Diketso

²³Hobane lengeloi la Modimo, oo ke leng wa wona, oo ke o sebeletsang, le itlhahisitse ho nna bosiung bona, ²⁴la re: Pauluse, o se ke wa tshaba; e ka kgona o hlahe pela Sesare, mme bona, Modimo o o neile bohle ba etang le wena sekepeng sena. ²⁵Banna, betang dipelo ke hona; hobane ke fela ke kgolwa hoba Modimo o tla etsa kamoo o mpoleletseng kateng. ²⁶Empa e ka kgona re lahlelwe sehlekehlekeng se seng. ²⁷Eitse ka bosiu ba leshome le metso e mene, ha re iswa mane le mane lewatleng la Adria, bohareng ba bosiu, beng ba sekepe ba lekanya hoba ba atametse lefatshe le leng. ²⁸Ha ba hlohlotsa bodiba ba metsi, ba fihlela ditekanyo tsa boahlamo ba matsoho tse mashome a mabedi; kapejana, ba boela ba hlohlotsa, mme ba fihlela ditekanyo tsa boahlamo ba matsoho tse leshome le metso e mehlano. ²⁹Mme kahobane ba ne ba tshaba hoba mohlomong re ka hohlomela mafikeng, ba dihela diankora tse nne ka maraong a sekepe, se tle se eme, mme ba lebella bosiu ho sa.