Diketso

¹⁹Yaba o ja dijo, mme matla a boela ho yena.Saule a dula le barutuwa ba leng Damaseka matsatsi a mang. ²⁰A phakisa a bolela Jesu masinagogeng, a tiisa hore ke Mora wa Modimo. ²¹Ba mo utlwang kaofela ba ne ba makala, ba re: Na eo hase yena ya neng a hlorisa hampe ba rapelang lebitso leo Jerusalema, a bile a tlile le mona ho ba tlama le ho ba isa ho baprista ba baholo na? ²²Haele Saule, a nna a ipha matla a maholo, a hlola Bajuda ba ahileng Damaseka, ka ho ba bontsha hore Jesu ke Kreste. ²³Kamora tsiu tse ngatanyana, Bajuda ba rera ho mmolaya; ²⁴empa Saule a tsebiswa morero wa bona. Ba ne ba lebela menyako ya motse, motshehare le bosiu, hore ba tle ba mmolaye; ²⁵empa barutuwa ba mo nka bosiu, ba ema hodima lerako, ba mo lepelletsa fatshe ka seroto.