1 Salomone a etsa setswalle le Faro, morena wa Egepeta; a nyala moradi wa Faro, a mo tlisa motseng wa Davida, ho fihlela a phetha ho haha ntlo ya hae, le ntlo ya Jehova, le lerako le teelang Jerusalema hare.
2 Batho ba ne ba ntse ba hlabela nqalong tse diphahameng, hobane mohlang oo, ntlo e be e eso ho hahelwe lebitso la Jehova.
3 Salomone a rata Jehova, a tsamaya ka melao ya ntatae Davida; feela, a nna a hlaba nqalong tse diphahameng, a tjhesa le dibano teng.
4 Morena a ya le Gibeone, ho hlabela teng, hobane e be e le yona nqalo e phahameng e kgolo; Salomone a hlaba ditjheso tse sekete aletareng ya teng.
5 Jehova a iponahatsa ho Salomone, Gibeone, ka toro ya bosiu, mme Modimo wa mmolella, wa re: Kopa seo ke tla o nea sona.
6 Salomone a re: O entse ntate Davida, mohlanka wa hao, ka lereko le leholo kamoo a nnileng a tsamaya pela hao kateng, ka nnete, le ka ho loka, le ka bokgabane ba pelo; o mmoloketse tshitso e kgolo ka ho mo nea mora, hore a dule teroneng ya hae, jwalokaha ho le jwalo kajeno.
7 Jwale, Jehova, Modimo wa ka, o beile mohlanka wa hao morena, tulong tsa ntate Davida; athe nna ke mohlankanyana feela, ha ke tsebe le ho itsamaisa.
8 Mme mohlanka wa hao o hara setjhaba sa hao seo o se kgethileng; ke setjhaba se seholohadi, se ke keng sa lekanngwa, se ke keng sa balwa ka baka la bongata ba batho ba sona.
9 O nee ke hona mohlanka wa hao pelo e kelello ya ho ahlolela setjhaba sa hao, ke tle ke tsebe ho kgetha botle le bobe. Hobane ke mang ya ka ahlolelang setjhaba sa hao se sekakale?
10 Polelo eo ya kgahlisa Morena, hobane Salomone a kopile taba eo.
11 Modimo wa re ho yena: Erekaha o kopile taba eo, o sa ka wa ikopela matsatsi a mangata, leha e le lefumo, leha e le ho shwa ha dira tsa hao, o mpa o ikopetse kelello ya ho tseba ho ahlola,
12 bona, ke se ke entse kamoo o boletseng kateng. Bona, ke o nea pelo e kelello le kutlwisiso; le pele ha ho a ka ha eba le a mong ya kang wena, le morao ho ke ke ha hlaha le a mong ya kang wena.
13 Ke o nea le seo o sa kang wa se kopa, lefumo le kganya, mme ho ke ke ha eba morena le ya mong ya tla ba ka ka wena ka matsatsi wohle a hao.
14 Hape, ha o tsamaya tseleng tsa ka, o boloka taelo tsa ka le melao ya ka, kamoo ntatao Davida a tsamaileng kateng, ke tla atisa matsatsi a hao.
15 Yaba Salomone o a tsoha, a bona e le toro. A tla Jerusalema, a ema pela areka ya selekane sa Jehova, a hlabela ditjheso, a hlaba le mahlabelo a teboho, mme a etsetsa bahlanka ba hae bohle mokete.
16 Ha ntoo tla ho morena basadi ba babedi ba diotswa, ba ema pela hae.
17 E mong mosadi a re: Oho, monga ka, re dutse ntlo e le nngwe le mosadi enwa; ka itshihlolla tlung, eo a le teng.
18 Ha feta matsatsi a mararo ke itshihlolotse, le mosadi enwa a itshihlolla; re ne re le hammoho, ho se motho osele ka tlung, e le rona ba babedi feela ka tlung.
19 Yaba ngwana wa mosadi enwa o timela bosiu, hobane mmae a mo pitlile.
20 A tsoha bosiu bo boholo, a tlosa mora wa ka pela lehlakore la ka, lekgabunyane la hao le sa robetse, mme a mo robatsa sefubeng sa hae, a mpa a bea mora hae ya timetseng sefubeng sa ka.
21 Hosasa ha ke tsoha, ke re ke anyesa mora wa ka, ka bona a se a timetse; empa ha ke mo qamakisisa hosasa, ka bona e se mora ka eo ke mo tswetseng.
22 Mosadi e mong a re: Tjhe, enwa ya phelang ke mora ka; ya timetseng ke mora hao. Teng, wa pele a fetola, a re: Tjhe, ya timetseng ke mora hao, mora ka ke ya phelang. Ba buisana jwalo pela morena.
23 Morena a re: E mong o re: Ya phelang ke mora ka; mme mora hao ke ya shweleng; wa bobedi o mo fetola, o re: Tjhe, mora hao ke ya shweleng, ya phelang ke mora ka.
24 Yaba morena o re: Ntlisetseng sabole. Ba tlisetsa morena sabole.
25 Morena a re: Petsolang ngwana ya phelang kalehare, le nee mosadi e mong mokgekgetho o mong, e mong a nke mokgekgetho o mong.
26 Empa mosadi eo ngwana ya phelang e leng wa hae, a sehwa ke mala ka baka la ngwana hae, mme a bolella morena, a re: Oho, monga ka, ha ho mpe ho newe enwa ngwana ya phelang, a se ke a bolawa. Empa e mong a re: E ke ke ya eba wa ka, leha e le wa hao; a petsolwe.
27 Yaba morena o fetola, a re: Neang eo ngwana ya phelang, a se ke a bolawa; efela ke mmae.
28 Baiseraele bohle, ha ba utlwa kahlolo eo morena a ahlotseng ka yona, ba tshaba morena, ba bona hobane kelello ya Modimo e ho yena, hore a tsebe ho ahlola.