1 Eitse ha Hirame, morena wa Tire, a utlwa hoba Salomone o tlotsitswe ho ba morena tulong tsa ntatae, a romela bahlanka ba hae ho yena; etswe Hirame a ne a ratile Davida le mehla.
2 Salomone yena a romela ho Hirame, a re:
3 O a tseba hobane ntate Davida o sitilwe ho hahela lebitso la Jehova, Modimo wa hae, ntlo, ka baka la dintwa tse mo hlahetseng hohle, ha ba ha fihla nako eo Jehova a beileng dira tsa Davida tlasa maoto a hae.
4 Haele nna, Jehova, Modimo wa ka, o mphomoditse ka nqa tsohle; ha ho sera le matsoso.
5 Bona, ke hopotse ho hahela lebitso la Jehova, Modimo wa ka, ntlo, jwalokaha Jehova a boleletse ntate Davida, a re ho yena: Mora wa hao eo ke tla mmea teroneng ya hao tulong tsa hao, ke yena ya tla hahela lebitso la ka ntlo.
6 Mme jwale, laela o re, batho ba hao ba nthomele dikedare Lebanone; bahlanka ba ka ba tla tlatsana le bahlanka ba hao; ke tla o nea moputso wa bahlanka ba hao, kamoo o tla mpolella kateng; hobane o a tseba hoba ha ho motho ho rona ya tsebang ho rema difate jwaloka Basidone.
7 Eitse Hirame ha a utlwa polelo tsa Salomone, a thaba haholo, a re: Ho bokwe Jehova kajeno, hobane o neile Davida mora ya bohlale ho busa setjhaba seo se seholo.
8 Yaba Hirame o romela ho Salomone, a re: Ke utlwile kamoo o rometseng ho nna kateng; haele dikedare le dikiprese, ke tla o etsetsa kamoo o ratang kateng.
9 Bahlanka ba ka ba tla di lata Lebanone, ba di theosetse lewatleng; ke tla di bapisa hammoho, di iswe ka lewatle moo o tla laela, di lokollwe teng; o tla di lata, mme ha o file ba ntlo ya ka dijo, etlaba o phethile seo ke se lakatsang.
10 Ebile moo Hirame a neang Salomone dikedare le dikiprese, kamoo a ratang kateng.
11 Salomone a nea Hirame koro e dikore tse dikete tse mashome a mabedi, e be dijo tsa ba ntlo ya hae, le dikore tse mashome a mabedi tsa ole e hlwekileng; Salomone a nna a nea Hirame ho le hokalo ka lemo se seng le se seng.
12 Jehova a nea Salomone, bohlale, jwalokaha a ne a mmaletse; kgotso ya eba teng mahareng a Hirame le Salomone, mme ba babedi ba etsa selekane hammoho.
13 Yaba morena Salomone o kgetha banna hara Baiseraele bohle; ha kgethwa banna ba dikete tse mashome a mararo.
14 A romela kete tse leshome Lebanone ka kgwedi e nngwe le e nngwe, a nna a ba fapanya, hore ba dule kgwedi e nngwe Lebanone, kgwedi tse pedi ba di dule hae. Adonirame a bewa mohlahlobi wa ba kgethilweng.
15 Salomone a roma banna ba dikete tse mashome a supileng ba bajari, le ba dikete tse mashome a robileng meno e mmedi ba betlang majwe dithabeng,
16 ho sa balwe matona a maholo a Salomone a laelang mosebetsi, a dikete tse tharo tse nang le makgolo a mararo, a lebelang ba sebetsang mosebetsi oo.
17 Morena a laela hore ho tliswe majwe a matonanahadi, le majwe a hlokwang, ho tle ho thewe ntlo ka majwe a betlilweng.
18 Dihahi tsa Salomone le dihahi tsa Hirame, le ba Gibale ba a betla, ba lokisa difate le majwe a tla haha ntlo.