1 Kamora tseo, Roboame a ya Sikeme, hobane Baiseraele bohle ba ne ba bokanetse Sikeme ho mmea morena.
2 Eitse Jeroboame, mora Nebathe, ha a utlwa — Jeroboame o ne a le Egepeta, moo a neng a balehetse teng ke ho tshaba morena Salomone, a ile ho dula Egepeta ke hona —
3 ba romela ho mmitsa; Jeroboame, ba ena le phutheho yohle ya Iseraele, ba tla, ba bolella Roboame, ba re:
4 Ntatao o re jarisitse joko e boima; ha o ka qephisa tshebetso e thata ya ntatao le joko ya hae e boima, eo a re jarisitseng yona, re tla o sebeletsa.
5 A re ho bona: A le keng le ye, ditshiu di be tharo, le ntoo boela ho nna. Mme setjhaba sa ya.
6 Ebile morena Roboame o rera le banna ba baholo, ba neng ba eme pela ntatae Salomone, ha a sa phela, a re: Nkeletseng, taba ke efe eo ke tla araba setjhaba sena ka yona na?
7 Ba mmolella, ba re: Ha o ka ipea mohlanka wa setjhaba sena kajeno wa ba sebeletsa, wa ba dumella, wa ba bolella mantswe a molemo, teng e tla nne e be bahlanka ba hao kamehla.
8 Empa a lesa keletso eo banna ba baholo ba mo eleditseng ka yona, a ya botsa banna ba batjha, ba neng ba hodile le yena, ba emeng pela hae.
9 A re ho bona: Lona le nkeletsa ka taba efe eo ke tla araba setjhaba sena ka yona, kamoo se itseng ho nna kateng: Qephisa joko eo ntatao a re jarisitseng yona?
10 Banna ba batjha, ba neng ba hodile le yena, ba mo araba, ba re: E re ho setjhaba sena se o boleletseng, sa re: Ntatao o re jarisitse joko e boima, wena, o e qephise; e re ho bona: Monwana wa ka o monyenyane o motenya ho letheka la ntate.
11 Ntate o le jarisitse joko e boima, nna ke tla le ekeletsa jwale; ntate yena o le otlile ka phafa, nna ke tla le otla ka diphepheng.
12 Ka la boraro, Jeroboame le setjhaba kaofela ba tla ho Roboame, kamoo morena a neng a itse kateng: Le tle le boele ho nna ka la boraro.
13 Morena a fetola setjhaba ka thata, a lesa keletso eo banna ba baholo ba neng ba mo eleditse ka yona.
14 A bolela keletso ya banna ba batjha, a re: Ha ntate a le jarisitse joko e boima, nna ke tla le ekeletsa; ntate yena o le otlile ka diphafa, nna ke tla le otla ka diphepheng.
15 Morena a hana jwalo ho mamela setjhaba; ya eba taba e hlahisitsweng ke Jehova, hore a tle a phethe taba ya hae, eo Jehova a e boleletseng Jeroboame, mora Nebathe ka Akija wa Silo.
16 Ha Baiseraele bohle ba bona hobane morena ha a ba mamele, setjhaba sa fetola morena, sa re: Kabelo ya rona ke efe ho Davida? le lefa ha re na lona ho mora Jese. Weleng, Baiseraele, ikeleng tenteng tsa lona! Davida, iponele ntlo ya hao! Yaba Baiseraele ba ikela tenteng tsa bona.
17 Haele bana ba Iseraele ba ahileng metseng ya Juda, ba buswa ke Roboame.
18 Jwale morena Roboame a roma Adorame, molaodi wa ba hlwailweng; empa Baiseraele bohle ba mo tlepetsa ka majwe, a shwa. Yaba morena Roboame o itlhahanela, a kena koloing ya hae, a balehela Jerusalema.
19 Baiseraele ba kwenehela ntlo ya Davida jwalo, ho fihlela la kajeno.
20 Yare Baiseraele bohle ha ba utlwa hore Jeroboame o boile, ba romela ho mmiletsa phuthehong; teng, ba mmea morena wa Baiseraele bohle, ho se leloko le latetseng ntlo ya Davida, haese la Juda le nnotshi.
21 Roboame, ha a fihla Jerusalema, a phutha ntlo yohle ya Juda le leloko la Benjamine, e le bahlabani ba dikete tse lekgolo le mashome a robileng meno e le mmedi, ho ya lwantsha ntlo ya Iseraele, le ho busetsa mmuso wohle ho Roboame, mora Salomone.
22 Empa lentswe la Modimo la tlela Shemaia, monna wa Modimo, la re:
23 Bolella Roboame, mora Salomone, morena wa Juda, le ntlo yohle ya Juda le ya Benjamine, le ho setseng ha setjhaba, o re:
24 Jehova o re: Se futuheleng banababo lona, bana ba Iseraele; ikgutlelleng e mong le e mong tlung ya hae, hobane taba eo ke ka nna e etsahetseng. Ba mamela lentswe la Jehova, ba kgutlela hae ka molomo wa Jehova.
25 Haele Jeroboame, a aha Sikeme, thabeng ya Efraime, a dula teng. A ntoo tloha, a ya aja Peniele.
26 Jeroboame a bua pelong ya hae, a re: Jwale, mmuso o tla boela tlung ya Davida;
27 ha setjhaba sena se ka nna sa nyoloha ho ya hlaba mahlabelo tlung ya Jehova, Jerusalema, dipelo tsa setjhaba sena di tla boela ho monga sona, Roboame, morena wa Juda; mme ba tla mpolaya, ba tle ba boele ho Roboame, morena wa Juda.
28 Morena a imamela jwalo, a ntoo etsa manamane a mabedi a kgauta a re ho setjhaba: Le ile halelele Jerusalema; Baiseraele, medimo ya lona ke ena, e le nyolotseng naheng ya Egepeta.
29 Yaba o bea e nngwe Bethele, e nngwe a e bea Dane.
30 Taba ena ya eba kgopiso, hobane setjhaba sa ya kgumamela namane, ho fihlela Dane.
31 A etsa matlo nqalong tse phahameng, a bea ba bang baprista hara setjhaba sohle, bao e seng bana ba Levi.
32 Jeroboame a ntoo hloma mokete ka kgwedi ya boroba meno e le mmedi, ka tsatsi la leshome le metso e mehlano la kgwedi, o kang mokete o etswang Juda; mme a hlaba mahlabelo aletareng. A etsa jwalo le Bethele, a hlabela manamane ao a a entseng, mme a bea Bethele baprista ba nqalo tse diphahameng, tse hahilweng ke yena.
33 A hlaba mahlabelo aletareng eo a e entseng Bethele ka tsatsi la leshome le metso e mehlano la kgwedi ya boroba meno e le mmedi, e leng kgwedi eo a e hopotseng e le yena, mme a etsetsa bana ba Iseraele mokete, a hlaba mahlabelo aletareng, a tjhesa le dibano.