1 Na faia e Nepukanesa le tupu o le tupua auro, e onogafulu kupita o lona umi lea; e ono kupita o lona lautele lea; na ia fa‘atūina i le fanua laugatasi o Turu i le itū mālō o Papelonia.
2 ‘Ua tu‘u sāvali e Nepukanesa le tupu ia fa‘apotopotoina ali‘i sili, o faipule, o ē pule i nu‘u, o fa‘amasino, o ē tausi tupe, o ē popoto i tulafono, o ē fa‘amatala tulafono, ‘atoa ma faipule uma o itū mālō, ia ō mai i le fa‘asāina o le tupua na fa‘atūina e Nepukanesa le tupu.
3 ‘Ona potopoto mai ai lea o ali‘i sili, o faipule o ē pule i nu‘u, o fa‘amasino, o ē tausi tupe, o ē popoto i tulafono, o ē fa‘amatala tulafono, ‘atoa ma faipule uma o itū mālō, ‘ua ō mai i latou i le fa‘asāina o le tupua na fa‘atūina e le tupu o Nepukanesa; ‘ona latou tutū ai lea i luma o le tupua na fa‘atūina e Nepukanesa.
4 ‘Ona ‘alaga atu lea o lē tala‘i ‘ua leo tele, “O le ‘upu ‘iā te ‘outou nu‘u e, ma atunu‘u ma gagana ‘ese‘ese.
5 Se itū aso tou te lagona ai le leo o le pū, le fa‘aili, le kitara, le sapeka, le saniteri, le sumefono, ‘atoa ma la‘aupese uiga ‘ese‘ese uma, tou te fa‘apa‘u‘ū ai ma ifo i le tupua auro ‘ua fa‘atūina e le tupu o Nepukanesa.
6 ‘Ai se tasi e le fa‘apa‘ū ma ifo e lafoina o ia i lea lava itū aso i totonu o le ‘ogāumu e mū ai le afi.”
7 O lenei fo‘i, ‘ua o‘o ‘ina lagona e tagata uma le leo o le pū, le fa‘aili, le kitara, le sapeka, le saniteri, ‘atoa ma la‘aupese uiga ‘ese‘ese uma, ‘ona fa‘apa‘u‘ū ai lea o nu‘u uma ma atunu‘u ma gagana ‘ese‘ese, ‘ua latou ifo i le tupua auro na fa‘atūina e le tupu o Nepukanesa.
8 ‘Ona ō ane ai lea o tagata Kaletaia ‘ua latou momoli i sa Iutā.
9 ‘Ua latou tautala atu, ‘ua fa‘apea atu i le tupu o Nepukanesa, “Le tupu e, ‘ia soifua oe e fa‘avavau.
10 Le tupu e na faia e oe le tulafono i tagata uma ‘ia fa‘apa‘u‘ū ma ifo i le tupua auro pe a lagona le leo o le pū, le fa‘aili, le kitara, le sapeka, le saniteri, le sumefono, ‘atoa ma la‘aupese uiga ‘ese‘ese uma lava.
11 ‘Ai se tasi ‘ua lē fa‘apa‘ū ma ifo, e lafoina o ia i totonu o le ‘ogāumu o mū ai le afi.
12 O i ai tagata o sa Iutā o ē na tofia e oe e pule i sauniga o le itū mālō o Papelonia, o Sataraka, o Mesako ma Apeteniko; le tupu e, ‘ua lē āva ia tagata ‘iā te oe, latou te lē ‘au‘auna i ou atua, ‘ua lē ifo fo‘i i latou i le tupua auro ‘ua e fa‘atūina.”
13 ‘Ona fai atu ai lea o Nepukanesa ma le lilivau ma le ita tele ‘ia ta‘ita‘iina mai Sataraka ma Mesako, ma Apeteniko. ‘Ona latou ta‘ita‘iina ai lea o ia tagata i luma o le tupu.
14 ‘Ua fai atu Nepukanesa, ‘ua fa‘apea atu ‘iā te i latou, “Sataraka e, Mesako e, ma Apeteniko, pe se matuā manatu ‘ea tou te lē ‘au‘auna i o‘u atua, ma ‘outou le ifo i le tupua auro na a‘u fa‘atūina?
15 O lenei, ‘āfai ‘ua saunia ‘outou pe a ‘outou lagona le leo o le pū, le fa‘aili, le kitara, le sapeka, le saniteri, le sumefono, ‘atoa ma la‘aupese uiga ‘ese‘ese uma, tou te fa‘apa‘u‘ū ma ifo i le tupua ‘ua a‘u faia e lelei; ‘ae ‘āfai tou te lē ifo, e lafoina ‘outou i lenā lava itū aso i totonu o le ‘ogāumu e mū ai le afi; o ai fo‘i se Atua na te lavea‘iina ‘outou ai la‘u pule?”
16 ‘Ua tali mai Sataraka, Mesako, ma Apeteniko, ‘ua fa‘apea mai i le tupu “Nepukanesa e, e lē aogā ‘ona matou tali atu ‘iā te oe i lenei mea;
17 ‘āfai o lea, ‘ua mafai lo matou Atua, matou te ‘au‘auna i ai, ‘ona lavea‘i mai ‘iā te i matou a‘i le ‘ogāumu e mū ai le afi, na te lavea‘iina mai lava i matou, a‘i lau pule le tupu.
18 ‘Ae peita‘i, a le o lea, ‘ia e silafia e oe le tupu matou te le ‘au‘auna i ou atua; o le tupua auro fo‘i ‘ua e fa‘atūina, matou te le ifo i ai.”
19 ‘Ona tumu ai lea o Nepukanesa i le ita tele, ‘ua ‘ese le tu o ona fofoga ‘iā Sataraka, ma Mesako, ma Apeteniko; ‘ua tautala atu ia, ‘ua fa‘apea atu: ‘Ia fa‘a‘a‘asa le ‘ogāumu, ia fa‘afitu ‘ona sili i le ‘ua masani ai ona tafuina.
20 ‘Ona fai atu ai lea o ia i tagata e sili ‘ona totoa i ana ‘au latou te fusifusi ‘iā Sataraka, ma Mesako, ma Apeteniko, ‘ia lafoina i le ‘ogāumu e mū ai le afi.
21 ‘Ona fusifusia ai lea o ia tagata, ‘atoa ma o latou ‘ofuvae, ma o latou ‘ofu tino ma o latou ‘ofu talaloa, ‘atoa ma o latou ‘ofu, ma na lafoina i totonu i le ‘ogāumu e mū ai le afi.
22 ‘Ua tauānau le poloa‘iga a le tupu, ma le ‘ogāumu ‘ua ‘a‘asa tele lava, o le mea lea na fano ai i le mumū o le afi o ia tagata ē na ‘ava‘e ‘iā Sataraka, ma Mesako, ma Apeteniko.
23 A o ia tagata e to‘atolu, o Sataraka, o Mesako, ma Apeteniko, ‘ua pa‘u‘ū i latou o fusifusia i totonu o le ‘ogāumu e mū ai le afi.
24 Sa latou sāvavali lava i totonu o le afi mū, o vivi‘i atu i le Atua ma fa‘amanū atu i le Ali‘i.
25 A ‘ua tu Asaria, ‘ua fa‘apenei ‘ona tatalo, ‘ua tālā mai o ia lona fofoga i totonu o le afi, ‘ua fa‘apea ane:
26 “‘Ia vi‘ia lava oe, le Ali‘i e, le Atua o matou tamā, ‘ua tatau ‘ona matuā vi‘ia ma fa‘amamaluina lou suafa e fa‘avavau:
27 auā ‘ua e amiotonu i mea uma na e faia ‘iā i matou, ‘ua fa‘amaoni au galuega uma lava, ‘ua tonu uma ou ala, ma ‘ua tonu uma au fa‘amasinoga.
28 Auā na e faia o fa‘amasinoga tonu e tusa ma mea uma na e fa‘ao‘o mai ‘iā i matou ma le ‘a‘ai pa‘ia o matou tamā, o Ierusalema, auā na e fa‘ao‘o mai mea uma ia i lau fa‘amasinoga tonu ‘ona o a matou agasala.
29 ‘Ua matou agasala, ‘ua matou faia le amioga leaga ‘ina ‘ua matou liliu ‘ese ‘iā te oe, ma ‘ua matou amio leaga i mea uma lava;
30 ma ‘ua matou lē fa‘alogo i āu poloa‘iga, ma ‘ua matou le tausia lava, ma matou le faia o mea na e poloa‘i mai ‘iā i matou ‘ina ‘ia matou manuia ai.
31 O mea uma lava na e fa‘ao‘o mai ‘iā i matou, o mea uma lava na e faia ‘iā te i matou, na e faia i le fa‘amasinoga tonu.
32 Ma ‘ua e tu‘uina i matou i lima o matou fili amio leaga, o ē aupito leaga ma le fouvale, ma le tupu amioletonu ma le aupito leaga o le lalolagi ‘atoa uma.
33 A o lenei ‘ua matou le mafafai ‘ona fai sa matou ‘upu; ‘ua faia i matou ma māsiasi ma tauemuga i āu ‘au‘auna ma i latou e gaua‘i ‘iā te oe.
34 Matou te ‘ai‘oi atu, ‘ia ‘aua ‘e te tu‘ulafoa‘iina i matou e fa‘avavau, ‘ona o lou suafa, ‘aua ne‘i e lepetia lava lau feagaiga;
35 ‘aua ne‘i e ‘ave‘esea lou agaalofa ‘iā i matou, ‘ona o Aperaamo, o lau uō pele, ‘ona o Isaako lau ‘au‘auna, ma Iakopo na e fa‘apa‘iaina;
36 na e fetalai mai ‘iā i latou, o folafola mai ‘e te fa‘ato‘ateleina la latou fānau e pei o fetū o le lagi, e pei o le oneone fo‘i i le matāfaga.
37 Auā ‘ua fa‘ato‘aitiitia i matou, le Ali‘i e, e itiiti lava i isi nu‘u uma, ma ‘ua maulalo i matou i le aso nei i le lalolagi uma, ‘ona o a matou agasala.
38 Ma ‘ua leai i ona po nei so matou ta‘imua, po o se ta‘ita‘i po o se perofeta, ‘ua leai se taulaga mū po o se taulaga i manu po o se taulaga mamā, po o se mea manogi po o se mea e molia ai mea fa‘apolopolo ‘iā te oe,
39 ‘ina ‘ia mafai ‘ona matou maua mai ai lou agaalofa. A ‘ia talia i matou i le loto momomo ma le agaga fa‘amaulalo;
40 e pei o se taulaga mū i mamoe po‘a ma povi po‘a, e pei o se taulaga i tama‘i mamoe pepeti e afe ma afe, ‘ia fa‘apea ‘ona faia la matou taulaga i ou luma i le aso nei, ‘ina ‘ia tali leleia e oe, auā e le māsiasi lava o ē fa‘alagolago ‘iā te oe.
41 A o lenei ‘ua matou mulimuli atu ‘iā te oe ma lo matou loto ‘ato‘atoa, ma ‘ua matou matata‘u ‘iā te oe ma ‘ua matou sā‘ili i ou fofoga.
42 ‘Aua ne‘i e fa‘amasiasi ‘iā i matou, a ‘ia e faia ‘iā i matou e tusa ma lou agalelei, e tusa fo‘i ma le faula‘iga o lou agaalofa.
43 Ma ‘ia e lavea‘i ‘iā te i matou i āu vāvega, ma ‘ia e fa‘amamalu lou suafa, le Ali‘i e;
44 ma ‘ia māsiasi i latou uma ‘ua fa‘ao‘o mai le leaga i āu ‘au‘auna, ‘ia māsiasi i latou i le ‘ato‘atoa o lou mana, ma ‘ia nutilili‘i lo latou malosi,
45 ma ‘ia iloa e i latou o oe lava le Ali‘i le Atua e to‘atasi ma le mamalu i le lalolagi ‘atoa uma.”
46 Ma ‘ua lē mapu lava o ‘au‘auna a le tupu na lafoina ai i latou i le afi e fa‘a‘a‘asa le ‘ogāumu i le nafeta ma le vavae, ma le pulu safeta ma tao mū;
47 ma ‘ua oso le afi mū e tusa ma tulilima e fagafulu ma le iva i luga o le ‘ogāumu;
48 ma ‘ua sasao i tua ma ‘ua susunuina ai o le ‘au Kaletaia ‘ua na maua i tala ane o le ‘ogāumu.
49 A o le agelu a le Ali‘i na alu ifo mai le lagi ‘iā Asaria mōna so‘o i le ‘ogāumu; ma ‘ua na lūlū‘eseina ai o le afi mū nai le ‘ogāumu,
50 ma ‘ua na ‘ave le loto i umu e pei o se matagi ‘ua agi mai i le itūlā o le sau; na lē tago lava le afi ‘iā te i latou pe fa‘atigā ‘iā i latou pe fa‘ao‘o i ai se fa‘asoesā.
51 ‘Ona vivi‘i atu lea ma fa‘amamalu atu ma fa‘amanū atu i le Atua i totonu o le ‘ogāumu o i latou ia e to‘atolu ma le ‘upu lava e tasi, o fa‘apea ane:
52 ‘Ia fa‘afetaia oe, le Ali‘i le Atua o matou tamā, ‘ia vi‘ia ma fa‘amamaluina, ma fa‘asilisilia i le fa‘avavau; ma ‘ia fa‘afetaia le suafa pa‘ia o lou mamalu, ma ‘ia vi‘ia ma ‘ia fa‘asilisilia i augatupulaga uma.
53 ‘Ia fa‘afetaia oe i le malumalu pa‘ia o lou mamalu, ma ‘ia matuā vi‘ia ma fa‘asilisilia oe i le fa‘avavau.
54 ‘Ia fa‘afetaia i le nofoāli‘i o lou mālō ma ‘ia matuā vi‘ia ma fa‘asilisilia oe i le fa‘avavau.
55 ‘Ia fa‘afetaia oe lē silasila i mea loloto ma ‘ua e ti‘eti‘e i luga o kerupi; ma ‘ia vi‘ia ma fa‘asilisilia oe i le fa‘avavau.
56 ‘Ia fa‘afetaia oe i le vanimonimo o le lagi, ma ‘ia vi‘ia ma fa‘amamaluina i le fa‘avavau.
57 O galuega uma a le Ali‘i, ‘ia ‘outou fa‘amanū i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
58 O agelu a le Ali‘i, ‘ia ‘outou fa‘amanū i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
59 O lagi, ‘ia ‘outou fa‘amanū i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
60 O vai uma i luga o le vanimonimo, ‘ia ‘outou fa‘amanū i le Ali‘i, ‘ia ‘outou vivi‘i ma fa‘asilisili ‘iā te ia i le fa‘avavau.
61 O ‘au o le lagi, ‘ia ‘outou fa‘amanū uma i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
62 O le lā ma le masina, ‘ia fa‘amanū i le Ali‘i; ‘ia ‘oulua vivi‘i ma fa‘asilisili ‘iā te ia i le fa‘avavau.
63 O fetū o le lagi, ia ‘outou fa‘amanū i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
64 O timuga ma le sau, ‘ia ‘outou fa‘amanū uma i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
65 O matagi uma a le Atua, ‘ia ‘outou fa‘amanū i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
66 Le afi ma le vevela, ‘ia ‘oulua fa‘amanū i le Ali‘i; ‘ia ‘oulua vivi‘i ma fa‘asilisili ‘iā te ia i le fa‘avavau.
67 Le malūlū ma le vevela, ‘ia fa‘amanū i le Ali‘i; ‘ia vivi‘i ma fa‘asilisili ‘iā te ia i le fa‘avavau.
68 O le sau ma le sauto‘a, ‘ia fa‘amanū i le Ali‘i; ‘ia vivi‘i atu ma fa‘asilisili ‘iā te ia i le fa‘avavau.
69 O le vaito‘a ma le malūlū, ‘ia fa‘amanū i le Ali‘i; ‘ia vivi‘i atu ma fa‘asilisili ‘iā te ia i le fa‘avavau.
70 O le ‘aisa ma le kiona, ‘ia fa‘amanū i le Ali‘i; ‘ia vivi‘i atu ma le fa‘asilisili ‘iā te ia i le fa‘avavau.
71 O po ma ao, ‘ia ‘outou fa‘amanū i le Ali‘i; ‘ia ‘outou vivi‘i atu ma fa‘asilisili ‘iā te ia i le fa‘avavau.
72 O le malamalama ma le pogisā, ‘ia fa‘amanū i le Ali‘i; ‘ia vivi‘i atu ma fa‘asilisili ‘iā te ia i le fa‘avavau.
73 O uila ma ao timu ia fa‘amanū i le Ali‘i; ‘ia vivi‘i atu ma fa‘asilisili ‘iā te ia i le fa‘avavau.
74 ‘Ia fa‘amanū le lau‘ele‘ele i le Ali‘i; ‘ia vivi‘i atu ma fa‘asilisili ‘iā te ia i le fa‘avavau.
75 O mauga ma mea maupu‘epu‘e, ‘ia ‘outou fa‘amanū i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
76 O mea uma e tutupu i le ‘ele‘ele, ‘ia ‘outou fa‘amanū i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
77 O vaipuna, ‘ia ‘outou fa‘amanū i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
78 O sami ma vaitafe, ‘ia ‘outou fa‘amanū i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
79 O tafolā ma mea uma e feoa‘i i le sami, ‘ia ‘outou fa‘amanū atu i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
80 O manu felelei uma o le vateatea, ‘ia ‘outou fa‘amanū i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
81 O manu fe‘ai uma ma manu vaefā, ‘ia ‘outou fa‘amanū i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
82 Le fānau a tagata, ‘ia ‘outou fa‘amanū i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
83 O Isaraelu, ‘ia fa‘amanū i le Ali‘i; ‘ia vivi‘i atu ma fa‘asilisili ‘iā te ia i le fa‘avavau.
84 O ositaulaga a le Ali‘i, ‘ia ‘outou fa‘amanū i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
85 O ‘au‘auna a le Ali‘i, ‘ia ‘outou fa‘amanū i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
86 O agaga ‘atoa ma agaga o tagata amiotonu, ‘ia ‘outou fa‘amanū i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
87 O tagata pa‘ia ma ē loto fa‘amaulalo, ‘ia ‘outou fa‘amanū i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau.
88 Hanania, Asaria, Mesaelu, ‘ia ‘outou fa‘amanū i le Ali‘i; ‘ia ‘outou vivi‘i ma fa‘asilisili ‘iā te ia i le fa‘avavau, auā ‘ua na fa‘aolaina i tatou nai seoli, ma ‘ua na fa‘asaoina i tatou a‘i lima o le oti, ma ‘ua na lavea‘i ‘iā i tatou a‘i totonu o le afi mū ‘a‘asa, ma na ta‘ita‘iina i tatou nai totonu o le afi.
89 Vivi‘i atu ‘outou i le Ali‘i, auā e lelei lava ia, auā e fa‘avavau lava lona alofa.
90 O ‘outou uma e lolotu, ‘ia fa‘amanū i le Ali‘i, le Atua o atua; ‘ia ‘outou vivi‘i ‘iā te ia ma ta‘uta‘u lona suafa, auā e o‘o lona agaalofa i le fa‘avavau lava.
91 ‘Ona matuā ofo ai lea o Nepukanesa le tupu, ‘ua vave ‘ona tula‘i, ‘ua fai atu, ‘ua fa‘apea atu i ana tulafale, “Pe na tatou le lafoina ‘ea tagata e to‘atolu o fusifusia i totonu o le afi?”‘Ua tali mai i latou, ‘ua fa‘apea mai i le tupu, “Le tupu e, sa fa‘apea lava.”
92 ‘Ua tali atu o ia, ‘ua fa‘apea atu, “Fa‘auta, na ‘ou iloa tagata e to‘afa, ‘ua tatalaina, ‘ua feoa‘i i totonu o le afi, ‘ua lē afaina lava i latou; ‘ua tino mai lona to‘afa ‘ua pei o se alo o le Atua.”
93 ‘Ona fa‘alatalata atu lea o Nepukanesa i le gutu o le ‘ogāumu e mū ai le afi, ‘ua fai atu ia, ‘ua fa‘apea atu, “Sataraka e! Mesako, ma Apeteniko, o ‘au‘auna a le Atua silisili, ō mai ia, ‘inā ō mai.” ‘Ona ō mai ai lea o Sataraka, Mesako, ma Apeteniko mai totonu o le afi.
94 ‘Ona fa‘apotopotoina ai lea o ali‘i sili, o faipule, e pule i nu‘u, ‘atoa ma tulafale a le tupu, ‘ua latou matamata i ia tagata ‘ua lē mafaia i le afi ‘ona mūina o latou tino, e leai fo‘i so latou lauulu ‘ua mū, e le‘i liua fo‘i o latou ‘ofuvae, ‘ua lē namu afi lava i latou.
95 ‘Ua fai atu Nepukanesa fa‘apea atu, “‘Ia fa‘afetaia le Atua o Sataraka, Mesako, ma Apeteniko o lē na ‘auina mai lana agelu e lavea‘iina ai ana ‘au‘auna ē na fa‘atuatua ‘iā te ia, ‘ua liliuina fo‘i le ‘upu a le tupu, ma ‘ua latou tu‘uina atu o latou tino ‘ina ne‘i latou ‘au‘auna ma ifo i se tasi atua, tau lava, o lo latou lava Atua.
96 O le mea lea ‘ou te pule ai: ‘Ai se nu‘u, po o se atunu‘u, po o se gagana ‘ese, na te faia se ‘upu vale i le Atua o Sataraka, Mesako, ma Apeteniko, e vaevaeniniiina i latou, e fai fo‘i o latou fale ma fa‘atafunaga; auā e leai se isi atua na te mafaia ‘ona lavea‘iina fa‘apenā.”
97 ‘Ona toma‘i lea o Sataraka, Mesako, ma Apeteniko i le itū mālō o Papelonia, i le pule a le tupu.