1 Eitse hobane Joshua a timele, bana ba Iseraele ba botsa Jehova, ba re: Ke mang ho rona ya tla simolla ho futuhela Bakanana le ho ba lwantsha?
2 Jehova a araba, a re: Ho futuhe Juda; bonang, ke neetse lefatshe matsohong a hae.
3 Juda a bolella Simeone ngwanabo, a re: A re nyolohele le wena fatsheng leo ke le abetsweng, re tle re futuhele Bakanana, re ntoo ya le wena ho le abetsweng wena. Mme Simeone a ya le yena.
4 Juda a nyoloha, mme Jehova a neela Bakanana le Baferese matsohong a bona, mme ba bolaya banna ba kete tse leshome Beseke.
5 Ba fihlela Adoni-Beseke motseng wa Beseke, ba mo lwantsha, mme ba qhala Bakanana le Baferese.
6 Adoni-Beseke a baleha, mme ba mo phallela, ba mo tshwara, ba mo poma menwana e metona ya matsoho le ya maoto.
7 Yaba Adoni-Beseke o re: Marena a mashome a supileng a pomilweng menwana e metona ya matsoho le ya maoto, a ne a thola makumane katlasa tafole ya ka. Modimo o buseditse ho nna seo ke se entseng. Ba mo isa Jerusalema, mme a shwela teng.
8 Yaba bana ba Juda ba futuhela Jerusalema, ba o kena; ba bolaya baahi ba teng ka bohale ba lerumo, mme ba tjhesa motse.
9 Bana ba Juda ba ntoo theoha, ho ya futuhela Bakanana ba ahileng dithabeng, le Borwa, le lehwatateng.
10 Hape, ba Juda ba futuhela Bakanana ba ahileng Hebrone (bitso la pele la Hebrone e ne e le Kiryath-Arba), mme ba hlola metse ya Sheshai, le Akimane, le Talmai.
11 Eitse ha ba tloha teng, ba futuhela ba ahileng Debire (bitso la pele la Debire e ne e le Kiryathe-Sefere).
12 Kalebe a re: Leha e ka ba mang ya tla hlola Kiryathe-Sefere, a o kene, ke tla mo nea moradi wa ka Aksa, e be mosadi wa hae.
13 Othniele, mora Kenase, moena Kalebe, a o kena, mme Kalebe a mo nea moradi wa hae Aksa, hore e be mosadi wa hae.
14 Aksa ha a fihla hae, a susumetsa monna wa hae hore a qele tshimo ho ntatae. Ebile Aksa o theoha eseleng ya hae, mme Kalebe a re ho yena: Taba ya hao ke efe?
15 Yena a re: Ntshitse ka ho hong; hobane o nneile naha e lebileng nqa borwa; mphe le didiba. Kahoo, Kalebe a mo nea didiba tse kahodimo, le didiba tse katlase.
16 Haele bana ba Mokene, mohwehadi wa Moshe, ba ne ba tlohile motseng wa Dipalema, ba nyolohetse le bana ba Juda feelleng la Juda, le leng ka nqa borwa ho Arade; mme ba tla, ba aha le batho ba teng.
17 Hape, Juda ba tsamaya le Simeone ngwanabo, ba ya, ba hlola Bakanana ba ahileng Tsefathe, mme ba ba neela anathema. Ka baka leo, motse oo wa rewa lebitso la Horma (anathema).
18 Juda a nka le Gasa le naha ya teng, le Ashkelone le naha ya teng, le Ekrone le naha ya teng.
19 Jehova a ba le Juda, mme Juda a hapa dithaba, a mpa a sitwa ho tlosa ba ahileng lehwatateng, kahobane ba ne ba na le makoloi a tshepe.
20 Kalebe yena a newa Hebrone, kamoo Moshe a neng a boletse kateng, mme a leleka bara ba bararo ba Anake teng.
21 Haele bana ba Benjamine, ha ba ka leleka Bajebuse ba ahileng Jerusalema; ka baka leo, Bajebuse ba nna ba aha Jerusalema le bana ba Benjamine ho fihlela kajeno.
22 Ba ntlo ya Josefa bona ba nyolohela Bethele, mme Jehova a ba le bona.
23 Ba ntlo ya Josefa ba romela ho hlwela Bethele (bitso la pele la motse oo e ne e le Luse).
24 Dihlwela tsa bona motho ya tswang motseng, tsa re ho yena: Ako re supise moo motse o ka kenwang, mme re tla o etsetsa mohau.
25 Eitse hobane a ba supise moo motse o ka kenwang, ba bolaya ba motse ka bohale ba lerumo, ba mpa ba hauhela motho eo le bohle ba ntlo ya hae.
26 Motho eo a fallela naheng ya Bahethe, mme a haha motse teng, a o rea lebitso la Luse. Esale lebitso la wona le kajeno.
27 Manasse yena ha a ka a leleka batho ba Bethe-Sheane le ba metse ya teng, leha e le ba Thaanake le ba metse ya teng, leha e le ba ahileng Dore le ba metse ya teng, leha e le ba ahileng Jibleame le ba metse ya teng, leha e le ba ahileng Meggido le ba metse ya teng; Bakanana ba mpa ba hanella naheng eo.
28 Eitse hobane Baiseraele ba iphe matla, ba ntshisa Bakanana lekgetho, ba mpa ba se ke ba ba lelekela ruri.
29 Haele Efraime, ha a ka a leleka Bakanana ba ahileng Gesere; Bakanana ba nna ba aha le bona Gesere.
30 Sabulone yena ha a ka a leleka ba ahileng Kitrone, leha e le ba ahileng Nahalole; Bakanana ba nna ba aha le bona, ba mpa ba ba ntshetsa lekgetho.
31 Asere, ha a ka a leleka ba ahileng Akko, leha e le ba ahileng Sidone, le Aklabe, le Aksibe, le Helba, le Afike, le Rehobe.
32 Baasere ba nna ba aha le Bakanana ba ahileng naheng eo, ba se ke ba ba leleka.
33 Nefthali yena ha a ka a leleka ba ahileng Bethe-Shemeshe, leha e le ba ahileng Bethe-Anathe; a nna a aha le Bakanana ba ahileng naheng eo; ba ahileng Bethe-Shemeshe le Bethe-Anathe ba mpa ba mo ntshetsa lekgetho.
34 Baamore ba patisa bana ba Dane dithabeng, ba se ke ba ba dumella ho theohela lehwatateng.
35 Kahoo, Baamore ba hanella Hare-Herese, le Ajalone, le Shaalbime; leha ho le jwalo, ba ntlo ya Josefa ba ba imela, ba ba ba ntshiswa lekgetho.
36 Haele naha ya Baamore e ne e tloha thabeng ya Akrabbime, lefikeng, le ho ya nqa hodimo.