1 Eitse ha Apolose a sa le Korinthe, Pauluse a haola dinaha tsa Asia tse kahodimo, a tla Efese, mme teng a fihlela barutuwa ba bang.
2 A re ho bona: Na le amohetse Moya o Halalelang, mohla le dumelang na? Yaba ba re ho yena: Ha re eso ho utlwe hore Moya o Halalelang o teng.
3 A re ho bona: Le kolobeditswe ka kolobetso efe na? Ba re: Ka kolobetso ya Johanne.
4 Pauluse a re: Efela Johanne o kolobeditse ka kolobetso ya pako, a bolella batho hore ba dumele ho ya tlang kamora hae, e leng Jesu Kreste.
5 Eitse ha ba utlwa hoo, ba kolobetswa lebitsong la Morena Jesu.
6 Yare ha Pauluse a ba beile matsoho, Moya o Halalelang wa tla hodima bona, ba bua dipuo, mme ba porofeta.
7 Banna bao bohle e ne e batla ho ba ba leshome le metso e mmedi.
8 Pauluse a kena sinagogeng, a bua a sa tshabe, a fetolana le Bajuda ka dikgwedi tse tharo, a ba kgodisa tabeng tsa mmuso wa Modimo.
9 Ba bang ha ba ithatafatsa, mme ba hana ho dumela, ba nyatsa le tsela ya Morena pela bongata, a tloha ho bona, a kgetha barutuwa, a ntoo ruta ka matsatsi wohle sekolong sa e mong ya bitswang Tirano.
10 Taba tseo tsa nna tsa eba jwalo ka dilemo tse pedi, bohle ba ahileng Asia ba ba ba utlwa lentswe la Morena Jesu, Bajuda le Bagerike.
11 Modimo wa nna wa etsa mehlolo e makatsang ka matsoho a Pauluse.
12 Esita dituku le masela a neng a amile mmele wa hae, a ne a bewa hodima ba kulang, mme malwetse a ne a ba tlohela, le meya e mebe e ne e tswa ho bona.
13 Yaba Bajuda ba bang, e leng dingaka tse reng di ntsha batemona, tse sollang hohle, ba leka ho bitsa lebitso la Morena Jesu hodima ba kenweng ke meya e mebe, ba re: Re a le laela ka Jesu ya bolelwang ke Pauluse.
14 Ba etsang hoo ba ne ba supile, e le bara ba Mojuda Skefa, moprista e moholo.
15 Empa moya o mobe wa ba araba, wa re: Jesu, ke a mo tseba, ke tseba le Pauluse; empa lona, le bomang?
16 Yaba motho eo motemona a leng ho yena, o itihela hodima bona, a ba beta, a ba etsa hampe, ba ba ba baleha tlung eo, ba hlobotse, ba le maqeba.
17 Taba eo ya tsejwa ke Bajuda kaofela le Bagerike ba ahileng Efese; ba welwa bohle ke tshabo, mme lebitso la Morena Jesu la tlotliswa.
18 Ba bangata ba dumetseng ba tla, ba ipolela le ho pepesa diketso tsa bona.
19 Le ba bangata ba neng ba tshepile ditaba tsa bonohe, ba tlisa dibuka tsa bona, ba di tjhesa pela bohle; ha ho lekanngwa theko ya tsona, ha fihlelwa hoba e lekane le ditjhelete tsa silefera tse dikete tse mashome a mahlano.
20 Lentswe la Morena la nna la ata jwalo, la sebetsa ka matla.
21 Kamora tseo, Pauluse a rera, ka kgopotso ya Moya, ho ya Jerusalema, ka tsela ya Masedonia le ya Akaea, a re: Etlare ha ke ile teng, e ka kgona ke bone le Roma.
22 Yaba o romela Masedonia, ba babedi ho ba mo tlatsang, e le Timothea le Eraste; haele yena, a hlola Asia matsatsi a mang.
23 Empa mehleng eo, moferefere o moholoholo wa hlaha bakeng sa Tsela ya Morena.
24 Hobane setei se seng sa silefera, se bitswang Demetriuse, se sebetsang ditempelana tsa Diana tsa silefera, se ne se ruisa haholo ba sebetsang mosebetsi oo;
25 sa ba bokella hammoho le ba bang ba mesebetsi e tshwanang le oo, sa re ho bona: Banna, le a tseba hobane mosebetsi wona ke leruo la rona.
26 Le a bona, le a utlwa, hoba Pauluse eo o se a kgodisitse batho ba bangata, e seng Efese feela, e batla ho ba Asia kaofela; o bile o ba kgelositse ka ho re, medimo e etswang ka matsoho hase medimo.
27 Kotsi ya taba eo, hase feela hore mosebetsi wa rona o tla nyediseha; empa le yona tempele ya mofumahadi Diana, modimo o moholo, e tla etswa lefeela; mme yena ka sebele ya hlomphuwang ke Asia kaofela le lefatshe lohle o tla timellwa ke kganya ya hae.
28 Yare ha ba utlwa hoo, ba tlala bohale, ba howa, ba re: O moholo, Diana wa Baefese!
29 Motse kaofela wa ba wa tlala moferefere; ba phallela theatereng hammoho hobane ba tshware Gaiuse le Aristarke, banna ba Masedonia, balekane ba Pauluse.
30 Pauluse o ne a rata ho hlaha pela setjhaba, empa barutuwa ba mo thibela.
31 Le ba baholo ba bang ba Asia, bao e leng metswalle ya hae, ba romela ho yena, ba rapela hore a se ke a hlaha theatereng.
32 Haele batho, ba bang ba ne ba howa ka hore, ba bang ka hore; hobane e ne e le pokano e moferefere, mme bongata jwa bona bo ne bo sa tsebe seo bo se bokanetseng.
33 Jwale ba ntsha Aleksandere hara bongata, a sutuletswa pele ke Bajuda; Aleksandere a hwehla ka letsoho, a rata ho ikarabela ho setjhaba.
34 Empa yare ha ba bona hobane ke Mojuda, ba howa kaofela ka lentswe le le leng, ka hora tse batlileng ho ba pedi, ba re: O moholo Diana wa Baefese!
35 Yaba mongodi wa motse o kgutsisa bongata, a re: Banna ba Efese, ke ofe motho ya sa tsebeng hobane motse wa Baefese ke mmoloki wa tempele ya Diana, modimo o moholo, le wa setshwantsho sa hae se weleng ho Jupitere?
36 Haele mona ditaba tseo di se na ho latolwa, e ka kgona le kgutse lerata, mme le se ke la etsa letho ka potlako.
37 Hobane banna bao le ba tlisitse mona, athe hase banyefodi, leha e le basebi ba modimo wa lona.
38 Ha ekaba Demetriuse le ba sebetsang le yena, ba ena le tseko le e mong, lekgotla le bulehile, le baahlodi ba teng; ha ba ke ba isane nyeweng.
39 Ekare ha le ena le taba e nngwe eo le e tsekang, e ka ahlolwa phuthehong e nang le tshwanelo.
40 Hobane re se re ikentse tsietsing ya ho botswa moferefere wa kajeno, haele mona ho se taba eo re ka itatolang ka yona bakeng sa pokano ena.
41 Yare hobane a bolele taba tseo, a kgutlisa batho.