1 Mohlang oo, Bafilesta ba phutha makgotla a bona ho futuha, mme ba phuthehela Soko wa Juda, ba tla, ba emisa mahareng a Soko le Aseka, pela Efese-Dammime.
2 Saule le banna ba Iseraele le bona ba phutheha, ba tla, ba emisa pela sekgutlo sa Ela, mme ba hlopholla makgotla ho ya kgahlanyetsa Bafilesta.
3 Bafilesta ba ema thabeng e nngwe, Baiseraele le bona ba ema thabeng e maloka le yona, thota e le teng mahareng a bona.
4 Ebile monaila o tswa makgotleng a Bafilesta, lebitso la hae e le Goliathe wa Gathe; bolelele ba hae e ne e le ditswe tse tsheletseng tse nang le boahlamo ba seatla.
5 O ne a rwetse heleme ya koporo hloohong, a apere seaparo sa maqephe a koporo, boima ba seaparo seo e le kete tse hlano tsa dishekele tsa koporo.
6 O ne a rwetse dikgohlo tsa koporo dihlafung tsa hae, a jere le lerumo la koporo pakeng tsa mahetla.
7 Theko ya lerumo la hae e ne e le kgolo jwaloka sefate sa molohi, boima ba tshepe ya lona e ne e le makgolo a tsheletseng a dishekele tsa tshepe; lehlahana la hae le ne le mo eteletse pele.
8 A tla a ema, a hoeletsa makgotla a Iseraele, a re ho wona: Le tswetse eng, haele moo le hlopholotse makgotla? Ha ke re, nna ke Mofilesta, lona le bahlanka ba Saule na? Ikgetheleng monna, a theohele ho nna.
9 Ha ekaba a ka lwana le nna, a mpolaya, re tla ba bahlanka ba lona; ha nka mo hlola, ka mmolaya, le tla ba bahlanka ba rona, le re sebeletse.
10 Mofilesta a eketsa, a re: Kajeno, ke nyedisa makgotla a Iseraele; nneeng monna, re lwane le yena.
11 Saule le Baiseraele bohle ha ba utlwa mantswe a Mofilesta eo, ba tshaba, mme ba tshoha haholo.
12 Haele Davida, e ne e le mora Moefrata eo wa Bethlehema wa Juda, eo lebitso la hae e leng Jese; o ne a na le bara ba robileng meno e le mmedi; e ne e se e le monna ya tsofetseng hara banna ba bang mehleng ya Saule.
13 Bara ba Jese ba bararo ba baholo ba ne ba latetse Saule ntweng. Mabitso a bara ba hae ba bararo ba ileng ntweng, la wa matsibolo e ne e le Eliabe, la ya mo hlahlamang e le Abinadabe, la wa boraro e le Shamma.
14 Davida yena e ne e le e monyenyane; baholwane ba hae ba bararo ba ne ba latetse Saule.
15 Davida o ne a etela Saule, a boele a kgutle, ho ya disa dinku tsa ntatae Bethlehema.
16 Haele Mofilesta, o ne a ntse a atamela hosasa le mantsiboya; a itlhahisa jwalo ka matsatsi a mashome a mane.
17 Jese a re ho mora hae Davida: Isetsa banabeno efa ya koro e hadikilweng le dipolokwe tsena tse leshome, o titimele ho banabeno diahelong.
18 Le dipolokwe tsena tsa mafi tse leshome, o di ise ho molaodi wa sekete sa bona, mme o bone hore na banabeno ba sa dutse hantle, o ntoo boya le taba bona.
19 Saule, le bona, le banna bohle ba Iseraele ba ne ba le thoteng ya Ela, ba lwana le Bafilesta.
20 Ha ho le jwalo, Davida a tsohela e sa le hosasa, a siya dinku le modisa, mme a tloha, a ya le seo Jese a mo laetseng sona, a ba a fihla moo diahelo di leng teng, ha makgotla a tswela ho itokisa, mme ho hlabelwa ntwa mokgosi.
21 Baiseraele le Bafilesta ba hlopholla makgotla ho ya kopanya ntwa.
22 Davida a siya phahlo ya hae matsohong a molebedi wa phahlo, a titimela ntweng; a fihla, a dumedisa banababo.
23 A re a sa bua le bona, a bona monna eo wa monaila, eo lebitso la hae e leng Goliathe wa Gathe, a etla a tloha makgotleng a Bafilesta, a sa bua ka mokgwa ola, Davida le yena a utlwa.
24 Banna ba Iseraele ha ba bona monna eo, ba mmalehela, ba tshaba haholo.
25 Banna ba Iseraele, ba re: Na le mmone monna eo ya tlileng na? Efela o tlile ho nyedisa Iseraele; ya ka mmolayang morena o tla mo ruisa leruo le leholo, a mo nee le moradi wa hae, mme a laele hore ntlo ya ntatae e se ke ya ntsha lekgetho Iseraeleng.
26 Davida a re ho banna bao a emeng le bona: Ho tla etsetswang monna ya ka bolayang Mofilesta eo, ya tlosang nyediso Iseraeleng na? Mofilesta eo wa leqai ke motho ya jwang, ha a nyedisa makgotla a Modimo o utlwang?
27 Ebile setjhaba se mo phetela jwalo, sa re: Monna ya mmolayang o tla etsetswa ka hore le ka hore.
28 Empa Eliabe, moholwane wa Davida, ha a utlwa taba tseo a di buang le banna bao, a halefela Davida, a re: O tletseng kwano? Mme dinkunyana tsela tse seng kae o di siile le mang nahathothe? ke tseba boikgohomoso ba hao le mabela a pelo ya hao, hobane o tlile ho boha ntwa feela!
29 Davida a re: Ke entseng jwale? Molato o kae, ha ke bua jwalo?
30 A kgaohana le yena kahoo, a leba ho e mong, a bua tsona tsena; mme setjhaba sa mo phetela jwaloka pele.
31 Yare ha mantswe a buwang ke Davida a utlwahala, ba a pheta pela Saule, mme Saule a mmitsa.
32 Davida a re ho Saule: Ho se ke ha eba ya felang pelo ka baka la motho eo; mohlanka wa hao o tla ya, a lwane le Mofilesta eo.
33 Saule a re ho Davida: O ke ke wa lwana le Mofilesta eo, etswe o sa le mohlankanyana; yena ke monna wa ntwa haesale le botjheng ba hae.
34 Davida a re ho Saule: Ke le mohlanka wa hao, ke modisa wa dinku tsa ntate. Ha ho ne ho etla tau kapa bere, ho nka konyana mohlapeng;
35 ke ne ke tswa ho di phallela, le ho di bolaya, le ho namolela konyana hanong ho tsona; mme leha di ne di ntsohela matla, ke ne ke di tshwara ka ditlena tsa tsona, ke di bolaye, ke di timetse.
36 Tau le yona bere, mohlanka wa hao o di bolaile; mme Mofilesta eo wa leqai o se a ya ba jwaloka tsona, hobane o nyedisitse makgotla a Modimo o utlwang.
37 Davida a eketsa, a re: Jehova ya nnamoletseng marong a tau le marong a bere, o tla nnamolela le matsohong a Mofilesta eo. Ebile Saule o re: Eya, Jehova a be le wena.
38 Saule a apesa Davida diaparo tsa hae tsa ntwa, a mo rwesa heleme ya koporo hloohong, a mo apesa le seaparo sa tshepe.
39 Davida a apara diaparo tsa Saule, a nka le sabole ya hae, a re o tla tsamaya ka tsona, athe o ne a eso ho leke tse jwalo. Yaba o re ho Saule: Ke sitwa ho tsamaya ka tsona, hobane ha ke a di tlwaela. Davida a di hlobola ke hona,
40 a nka molamu wa hae, a ya molapong, a ithonakela majwe a mahlano a boreledi, a a kenya pataneng ya hae, eo a nang le yona, le mokotlaneng wa hae; a atamela Mofilesta, a tshwere letjeketjane la hae.
41 Mofilesta yena a tloha, a ikatametsa ho Davida, monna ya jereng thebe ya hae a mo eteletse pele.
42 Eitse Mofilesta, ha a tadima, a bona Davida, a mo nyedisa hobane e le mohlankana feela e mokhunwana, ya fahleho se setle.
43 Mofilesta a re ho Davida: A ke ntja, ha o tlile ho nna ka melamu? Yaba Mofilesta o rohaka Davida ka medimo ya hae.
44 Mofilesta a eketsa a re ho Davida: Tloo ho nna, ke nee dinonyana tsa lehodimo le dibatana tsa naha nama tsa hao.
45 Davida a re ho Mofilesta: O tlile ho nna ka sabole le ka lerumo le ka tsenene; nna, ke tla ho wena ka lebitso la Jehova wa makgotla, Modimo wa makgotla a Iseraele, eo o mo nyedisitseng.
46 Kajeno, Jehova o tla o neela matsohong a ka; ke tla o bolaya, ke o pome hlooho, ke nee kajeno lena dinonyana tsa lehodimo le dibatana tsa naha ditopo tsa makgotla a Bafilesta, mme lefatshe lohle le tla tseba hobane Modimo o teng Iseraeleng.
47 Le bongata bona bohle bo tla tseba hobane Jehova ha a namolele ka sabole leha e le ka lerumo, hobane tlholo ke ya Jehova, mme o tla le neela matsohong a rona.
48 Ebile ke moo Mofilesta a tlohang, a tla, a atamela ho kgahlanyetsa Davida; Davida yena a phakisa a titimela ntweng, ho ya kgahlanyetsa Mofilesta.
49 Jwale, Davida a kenya letsoho pataneng, a ntsha lejwe teng, a le betsa ka letjeketjane, mme a otla Mofilesta phatleng; lejwe la dikella phatleng ya hae, mme a wela fatshe ka sefahleho.
50 Davida a hlola Mofilesta jwalo ka letjeketjane le ka lejwe, a bolaya Mofilesta, a mo timetsa, ho se sabole letsohong la Davida.
51 Ebile Davida o titima, a ema ho Mofilesta; a nka sabole ya hae, a e pshemola selateng sa yona, a mmolaya, a mo kgaola hlooho ka yona. Bafilesta bohle ha ba bona hobane senatla sa bona se shwele, ba baleha.
52 Banna ba Iseraele le ba Juda ba ema, ba hlaba ditlatse, ba phallela Bafilesta, ho isa sekgutlong le kgorong tsa Ekrone; Bafilesta ba nna ba wa ba hlabilwe, ho ya le tsela ya Shaaraime, ho ya fihla Gathe le Ekrone.
53 Bana ba Iseraele ba ntoo kgutlela Bafilesta, ba hapa le diahelo tsa bona.
54 Haele Davida, a nka hlooho ya Mofilesta a e isa Jerusalema; le dihlomo tsa hae a di bea tenteng ya hae.
55 Saule, mohla a bonang Davida a etswa ho kgahlanyetsa Mofilesta, a re ho Abnere, molaodi wa makgotla: Abnere, mohlankana eo ke mora mang na? Abnere a re: Ka moya wa hao o utlwang, morena, ha ke tsebe.
56 Morena a re: Ako botse hore na mohlankana eo ke mora mang na?
57 Eitse Davida ha a kgutla hobane a bolaye Mofilesta, Abnere a mo nka, a mo isa pela Saule, a sa tshwere hlooho ya Mofilesta.
58 Saule a re ho Yena: Mohlankana, o mora mang? Davida a re: Ke mora mohlanka wa hao Jese, wa Bethlehema.