1 Jwale, ha re se re kgaohane le bona, ra tloha, ra toba Kose; eitse ka le hlahlamang ra be re fihla Rhode; ha re tloha teng, ra kena Patara.
2 Teng, ra fumana sekepe se fetelang Fenisia; ra kena ho sona, ra tswela pele.
3 Yare ha re hlahela sehlekehleke sa Sipera, ra se teela ka ho le letshehadi, ra leba Siria, mme ra fihla Tire; hobane sekepe se ne se tshwanela ho phahlwa teng.
4 Mme kahobane re ne re fumane barutuwa teng, ra hlola moo matsatsi a supileng; mme bona ba bolella Pauluse ka Moya, hore a se ke a nyolohela Jerusalema.
5 Ha re se re qetile matsatsi ao, ra tloha, ra tsamaya; ha e le bona ba re felehetsa bohle ho fihlela kantle ho motse, ba ena le basadi ba bona le bana; ra kgumama ka mangwele lebopong, ra rapela,
6 ra dumedisana, ra ntoo kena sekepeng; yaba bona ba kgutlela hae.
7 Yare hobane re tswe Tire, ra kena Ptolemaise, moo leeto la rona la sekepe le feletseng teng; yaba re dumedisa baena, ra hlola tsatsi le le leng le bona.
8 Hosasane, ra tloha, mme ra fihla Sesarea; ra kena tlung ya Filipi, moevangeli, eo e neng e le e mong wa ba supileng, mme ra dula ha hae.
9 O ne a ena le baradi ba bane, barwetsana ba porofetang.
10 Yare ha re hlotse teng matsatsi a mang, moporofeta e mong, ya bitswang Agabuse, a fihla a etswa Judea.
11 Eitse hobane a tle ho rona, a nka senyepa sa Pauluse, a itlama matsoho la maoto ka sona, a re: Moya o Halalelang o bolela, o re: Monna eo senyepa sena e leng sa hae, Bajuda ba tla mo tlama jwalo Jerusalema, ba be ba mo neele matsohong a baditjhaba.
12 Jwale, ha re utlwa taba tseo, ra mo rapela, re ena le ba motse oo, hore a se ke a nyolohela Jerusalema.
13 Pauluse a mpa a araba, a re: Le etsang ha le lla jwalo, le ho tepeletsa pelo ya ka? Athe ke itokiseditse, e seng ho tlangwa feela, empa e le le ho shwela lebitso la Morena Jesu Jerusalema.
14 A hana ho kgodiswa ke rona, ra ba ra kgutsa, ra re: Ho etswe se ratwang ke Morena!
15 Kamora ditshiu tseo, ha re se re itokisitse, ra nyolohela Jerusalema.
16 Barutuwa ba bang ba Sesarea le bona ba ya le rona, ba re isa ha Mnasone, morutuwa wa kgale, ya tswang Sipera, eo re neng re tshwanetse ho fapohela ha hae.
17 Eitse ha re fihla Jerusalema, baena ba re amohela ka thabo.
18 Hosasane, Pauluse a ya le rona ha Jakobo; baholo bohle ba ne ba phuthehetse teng.
19 Eitse hobane a ba dumedise, a ba phetela ka hlomahanyo tsohle tseo Modimo o di entseng ditjhabeng ka tshebetso ya hae.
20 Jwale, ha ba utlwa taba tseo, ba tlotlisa Morena; ba mpa ba re ho yena: Ngwaneso, o ka bona bongata ba dikete tsa Bajuda ba dumetseng; hape ba sa tjhesehela molao kaofela ha bona.
21 Ba boleletswe, ho thwe, o ruta Bajuda bohle ba ditjhabeng ho kgaohana le Moshe, o re, ba se ke ba bolotsa bana ba bona, mme ba se ke ba ya ka mekgwa ya bona.
22 Jwale, ho ka etswa jwang moo? Ruri bongata bo tla phutheha; hobane ba tla utlwa hoba o fihlile.
23 Ako etse hle seo re ya o bolella sona: Mona re na le banna ba bane ba itlamileng ka kano.
24 O ye le bona, o itlhwekise le bona, o ba lefelle, ba tle ba beolwe dihlooho, bohle ba tle ba tsebe kahoo, hobane ha ho na letho la tseo ba di utlwileng o bolelwa ka tsona; ba tsebe hobane le wena o ntse o bolokile molao.
25 Haele baditjhaba ba dumetseng, re ba ngoletse hoba re ahlotse hore ba se ke ba tlangwa ka tse jwalo; feela, ba tele tse hlabetsweng medimo, le madi, le tse fenethilweng, le bofebe.
26 Yaba Pauluse o ya le banna bao, a itlhwekisa le bona ka la hosasane, a kena tempeleng, a bolela matsatsi a ho itlhwekisa ha bona moo a tla kgutla teng, ho be ho hlahiswe sehlabelo sa teboho sa e mong le e mong wa bona.
27 Eitse ha matsatsi a supileng a le lekgatheng la ho fela, Bajuda ba Asia ba mmona tempeleng; yaba ba tsosa bongata bohle, ba mo tshwara,
28 ba howa, ba re: Banna ba Iseraele, tlatsang; suna motho ya ntseng a ruta batho kaofela kahohle thuto e lwantshang setjhaba, le molao, le nqalo ena; o bile o ekeditse ka ho tlisa Bagerike tempeleng, o bile o silafaditse nqalo ena e halalelang.
29 Ya be e le kahobane ba ne ba bone Trofime wa Efese le yena hara motse; ba ne ba hloma ekaba Pauluse o mo tlisitse tempeleng.
30 Yaba motse kaofela o a ferekana; batho ba phallela hammoho; ba tshwara Pauluse, ba mo hulela kantle ho tempele, ba ntoo kwala menyako kapele.
31 Eitse ha ba batla ho mmolaya, molaodi wa lekgotla la sekete a bolellwa hore Jerusalema kaofela o ferekane.
32 A phakisa a tla le bahlabani le balaodi ba makgolo, a theohela ho bona; mme eitse ha ba bona molaodi wa sekete le bahlabani, ba lesa ho otla Pauluse.
33 Yaba molaodi wa sekete o atamela, a mo tshwara, a laela hore a tlangwe ka mahlaahlela a mabedi; a ntoo botsa hobane ke mang, le hoba seo a se entseng keng?
34 Empa ba bang ba ne ba howa ka hore, ba bang ka hore hara bongata. Mme ka hobane a ne a sitwa ho fihlela nnete ka baka la lerata, a laela hore a iswe qhobosheaneng.
35 Eitse ha a fihla methating, o ne a hlile a jerwe ke bahlabani ka baka la matla a bongata.
36 Hobane bongata jwa batho bo ne bo mo latela, bo ntse bo howa, bo re: A a bolawe!
37 Pauluse ha a se a tla kenngwa qhobosheaneng, a re ho molaodi wa sekete: Na nka dumellwa ho bua taba le wena na? Molaodi a re: Na o tseba Segerike na?
38 Na hase wena Moegepeta elwa, ya tsositseng moferefere tshiung tse fetileng, a ba a isa dihlola tse kete tse nne feelleng na?
39 Pauluse a re: Nna, ke Mojuda, motala wa Tarese, motse wa Silisia o tumileng. Ke a o kopa, o ntese, ke bue le setjhaba.
40 Eitse hobane a mo lesele, Pauluse ha a ntse a eme methating, a hwehla batho ka letsoho, mme ha ho itswe tu haholo, a bua ka puo ya Seheberu, a re: