23 ‘Ou te fa‘amanū ma vivi‘i atu ‘iā te oe,le Atua o o‘u tamā.O lē ‘ua foa‘iina mai ‘iā te a‘u le poto ma le malosi;‘ua e fa‘ailoaina Mai nei fo‘i ‘iā te a‘u le mea,sa matou ‘ai‘oi atu ai ‘iā te oe;auā ‘ua e fa‘ailoa mai ‘iā te i matou le mea a le tupu.”
24 ‘Ona ulufale atu ai lea o Tanielu ‘iā Arioka lē ‘ua tofia e le tupu e fa‘aumatia le ‘au popoto o i Papelonia; ‘ua alu atu ia ma fa‘apea atu ‘iā te ia, “‘Aua le fa‘aumatia le ‘au popoto o i Papelonia; tā ō ma oe i luma o le tupu, ‘ona ‘ou fa‘ailoa ai lea o le uiga i le tupu.”
25 ‘Ona fa‘ata‘alise lea ‘ona ulu atu o Arioka ma Tanielu i luma o le tupu, ‘ua na fa‘apea atu ‘iā te ia, “‘Ua ‘ou maua le tagata o le tāfeaga o Iuta na te fa‘ailoa atu le uiga i le tupu.”
26 ‘Ona fai mai lea o le tupu, ‘ua fa‘apea mai ‘iā Tanielu o le ‘ua igoa ia Peletisara, “‘Ua e mafaia ‘ea ‘ona fa‘ailoa mai ‘iā te a‘u le miti na a‘u iloa, ‘atoa ma lona uiga?”
27 ‘Ua tali atu Tanielu i luma o le tupu, ‘ua fa‘apea atu, “E lē mafai i ē popoto ma va‘afa‘atau ma taulāitu, ma ē o popoto i fetū, ‘ona fa‘aali atu i le tupu o le mea a le tupu ‘ua lilo na ia fetalai atu ai.
28 A o i ai le Atua i le lagi, o lē na te fa‘aalia mea ‘ua lilo ma fa‘ailoa mai ‘iā Nepukanesa le tupu o mea e o‘o mai i aso amulī. Sa fa‘apea lau miti ma le mea na e silafia i lou tofaga:
29 O oe, le tupu e, sa tutupu ou manatu i luga o lou tofaga i mea e o‘o mai i aso amulī. O lē na te fa‘aali mai mea ‘ua lilo ‘ua ia fa‘ailoa mai ‘iā te oe o mea o le a o‘o mai.