Diketso

¹Eitse hobane moferefere ona o kokobele, Pauluse a bitsa barutuwa, a ba dumedisa, a ntoo tloha, a ya Masedonia. ²Ha a se a qetile naha eo, mme a kgothaditse baena ka dipolelo tse ngata, a ya naheng ya Bagerike. ³A dula teng kgwedi tse tharo; mme ha a se a ya tloha ka sekepe ho ya Siria, a eletswa ho kgutla ka la Masedonia, kahobane Bajuda ba ne ba mo laletse. ⁴A felehetswa ho ya fihla Asia ke Sopatere wa Berea, le Aristarke le Sekundo le Gaiuse bao e leng ba Thesalonika; le Timothea wa Derba, le Tikike, le Trofime, bao e leng ba Asia. ⁵Bao ba re etella pele, ba ya re emela Troase. ⁶Haele rona, ra kena sekepeng motseng wa Filipi, matsatsi a mahobe a se nang ditomoso ha a se a fetile, mme ra ya ba fihlela Troase kamora matsatsi a mahlano, ra ba ra dula teng matsatsi a supileng.