Diketso

¹Yare hobane ba pholohe jwalo, ba fihlela hoba sehlekehleke seo se bitswa Melita. ²Babarebare ba teng ba re etsa ka mohau o moholo; hobane ba re amohela bohle, ba ba ba re besetsa mollo o moholo ka baka la pula e neng e ena, le ka baka la serame. ³Empa Pauluse, hobane a rwalle ditjhatjhana tsa dithupana tsa morara, a di akgela mollong; yaba noha e tswa teng ka baka la ho futhumala, ya kgomarela letsoho la hae. ⁴Babarebare ha ba bona noha eo e leketla letsohong la hae, ba bolellana, ba re: Ruri motho enwa ke mmolai; hobane, leha a pholohile metsing, tefetso ya lehodimo e hana hoba a ka phela. ⁵Empa Pauluse a hlohlorela noha mollong, e se ke ya mo etsa letho. ⁶Kanthe ba ne ba lebeletse hore o tla ruruha, leha e le ho wa kapele a shwele; empa yare ha ba lebeletse haholo, mme ba bone hoba ha a jewe ke letho, ba fetoha, ba re: Ke modimo. ⁷Mabapa le moo, ho ne ho le naha ya moholo wa sehlekehleke, ya bitswang Publiuse; le yena a re amohela hantle, a re nkela tlung ya hae ka matsatsi a mararo.