali‘i le agaga pa‘ia i le tama taule‘ale‘a, o Tanielu lona igoa;
46 ma ‘ua ‘alaga ma le leo tele, “‘Ua ou mamā lava a‘u i le toto o lenei fafine.”
47 Ma ‘ua sagai atu le nu‘u ‘atoa uma ‘iā te ia ma ‘ua latou fai atu, “Se a le ‘upu lea ‘ua e tautala ai?”
48 A ‘ua tu o ia i totonu o i latou ma ‘ua fai atu, “E fa‘apea ‘ona ‘outou vālelea, le fānau e a Isaraelu, ‘ua lē masino ‘iā te ‘outou, ‘ua ‘outou le mautinoa le mea moni, ma ‘ua ‘outou fa‘asalaina le tama fafine a Isaraelu?
49 ‘Ia ‘outou toe fo‘i atu i le fa‘amasinoga, auā ‘ua la molimau pepelo ‘iā te ia.”
50 Ma ‘ua toe fo‘i atu o le nu‘u ma le telelise, ‘ona fa‘apea mai lea o toeaina ‘iā te ia, “‘Inā sau ia, ma nofo i totonu o i matou ma fa‘aali mai le tonu, auā na tu‘u mai lava ‘iā te oe e le Atua le mamalu fa‘atoeaina.”
51 ‘Ona fai atu lea o Tanielu ‘iā te i latou, “‘Ia ‘outou ‘ave‘eseina i lā‘ua, ia mamao le tasi ma le tasi, ‘ona ‘ou fa‘amasino lea ‘iā te i lā‘ua.”
52 ‘Ua vavae‘eseina i lā‘ua, ‘ona ia vala‘au mai ai lea i le tasi o i lā‘ua ma ‘ua fai atu ‘iā te ia, “O oe lē na fa‘alevaleva ou aso i le amio leaga, o lenei ‘ua o‘o mai ‘iā te oe o āu agasala sa e fai anamua:
53 o fai fa‘amasinoga e le tonu, o fa‘asauā i ē amiotonu, o fa‘amāgalo atu i ē amio leaga, a o fetalai mai lava le Ali‘i: ‘Aua le fasioti le tagata e le sala ma lē ‘ua amiotonu.
54 O lenei la, ‘āfai na e iloa atu o ia, ta‘u mai po o lalo o le fea la‘au na e iloa atu i lā‘ua o talatala fa‘atasi?” A ‘ua fai mai o ia, “I lalo o le vavae.”
55 A ‘ua fai atu o Tanielu, “‘Ua e talapepelo tonu mo lou oti; auā e tu nei le agelu a le Atua, i le fa‘atonuga na maua mai ‘iā te ia, na te vavaeluaina oe.”
56 ‘Ua ‘auina ‘ese lenā, ‘ona poloa‘i lea ia sau le tasi, ma ‘ua fai atu ‘iā te ia, “Le fānauga e a Kanana ‘ae lē o Iuta, ‘ua fa‘asesēina oe i le ‘aulelei o le fafine, i le o le tu‘inanau na fulisia ai lou loto.
57 Sa fa‘apea ‘ona ‘outou faia i tama teine a Isaraelu, ma ‘ua fefefe i latou, sa tautala ‘iā te ‘outou; a o le tama teine a Iuta ‘ua lē ‘o‘ono o ia i la ‘outou amioletonu.
58 O lenei la, ta‘u mai po o lalo o le fea la‘au na e maua ai i lā‘ua o talatala fa‘atasi?” ‘Ua fai mai o ia, “I lalo o le tipolo.”
59 A ‘ua fai atu Tanielu, “‘Ua e talapepelo tonu fo‘i oe mo lou oti; auā o lo‘o tu le agelu a le Ali‘i, o i ai le pelu i lona lima, na te polo ia oe ma tipilua, na te fasioti lava ia ‘iā te ‘oulua.”
60 ‘Ona ‘alalaga lea o le fa‘apotopotoga uma ma le leo tele, ma ‘ua latou fa‘amanū atu i le Atua, na te fa‘aola ‘iā i latou ‘ua fa‘alagolago ‘iā te ia.
61 Ma ‘ua latou feosofi i toeaina e to‘alua, auā na fa‘aali tino e Tanielu ‘iā latou lava ‘upu na molimau pepelo i lā‘ua; ma ‘ua latou faia ‘iā te i lā‘ua e tusa ma le amio leaga a i lā‘ua i le uso tagata,
62 ‘ina ‘ia latou fa‘ataunu‘u le tulafono a Mose. Ma ‘ua latou fasioti ‘iā te i lā‘ua, ma ‘ua fa‘asaoina i lea aso le toto le nofosala.
63 A o Hilikia ma lana avā ‘ua lē fa‘amanū atu i le Atua mo lo lā‘ua tama teine o Susana, fa‘atasi ma Ioakima lana tane, ma ona ‘āiga uma, ‘ona ‘ua lē maua ‘iā te ia se mea matagā.
64 A o Tanielu ‘ua fa‘amamaluina o ia i luma o le nu‘u, e āfua mai i lea aso ma aso ‘ua mulimuli i ai.
65 A o le tupu o Asetuaki ‘ua fa‘atasia o ia mōna tamā, ma ‘ua talia lona mālō e Kuresa le Peresia.