Diketso

¹⁰Pauluse a re: Ke eme lekgotleng la Sesare, moo ke tshwanetseng ho ahlolwa teng; haele ho Bajuda, ha ke a ka ka etsa ho kgopo, jwaloka ha le wena o tseba hantlentle. ¹¹Ha ekaba ke entse ho kgopo ho e mong, kapa ha ke entse ho hong ho tshwanelang lefu, ha ke hane ho shwa; empa ha ho se nnete tabeng tseo ba nqosang ka tsona, ha ho motho ya ka nneang bona; ke ipea ho Sesare. ¹²Yaba Festuse o kopanya molomo le lekgotla, a ntoo re ho yena: O ipeile ho Sesare, o tla ya ho Sesare. ¹³Eitse ha ho se ho fetile matsatsi a mang, morena Agripa le Berenise ba tla Sesarea ho dumedisa Festuse. ¹⁴Yare ha ba hlotse ho yena matsatsi a mang, Festuse a phetela morena ditaba tsa Pauluse, a re: Monna e mong o teng mona, eo Felikse a mo siileng a tlamilwe. ¹⁵Ha ke le Jerusalema, baprista ba baholo le baholo ba Bajuda ba mo qositse ho nna, ba kopa hore a ahlolwe. ¹⁶Ka mpa ka ba araba, ka re: Hase mokgwa wa Baroma ho neela motho lefung, ya qoswang a eso ho kopanngwe le baqosi ba hae, a eso ho fuwe le sebaka sa ho ikarabela hodima tseo a qoswang ka tsona.