1 Mohlang oo, ho ne ho se morena Iseraeleng. Mohlang oo, ba leloko la Dane ba ne ba ipatlela naha ya lefa eo ba ka ahang ho yona, hobane ba ne ba eso ho bone lefa la bona melokong ya Iseraele ho fihlela tsatsi leo.
2 Bana ba Dane ba kgetha, hara bona bohle, banna ba bahlano ba bohale, ba bana ba Tsorea le Eshthaole, mme ba ba romela ho ya hlwela naha le ho e lekola. Ba re ho bona: Eyang, le lekole naha. Ba ya, ba ba ba fihla ha Mika, thabeng ya Efraime, mme ba robala teng bosiu.
3 Ba re ba se ba le haufi le ntlo ya Mika, ba tseba lentswe la mohlankana wa Molevi; ba fapohela ho yena, ba re ho yena: O tlisitswe kwano ke mang? O etsang mona, mme taba ya hao mona ke efe?
4 A re ho bona: Mika o nkentse ka hore le hore; o nnea moputso, mme nna ke moprista wa hae.
5 Ba re ho yena: Ako botse Modimo, re tle re tsebe ha ekaba leeto la rona le tla atleha na?
6 Moprista a re: Eyang ka kgotso; leeto la lona leo le le nkileng le pela Jehova.
7 Yaba banna bao ba bahlano ba tloha, ba fihla Laishe, ba bona batho ba teng ba dutse ba iketlile ka mokgwa wa Basidone, ba dutse ka boiketlo le ka kgotso, ho se motho ya nang le borena naheng eo, ya nang le matla a ho ba etsa hampe, ba le hole le Basidone, ba se na taba le batho ba bang.
8 Yaba ba boela ho banababo bona, ba leng Tsorea le Eshthaole. Banababo bona ba re: Le tlisitse dife?
9 Ba re: Emang, re ba futuhele, hobane re bone naha; ke naha e ntle haholo. Le duletseng? Se tswafeng ho tsamaya le ho ya rua naha eo.
10 Ha le fihla teng le tla fihlela setjhaba se iketlileng; le yona naha e phatlaletse kahohle; hobane Modimo o e neetse matsohong a lona; hape, ke naha e sa hlokeng letho la tsohle tse lefatsheng.
11 Ha ho le jwalo, banna ba makgolo a tsheletseng ba leloko la Badane ba tloha Tsorea le Eshthaole, ba hlometse.
12 Ba nyoloha, ba ya emisa Kiryathe-Jearime, Juda; ka baka leo, bitso la teng ya eba Mahane-Dane (diahelo tsa Dane), ho fihlela kajeno. Ke kamora Kiryathe-Jearime.
13 Ha ba tloha teng, ba fihla ha Mika, thabeng ya Efraime.
14 Banna ba bahlano ba neng ba ile ho hlwela naha ya Laishe, ba bolella banababo bona, ba re: Na ha le tsebe hobane efoda e teng mona matlung ao, le diterafime, le setshwantsho se betlilweng, le se tsholotsweng na? Jwale, bonang seo le tla se etsa.
15 Kahoo, ba fapohela teng, ba kena tlung ya mohlankana wa Molevi, tlung ya Mika, mme ba mmotsa tsa ho phela ha hae.
16 Haele banna ba makgolo a tsheletseng, ba hlometseng, ba bana ba Dane, bona ba ema pela monyako.
17 Jwale, banna ba bahlano ba neng ba ile ho hlwela naha, ba nyoloha, ba kena, mme ba nka setshwantsho se betlilweng, le efoda, le diterafime, le setshwantsho se tsholotsweng, moprista yena a ntse a eme monyako hammoho le banna ba makgolo a tsheletseng ba hlometseng.
18 Eitse hobane bao ba bahlano ba kene tlung ya Mika, ha ba se ba nkile setshwantsho se betlilweng, le efoda, le diterafime, le setshwantsho se tsholotsweng, moprista a re ho bona: Le etsang?
19 Ba re ho yena: Thola, o thibe molomo wa hao ka letsoho, o tsamaye le rona, o be ntata rona le moprista wa rona; haele hore o be moprista wa ntlo ya motho a le mong, kapa o be moprista wa leloko le le leng le wa lesika le le leng la Iseraele, ho molemo ho wena e ka ba hofe na?
20 Yaba pelo ya moprista e a thaba; a nka efoda, le diterafime, le setshwantsho se betlilweng, a tla a ema hara batho bao.
21 Ba ntoo tloha, ba ikela; ba etelletsa bana pele, le mehlape, le diphahlo.
22 Ba re ba se ba le hole le ntlo ya Mika, ba ahisaneng le Mika ba phuthwa ka mokgosi, mme ba phallela bana ba Dane.
23 Ba howeletsa bana ba Dane; bao, ha ba reteleha, ba re ho Mika: O jewa keng ha o etla o ba phuthile ka mokgosi?
24 A re: Le nkile medimo ya ka eo ke e entseng, le moprista wa ka, mme le ile le bona; jwale, ke saletswe ke eng na? Le mpotsa jwang, ha le re: O jewa keng?
25 Bana ba Dane ba re ho yena: O se ke wa re utlwisa lentswe la hao, esere mohlomong banna ba pelo tse halefang ba le wela hodimo, mme wa itshenyetsa bophelo ba hao le ba ntlo ya hao.
26 Yaba bana ba Dane ba tswela pele tseleng ya bona. Haele Mika, ha a bona hobane ba mo feta ka matla, a kgutla, a ipoella tlung ya hae.
27 Haele bao, eitse hobane ba nke ntho tseo Mika a di entseng, le moprista wa hae ba fihla Laishe, batho ba teng ba ntse ba dutse ka kgotso le ka boiketlo; ba ba bolaya ka bohale ba lerumo, mme ba tjhesa motse.
28 Ha ho a ka ha eba motho ya namolelang motse, hobane o ne o le hole le Sidone, hape batho ba teng ba ne ba se na taba le ba bang. Motse oo o ne o le kgohlong e Bethe-Rehobe. Ba boela ba tsosa motse, ba aha teng.
29 Mme motse oo ba o rea lebitso la Dane, ka lebitso la Dane ntata bona, ya neng a tswaletswe Iseraele. Empa bitso la pele la motse e ne e le Laishe.
30 Bana ba Dane ba ikemisetsa setshwantsho se betlilweng. Jonathane, mora Gershone, mora Moshe, le bara ba hae, ya eba baprista ba leloko la Dane, ho fihlela mohla ba naha eo ba iswang kgolehong.
31 Ba ikemisetsa setshwantsho se betlilweng, se entsweng ke Mika, mme ha nna ha eba jwalo ka ditshiu tsohle tseo ntlo ya Modimo e nnileng ya eba Silo ka tsona.