Diketso

²²Yaba o romela Masedonia, ba babedi ho ba mo tlatsang, e le Timothea le Eraste; haele yena, a hlola Asia matsatsi a mang. ²³Empa mehleng eo, moferefere o moholoholo wa hlaha bakeng sa Tsela ya Morena. ²⁴Hobane setei se seng sa silefera, se bitswang Demetriuse, se sebetsang ditempelana tsa Diana tsa silefera, se ne se ruisa haholo ba sebetsang mosebetsi oo; ²⁵sa ba bokella hammoho le ba bang ba mesebetsi e tshwanang le oo, sa re ho bona: Banna, le a tseba hobane mosebetsi wona ke leruo la rona. ²⁶Le a bona, le a utlwa, hoba Pauluse eo o se a kgodisitse batho ba bangata, e seng Efese feela, e batla ho ba Asia kaofela; o bile o ba kgelositse ka ho re, medimo e etswang ka matsoho hase medimo. ²⁷Kotsi ya taba eo, hase feela hore mosebetsi wa rona o tla nyediseha; empa le yona tempele ya mofumahadi Diana, modimo o moholo, e tla etswa lefeela; mme yena ka sebele ya hlomphuwang ke Asia kaofela le lefatshe lohle o tla timellwa ke kganya ya hae. ²⁸Yare ha ba utlwa hoo, ba tlala bohale, ba howa, ba re: O moholo, Diana wa Baefese!