1 ‘Ua lua tausaga o le nofoa‘iga a Nepukanesa, ‘ona fai ai lea o miti a Nepukanesa, ‘ua atuatuvale ai lona finagalo, ‘Ua lē iloa e ia sina moe.
2 ‘Ona fai atu lea o le tupu e ‘a‘ami i taulāitu, ma va‘afa‘atau, ma ē fai togafiti fa‘ataulāitu, ‘atoa ma le ‘au Kaletaia, o fa‘ailoa mai i le tupu ana miti; ‘ona latou ō mai ai lea ma tutū i luma o le tupu.
3 ‘Ona fai atu lea o le tupu ‘iā te i latou, “‘Ua fai la‘u miti, ‘ua atuatuvale ai lo‘u loto i le fia iloa le miti.”
4 ‘Ona fa‘apea mai ai lea o le ‘au Kaletaia i le tupu i le ‘upu Arama, “Le tupu e, ‘ia soifua oe e fa‘avavau. ‘Ia e fetalai mai le miti i au ‘au‘auna, ‘ona matou fa‘aali atu ai lea o le uiga.”
5 ‘Ua tali atu le tupu, ‘ua fa‘apea atu i le ‘au Kaletaia, “‘Ua mavae atu ‘iā te a‘u le mea; ‘āfai tou te lē fa‘ailoa mai ‘iā te a‘u le miti ma lona uiga, o le a vaevaeniniiina ‘outou, e fai fo‘i o ‘outou fale ma fa‘atafunaga.
6 ‘Ae ‘āfai tou te fa‘ailoa mai le miti ma lona uiga, tou te maua mai ‘iā te a‘u o mea alofa, ma le taui, ‘atoa ma le mamalu tele; o lenei, ‘ia ‘outou fa‘ailoa mai ‘iā te a‘u le miti ma lona uiga.”
7 ‘Ua toe tali mai i latou, ‘ua fa‘apea mai, “‘Inā fetalai mai ia le tupu i ana ‘au‘auna le miti, ‘ona matou fa‘ailoa atu ai lea o lona uiga.”
8 ‘Ua tali atu le tupu, ‘ua fa‘apea atu, “‘Ua ‘ou iloa lava tou te fa‘atuatuai, auā ‘ua ‘outou iloa ‘ua mavae atu ‘iā te a‘u le mea.
9 ‘Ae ‘āfai tou te lē fa‘ailoa mai ‘iā te a‘u le miti, e tasi lava le tulafono ‘iā te ‘outou; auā ‘ua ‘outou saunia ‘upu pepelo ma le fa‘a‘ole‘ole e fai mai ‘iā te a‘u, se‘ia fa‘atuatuai; o lenei, ‘inā ‘outou ta‘u mai ia ‘iā te a‘u le miti, ‘ona ‘ou iloa ai lea ‘ua ‘outou mafaia ‘ona fa‘ailoa mai ‘iā te a‘u lona uiga.”
10 ‘Ona tali mai ai lea o le ‘au Kaletaia i le tupu, ‘ua fa‘apea mai, “E leai se tagata i le lalolagi na te mafaia ‘ona fa‘ailoa mai le mea a le tupu; o le mea lea e leai ai se tupu, po o se ali‘i, po o se faipule ‘ua ia fetalai mai se mea fa‘apenā i se taulāitu, po o se va‘afa‘atau, po o se Kaletaia.
11 O le mea fo‘i ‘ua fetalai mai ai le tupu, e faigatā; e leai lava se tasi na te mafaia ‘ona fa‘ailoa atu i le tupu, na o atua lava latou te lē mau fa‘atasi ma tagata.”
12 O le mea lava lea na ita ai ma matuā lili ai le tupu, ‘ua fai atu fo‘i ‘ia fa‘aumatia le ‘au popoto uma o i Papelonia.
13 ‘Ona o‘o atu ai lea o le poloa‘iga ‘ia fasiotia le ‘au popoto; ‘ona latou sā‘ili ai lea ‘iā Tanielu ma ana uō ‘ia fasiotia.
14 ‘Ona tali atu lea o Tanielu ma le fa‘autauta ma le poto ‘iā Arioka le pule i le ‘au fa‘afeao i le tupu, o le na alu atu e fasioti i le ‘au popoto o i Papelonia;
15 ‘ua tautala atu ia, ‘ua fa‘apea atu ‘iā Arioka, le ‘ua i ai le pule mai le tupu, “Pe se a le mea ‘ua tele vave ai le poloa‘iga a le tupu?” ‘Ona fa‘ailoa lea o le mea e Arioka ‘iā Tanielu.
16 ‘Ona ulufale atu ai lea o Tanielu ma fa‘atoga atu i le tupu, se‘i fa‘atuatuai, ‘ona fa‘ailoa ai lea o le uiga i le tupu.
17 ‘Ona alu atu ai lea o Tanielu i lona fale ma na fa‘ailoa atu le mea ‘iā Hanania, ma Mesaelu, ma Asaria, o ana uō,
18 ‘ina ‘ia latou fa‘atoga atu ‘ia alofa mai le Atua o le lagi i lenei mea ‘ua lilo, ‘ia lē fa‘aumatia Tanielu ma ana uō fa‘atasi ma le ‘au popoto uma o i Papelonia.
19 ‘Ona fa‘aali mai ai lea i le fa‘aaliga i le po ‘iā Tanielu o le mea sa lilo; ‘ona fa‘amanū ai lea o Tanielu i le Atua o le lagi.
20 ‘Ua fai atu Tanielu, ‘ua fa‘apea atu:“‘Ia vi‘ia le suafa o le Atua e fa‘avavau, e fa‘avavau lava;auā e ona le poto ma le mana.
21 O ia fo‘i na te liua tausaga ma tau;e ‘ave‘eseina e ia o tupu, e tofia fo‘i e ia o tupu;Pe foa‘iina mai e ia le poto i ē o popoto,ma le malamalama i ē o iloa mafaufau.
22 O ia na te fa‘aalia mai mea loloto ma mea ‘ua lilo;‘ua na silafia le mea o lo‘o o i le pouliuli,o le malamalama fo‘i la te mau fa‘atasi ma ia.
23 ‘Ou te fa‘amanū ma vivi‘i atu ‘iā te oe,le Atua o o‘u tamā.O lē ‘ua foa‘iina mai ‘iā te a‘u le poto ma le malosi;‘ua e fa‘ailoaina Mai nei fo‘i ‘iā te a‘u le mea,sa matou ‘ai‘oi atu ai ‘iā te oe;auā ‘ua e fa‘ailoa mai ‘iā te i matou le mea a le tupu.”
24 ‘Ona ulufale atu ai lea o Tanielu ‘iā Arioka lē ‘ua tofia e le tupu e fa‘aumatia le ‘au popoto o i Papelonia; ‘ua alu atu ia ma fa‘apea atu ‘iā te ia, “‘Aua le fa‘aumatia le ‘au popoto o i Papelonia; tā ō ma oe i luma o le tupu, ‘ona ‘ou fa‘ailoa ai lea o le uiga i le tupu.”
25 ‘Ona fa‘ata‘alise lea ‘ona ulu atu o Arioka ma Tanielu i luma o le tupu, ‘ua na fa‘apea atu ‘iā te ia, “‘Ua ‘ou maua le tagata o le tāfeaga o Iuta na te fa‘ailoa atu le uiga i le tupu.”
26 ‘Ona fai mai lea o le tupu, ‘ua fa‘apea mai ‘iā Tanielu o le ‘ua igoa ia Peletisara, “‘Ua e mafaia ‘ea ‘ona fa‘ailoa mai ‘iā te a‘u le miti na a‘u iloa, ‘atoa ma lona uiga?”
27 ‘Ua tali atu Tanielu i luma o le tupu, ‘ua fa‘apea atu, “E lē mafai i ē popoto ma va‘afa‘atau ma taulāitu, ma ē o popoto i fetū, ‘ona fa‘aali atu i le tupu o le mea a le tupu ‘ua lilo na ia fetalai atu ai.
28 A o i ai le Atua i le lagi, o lē na te fa‘aalia mea ‘ua lilo ma fa‘ailoa mai ‘iā Nepukanesa le tupu o mea e o‘o mai i aso amulī. Sa fa‘apea lau miti ma le mea na e silafia i lou tofaga:
29 O oe, le tupu e, sa tutupu ou manatu i luga o lou tofaga i mea e o‘o mai i aso amulī. O lē na te fa‘aali mai mea ‘ua lilo ‘ua ia fa‘ailoa mai ‘iā te oe o mea o le a o‘o mai.
30 O a‘u fo‘i, e le‘i fa‘aalia mai ‘iā te a‘u lenei mea sa lilo ‘ona o se poto ‘ua ‘iā te a‘u e sili i tagata ola uma, na o lenei, ‘ona ia fa‘ailoa i le tupu, le uiga, ma ‘ia e silafia mānatunatu o lou finagalo.
31 “O oe, le tupu e, na e silafia, fa‘auta fo‘i o le tasi tupua tele; o lenei tupua tele sa ma‘eu lona matagofie, na tu i ou luma, sa mata‘utia fo‘i lona tino mai.
32 O le ulu o lenei tupua o le auro lelei lea, o lona fatafata ma ona, lima, o le ario ia; o lona manava ma ona ‘ogāvae o le ‘apamemea ia.
33 O ona vae, o u‘amea ia, o ona tapuvae o u‘amea isi mea, a o ‘omea isi mea.
34 Na e silasila ‘ua tofia le ma‘a ‘ae le‘i tofia i lima, na lavea ai le tupua i ona tapuvae na fai i u‘amea ma ‘omea, ‘ua nutilili‘i ai ia mea.
35 ‘Ona nutilili‘i fa‘atasiina ai lea o le u‘amea, o le ‘omea, o le ‘apamemea, o le ario, ‘atoa ma le auro, ‘ua pei o le aputi i le mea e soli ai saito, ‘ua lelea i le matagi, ‘ua lē maua lava se mea latou te i ai; a o le ma‘a na lavea ai le tupua ‘ua ‘avea lea ma mauga tele, ‘ua tumu ai le lalolagi uma.
36 “O le miti lenā, o le a matou ta‘uina atu fo‘i i le tupu lona uiga.
37 Le tupu e, o oe o le tupu o tupu; auā ‘ua foa‘iina mai ‘iā te oe e le Atua o le lagi le mālō ma le malosi ma le mamalu ma le vi‘iga;
38 ‘ua na avatu fo‘i ‘iā te oe mea uma e mau ai tagata ma manu o le vao ma manu felelei, ‘ua tu‘uina atu ia mea uma i lau pule; o le ulu auro o oe lava lea.
39 A mavae atu oe, ‘ona tu lea o le tasi mālō, e lē tusa ma oe; ma le tasi o lona tolu fo‘i o mālō, o le ‘apamemea lea, e pule fo‘i lea i le lalolagi uma.
40 O lona fa fo‘i o mālō e malosi ia pei o le u‘amea; auā e nutilili‘i ma tu‘imomomo mea uma i le u‘amea, e pei o le u‘amea ‘ona tu‘imomomo o ia mea uma e fa‘apea lea mālō ‘ona nutilili‘i ma tu‘imomomo.
41 E vaevaeina fo‘i le mālō, auā na e silafia tapuvae ma tamatama‘i vae o u‘amea isi mea, a o isi mea o ‘omea a le fai ipu ‘omea; ‘ae peita‘i e i ai lava ‘iā te ia le malosi o le u‘amea, auā na e silafia le u‘amea ‘ua filogia ma le ‘omea a le fai ipu.
42 O tamatama‘i vae fo‘i o u‘amea isi mea a o ‘omea isi mea, e fa‘apea lava le mālō, e malosi nisi mea ‘ae vaivai nisi mea.
43 Na e silafia le u‘amea ‘ua fefiloi ma le ‘omea a le fai ipu, e fa‘apea fo‘i ona filogia o i latou ma le fānau a tagata; ‘ae latou te lē pipi‘i le tasi i le tasi, e pei ‘ona lē filogia fo‘i o le u‘amea ma le ‘omea.
44 O ona po o ia tupu e fa‘atūina ai e le Atua o le lagi o le mālō e lē fa‘aumatia e fa‘avavau; o lea mālō fo‘i, e lē tu‘uina atu ia i se tasi nu‘u, na te tu‘imomomoina ma fa‘aumatia ia mālō uma lava, a o ia e tumau lava e fa‘avavau.
45 E pei ‘ona e silafia na tofia le ma‘a i le mauga, ‘ae le‘i tofia i lima ma na tu‘imomomoina le u‘amea, le ‘apamemea, le ‘omea, le ario, ‘atoa ma le auro. O mea ia ‘ua fa‘ailoa mai ai e le Atua silisili i le tupu o mea e o‘o mai amulī; e moni lava le li‘a, e fa‘amaoni fo‘i lona uiga.”
46 ‘Ona fa‘apa‘ū faō ai lea o Nepukanesa le tupu, ‘ua ifo ‘iā Tanielu, ‘ua ia fai atu latou te avatu ‘iā te ia se taulaga ‘atoa ma mea manogi.
47 ‘Ona fai atu lea o le tupu ia Tanielu, ‘ua fa‘apea atu, “E moni, o lo ‘outou Atua o le Atua o atua ia, ma le Ali‘i o tupu, o lē fa‘aali fo‘i i mea ‘ua lilo, auā ‘ua e mafaia ‘ona fa‘aali o lenei mea sa lilo.”
48 ‘Ona avatu ai lea e le tupu o le mamalu tele ‘iā Tanielu, ‘ua na foa‘i atu fo‘i ‘iā te ia mea alofa e tele ma le sili, na ia tofia fo‘i o ia e pule i le itū mālō uma o Papelonia, ia sili fo‘i o ia i ē pule i le ‘au popoto uma o Papelonia.
49 ‘Ua fa‘atoga atu Tanielu i le tupu, ‘ona ia tofia lea o Sataraka, o Mesako, ma Apeteniko latou te pule i sauniga a le itū mālō o Papelonia; a o Tanielu, sa nofo o ia i le faitoto‘a o le tupu.