1 Kamora Abimeleke, ha hlaha Thola, mora Pua, mora Dodo, monna wa Issaskare, ho namolela Iseraele; o ne a ahile Shamire, thabeng ya Efraime.
2 A ahlolela Iseraele ka lemo tse mashome a mabedi a metso e meraro, a ntoo shwa, a patwa Shamire.
3 Kamora hae, ha hlaha Jaire, Mogileade; yena a ahlolela Iseraele ka dilemo tse mashome a mabedi a metso e mmedi.
4 O ne a na le bara ba mashome a mararo, ba kallang diesele tse mashome a mararo; ba ne ba na le metse e mashome a mararo naheng ya Gileade, e reilweng lebitso la Havvoth-Jaire le kajeno.
5 Jaire a shwa, mme a patwa Kamone.
6 Bana ba Iseraele ba boela ba etsa ho leng hobe pela Jehova; ba sebeletsa boBaale le boAshtarothe, le medimo ya Siria, le medimo ya Sidone, le medimo ya Moabe, le medimo ya bana ba Ammone, le medimo ya Bafilesta; ba furalla Jehova, ba lesa ho mo sebeletsa.
7 Yaba kgalefo ya Jehova e tukela Baiseraele, mme a ba rekisetsa matsohong a Bafilesta le matsohong a bana ba Ammone.
8 Ka selemo seo ba tshwenya, ba hatakela bana ba Iseraele hampe; hape ba tshwenya bana ba Iseraele bohle ba leng mose wane wa Jordane, naheng ya Baamore, e leng Gileade, ka dilemo tse leshome le metso e robileng meno e le mmedi.
9 Bana ba Ammone ba tshela Jordane ho ya lwantsha Juda, le Benjamine, le ntlo ya Efraime, mme Baiseraele ba tsieleha haholo ke hona.
10 Yaba bana ba Iseraele ba howeletsa ho Jehova, ba re: Re o sitetswe, etswe re furaletse Modimo wa rona, re sebeleditse boBaale.
11 Jehova a re ho bana ba Iseraele: Ha ke re, ke se nkile ka le namolela matsohong a Baegepeta, le a Baamore, le a bana ba Ammone, le a Bafilesta na?
12 Le mohla le neng le tshwenngwa ke Basidone le Baamaleke le Bamidiane, la howeletsa ho nna, mme ka le namolela matsohong a bona.
13 Le mpa le mphuraletse, le sebeleditse medimo esele; ka baka leo, ha ke sa tla hlola ke le namolela.
14 Eyang, le howeletse ho medimo eo le ikgethetseng yona, e ke e le namolele nakong ena ya tsietsi ya lona.
15 Bana ba Iseraele ba re ho Jehova: Re sitilwe; etsa ka rona kahohle kamoo o ratang kateng; feela, o re namolele kajeno.
16 Yaba ba lahla medimo esele e hara bona, mme ba sebeletsa Jehova; Jehova a utlwela Baiseraele bohloko ka baka la tsietsi ya bona.
17 Bana ba Ammone ba phutheha, ba tla, ba emisa Gileade; le bona bana ba Iseraele ba phutheha, ba ya, ba emisa Mitspe.
18 Yaba batho le baholo ba Gileade ba botsana, ba re: Ke mang ya tla qala ho lwantsha bana ba Ammone na? Ya qalang e tla ba yena hlooho ya bohle ba ahileng Gileade.