Diketso

¹⁶Mohla re fihlang Roma, molaodi wa lekholo a neela batlamuwa matsohong a molaodi wa bahlabani; Pauluse yena a leselwa, a dula a nnotshi le mohlabani ya mo lebelang. ¹⁷Kamora matsatsi a mararo, Pauluse a mema bao e leng ba baholo hara Bajuda ba teng. Eitse ha ba phuthehile, a re ho bona: Banna ba heso, leha ke sa ka ka etsa letho ho sitelwa setjhaba leha e le mekgwa ya bontata rona ka lona, ke ile ka tlangwa Jerusalema, ka ba ka neelwa matsohong a Baroma. ¹⁸Bao, hobane ba mpotse, ba ne ba rata ho ntokolla, kahobane ho ne ho se molato ho nna o tshwanelang lefu. ¹⁹Empa Bajuda ha ba hana, ka ipea ho Sesare ka tsietsi eo, e seng kahobane ke na le seo nka qosang setjhaba sa heso ka sona. ²⁰Ke ka baka leo ke le bitsitseng ho le bona le ho bua le lona; hobane ke tlamilwe ka lehlaahlela lena ka baka la tshepo ya Iseraele. ²¹Ba re ho yena: Ha re eso ho bone mangolo a tswang Judea, a bolelang taba tsa hao, leha e le ho banababo rona ha ho e mong ya tlileng a re bolella, leha e le ya hlahisitseng taba e mpe hodima hao. ²²Leha ho le jwalo, re tshwanetse ho utlwa ho wena tseo o di hopotseng; hobane haele thuto eo, re a tseba hore e hanwa kahohle.